Sigingo 17 - Mbeti ti Nzapa - Tënë so amu fini

Ngu ti Masa na ti Meriba

¹ Bongbi ti azo ti Israel kue alondo na benyama ti Sin, ala si na mbeni ndo; ala londo na ndo so ala si na mbeni ndo alingbi na yanga so *KOTA GBIA amu; ala sara tongaso ngbii ala si na Refidim. Ala sara bâbâ ti ala kâ, me ngu ti nyongo ni ayeke daa pepe.

² Azo ni agi yanga ti Moïse, atene: “Mu na e ngu, e nyon!” Moïse akiri tënë na ala: “Ala yeke gi yanga ti mbi ngbanga ti nyen? Ala yeke tara be ti KOTA GBIA ngbanga ti nyen?”

³ Kâ, nzara ti ngu ahon ndö ti azo ni si ala kasa Moïse, atene: “Mo mu e na kodro ti Ezipte, mo ga na e ge ngbanga ti nyen? Mo ye titene nzara ti ngu afâ e, na amolenge ti e nga na anyama ti e?”

⁴ Moïse adema tere ti lo na KOTA GBIA: “Nyen laa mbi lingbi ti sara ndali ti azo so? Angba gi kete titene ala bo mbi na têne!”

⁵ KOTA GBIA atene na Moïse: “Mo hon na dawa ti azo ni. Mo mu ambeni *kangba ti Israel na tere ti mo. Keke so lani mo pika na kota ngu ti Nil so, mo mu ni na maboko ti mo, mo gue.

⁶ Ti mbi, fade mbi yeke luti na dawa ti mo, na ndö ti mbeni kota têne so ayeke na Horeb. Fade mo yeke pika têne ni, ngu ayeke sigigi daa si azo ni ayeke nyon.” Moïse asara tongaso na dawa ti akangba ti Israel.

⁷ Lo di iri ti ndo ni Masa, so ti tene “Tarango be”, na Meriba, so ti tene “Gingo yanga”. Biani, na ndo so laa azo ti Israel agi yanga ti Moïse si ala tara be ti KOTA GBIA, atene: “KOTA GBIA ayeke na popo ti e, wala lo yeke na popo ti e pepe?”

Azo ti mara ti Amalek atiri bira na azo ti Israel

⁸ Azo ti mara ti Amalek aga ti tiri bira na azo ti Israel na Refidim.

⁹ Moïse atene na Josué: “Soro ambeni koli, mo gue, mo tiri bira na azo ti mara ti Amalek. Kekereke, mbi yeke luti na li ti hoto, keke ti Nzapa na maboko ti mbi.”

¹⁰ Josué ague ti tiri bira na azo ti Amalek alingbi na tënë so Moïse atene na lo. Me Moïse, Aaron na Hur ague ti ala na li ti hoto.

¹¹ Tongana Moïse ayo maboko ti lo na nduzu, azo ti Israel ahon ala na ngangu; me tongana lo zia maboko ti lo na sese, azo ti Amalek ahon azo ti Israel na ngangu.

¹² So maboko ti Moïse awoko awe, Aaron na Hur amu mbeni têne, ala zia na gbe ti Moïse si lo duti na ndö ni. Aaron na Hur aluti mbage na mbage, ala gbu maboko ti Moïse na nduzu. Tongaso maboko ti Moïse angba na nduzu ngbii asi na lakui.

¹³ Nilaa Josué ahon ndö ti azo ti Amalek na bira ni, lo fâ ala na yongoro zeme.

¹⁴ KOTA GBIA atene na Moïse: “Su aye so kue na mbeti si aga ye ti dango be ti ala. Tene tënë so na mê ti Josué, mo tene: ‘Fade mbi yeke hunzi azo ti Amalek kue, mbi yeke sara si na ndö ti sese so, azo akiri adabe ti ala na mara ti ala pepe.’ ”

¹⁵ Moïse aleke mbeni gbalaka si lo di iri ni “KOTA GBIA ayeke bendere ti mbi.”

¹⁶ Lo tene: “So azo ti mara ti Amalek aye ti bi mbata ti KOTA GBIA na sese so, fade KOTA GBIA ayeke sara bira na ala ngu na ngu.”