Sigingo 19 - Mbeti ti Nzapa - Tënë so amu fini

NZAPA ASARA MBUKI NA AZO TI ISRAEL 19–24 Nzapa aye ti sara mbuki na azo ti Israel

¹ Na kozo lango ti ota nze ni, na peko ti so azo ti Israel asigigi na Ezipte awe, ala si na benyama ti Sinai.

² So ala londo lani na Refidim, ala si na benyama ti Sinai, ala sara bâbâ ti ala kâ, abaa ndo le na le na hoto ti Sinai.

³ Moïse ague na li ti hoto ti wara tere na Nzapa. Kâ na li ti hoto ni, KOTA GBIA airi lo si atene na lo: “Baa, tënë so fade mo yeke tene na azo ti mara ti Jacob, azo ti Israel ayeke so:

⁴ ‘Ala wani abaa na le ti ala ye so mbi sara na azo ti Ezipte. Ala baa lege so mbi yo ala, mbi ga na ala ge na tere ti mbi; mbi yo ala tongana ti so *ngoalo ayeke yo amolenge ti lo na ndö ti *kpangi ti lo.

⁵ Fadeso, tongana ala ma tënë ti mbi si ala bata tënë ti *mbuki ti mbi, fade ala yeke ga azo ti mbi wani na popo ti amara kue. Biani, sese kue ayeke ti mbi.

⁶ Me ti ala, ala yeke duti ande kodro-gbia ti awayango-sandaga ndali ti mbi; ala yeke ga mara so ayeke nde si ayeke nzoni kue.’ Baa, tënë so fade mo yeke tene na azo ti Israel laa.”

⁷ Moïse akiri na ya ti bâbâ; lo iri *akangba ti Israel si lo fa na ala peko ti atënë so kue KOTA GBIA amu yanga na lo daa.

⁸ Azo kue ayeda yanga oko, atene: “Atënë so kue KOTA GBIA atene so, fade e yeke sara ye alingbi na ni.” Moïse akiri na peko ti tënë ti azo ni na KOTA GBIA.

⁹ KOTA GBIA atene na Moïse: “Baa, mbi yeke ga ti si na mo na ya ti gba ti nengo mbinda. Tongaso, azo ti Israel alingbi ti ma go ti mbi na ndembe so mbi yeke tene tënë na mo si ala lingbi ti zia be ti ala na ndö ti mo kpu na kpu.” Moïse akiri atene peko ti atënë ti azo ni na KOTA GBIA.

Nzapa awara tere na Moïse na li ti hoto ti Sinai

¹⁰ KOTA GBIA akiri atene na Moïse: “Gue na mbage ti azo ni, mo tene na ala titene ala *sukula sioni ti ala laso nga na kekereke; ala sukula nga abongo ti ala.

¹¹ Ayeke nzoni ala leke tere ti ala ndali ti ota lango ni. Biani, na ota lango ni laa mbi yeke zu na ndö ti hoto ti Sinai na le ti azo kue.

¹² Mo zia mbeni maka angoro tere ti hoto ni kue; mo gboto mê ti ala, mo tene: ‘Ala sara hange, ala gue na li ti hoto ni pepe, ala ga nga nduru na tere ni pepe!’ Zo so aga nduru na tere ni, alingbi a fâ lo.

¹³ Ataa zo wala nyama, fade zo ayeke ndu lo pepe, me a yeke bo lo bongo na têne wala a yeke kpo lo na likongo ti fâ lo. Tongana a huru didi ti akoli-taba, fade ambeni zo ayeke ma na li ti hoto ni.”

¹⁴ Moïse alondo na li ti hoto ni, lo zu ti ga na mbage ti azo ni. Lo sara si ala sukula sioni ti ala; ala sukula nga abongo ti ala.

¹⁵ Na pekoni, lo tene na azo ni, lo tene: “Ala leke tere ti ala ndali ti ota lango ni. Ala bongbi na wali ti ala pepe.”

¹⁶ Na ota lango ni, na kota ndaperere, bekpa asungba na li ti hoto ni, wâ ti bekpa aza si gba ti nengo mbinda akanga li ti hoto ni. Azo ama toto ti adidi ti akoli-taba so atoto ngangu. Na ya ti bâbâ ni, tere ti azo kue ado na mbeto.

¹⁷ Moïse asara si azo ni asigigi na ya ti bâbâ ni titene ala wara tere na Nzapa. Ala luti yongoro na gbe ti hoto ni.

¹⁸ Guru ti wâ amu ndö ti hoto ti Sinai kue, ngbanga ti so KOTA GBIA azu na ndö ti hoto ni na ya ti wâ. Guru ni alondo tongana guru ti wâ ti mbeni fur; hoto ni kue ado ngangu mingi.

¹⁹ Toto ti adidi ni akiri ague guengo na nduzu. So Moïse ayeke tene tënë, Nzapa ayeke kiri tënë na lo na ya ti toto ti bekpa.

²⁰ KOTA GBIA azu na ndö ti hoto ti Sinai, na li ti hoto ni, lo iri Moïse si Moïse ague na ndö ti hoto ni.

²¹ KOTA GBIA atene na Moïse: “Gue mo gboto mê ti azo ni titene ala do tere ti ala ti baa mbi pepe. Tongaso pepe, fade azo mingi na popo ti ala ayeke kui.

²² Ataa awayango-sandaga so ayeke ga nduru na tere ti mbi, ayeke nzoni ala sukula sioni ti ala si. Tongaso pepe, fade mbi yeke sara titene azo mingi na popo ti ala akui.”

²³ Moïse akiri tënë na KOTA GBIA: “Azo ni alingbi ti ma na li ti hoto ti Sinai pepe, ngbanga ti so mo gboto mê ti e kozoni, mo tene: ‘Mo zia mbeni maka angoro tere ti hoto ni kue; tongaso, fade mo yeke zia ni nde ndali ti mbi.’ ”

²⁴ KOTA GBIA atene na Moïse: “Kiri mo zu; na pekoni, mo na Aaron ama na li ti hoto ni. Ti awayango-sandaga nga na azo ni, ala do tere ti ala pepe ti ma na mbage ti mbi. Tongaso pepe, fade mbi yeke sara titene azo mingi na popo ti ala akui.”

²⁵ Moïse azu ague na mbage ti azo ni si lo tene tënë na ala.