Sigingo 16 - Mbeti ti Nzapa - Tënë so amu fini

Nzapa amu adodoro na mane na azo ti Israel

¹ Bongbi ti azo ti Israel kue alondo na Elim, ala si na benyama ti Sin na lango baleoko na oku ti use nze ni, na peko ti so ala sigigi na kodro ti Ezipte. Sin ayeke na popo ti Elim na hoto ti Sinai.

² Kâ na benyama, bongbi ti azo ti Israel kue akasa Moïse na Aaron.

³ Azo ni atene: “Na ngoi so lani e yeke na Ezipte, e yeke duti na tere ti ta ti nyama, e yeke te kobe, ya ti e asi. Tongana KOTA GBIA afâ e lani gi kâ, ka ayeke nzoni mingi! Me ala mu e, aga na e na benyama so si ala zia e titene e kue, e kui nzara!”

⁴ KOTA GBIA atene na Moïse: “Mbi yeke sara titene mapa alondo na nduzu kâ, atuku tongana ngu-Nzapa na ala. Na ya ti lango oko oko, fade azo ayeke sigigi ti ro mapa ni ndali ti kobe ti lango oko. Fade mbi yeke tara be ti ala ti baa wala ala yeke sara ye alingbi na *Ndia ti mbi, wala ala yeke sara pepe.

⁵ Na lango omene ni, tongana ala ga ti to kobe so ala ro so, fade ala yeke baa so kobe ni ayeke mingi fani use ahon ti atanga ti alango ni.”

⁶ Moïse na Aaron atene na azo ti Israel kue, atene: “Na lakui so, ala yeke hinga atene, KOTA GBIA laa azi ala na Ezipte asigigi na ala.

⁷ Kekereke na ndaperere, fade ala yeke baa gonda ti KOTA GBIA, ngbanga ti so KOTA GBIA ama kasango ndo so ala kasa lo so. E, e yeke ti e zo wa si ala yeke kasa e so?”

⁸ Moïse akiri atene: “Fade ala yeke hinga atene KOTA GBIA laa, na ndembe so lo yeke mu na ala nyama na lakui titene ala te si na ndaperere, lo yeke mu na ala mapa titene ala te ya ti ala asi. Biani, lo ma kasango so ala kasa lo so. E, e yeke ti e zo wa? Ala yeke kasa e pepe, me KOTA GBIA laa ala yeke kasa lo.”

⁹ Moïse atene na Aaron: “Tene na bongbi ti azo ti Israel kue, mo tene: Ala ga nduru na KOTA GBIA, ngbanga ti so lo ma kasango ndo ti ala.”

¹⁰ Na ndembe so Aaron ayeke tene tënë na bongbi ti azo ti Israel kue, ala zia le ti ala na mbage ti benyama, mo ye ti baa, ala baa gonda ti KOTA GBIA asigigi na ya ti mbinda.

¹¹ KOTA GBIA atene na Moïse:

¹² “Mbi ma kasango ndo ti azo ti Israel. Tene na ala, mo tene: ‘Na lakui so, fade ala yeke te nyama, kekereke na ndaperere, ala yeke te mapa ya ti ala asi si ala hinga atene, mbi laa mbi yeke KOTA GBIA, Nzapa ti ala.’ ”

¹³ Gi na lakui ni, adodoro aga amu ya ti bâbâ ni kue. Na ndaperere, gba ti ngu ti pere angoro bâbâ ni.

¹⁴ So ngu ti pere ni ahole awe, ambeni ye vuru vuru, kete kete tongana akete le ti kobe angba na ndö ti sese.

¹⁵ Azo ti Israel abaa ye ni si ala tene na popo ti ala, atene: “So nyen laa?” Biani, ala hinga ye ni so pepe. Moïse atene na ala: “Mapa so KOTA GBIA amu na ala titene ala te laa.

¹⁶ Baa, yanga so KOTA GBIA amu ayeke so: ‘Zo oko oko aro kobe ni alingbi na nzara ti lo. Zo oko ta oko, zo oko ta oko. Sewa oko amu ta ti kobe ni alingbi na wungo ti azo ti da ti lo.’ ”

¹⁷ Azo ti Israel asara ye alingbi na tënë so. Ambeni aro kobe ni mingi, ambeni aro kete.

¹⁸ Na pekoni ala mu sembe, ala haka na akobe ni: zo so aro mingi awara kobe ahon ndoni pepe; zo so aro kete, kobe atia lo pepe. Zo oko oko awara kobe so alingbi na lo.

Andia nde nde ndali ti mane

¹⁹ Moïse akiri atene na ala: “Zo oko abata kobe ni asi na ndaperere pepe!”

²⁰ Me ambeni zo ni ama Moïse pepe. Ala bata kobe ni asi na ndaperere; angusu adu daa si kobe ni afun sioni. Tongaso Moïse asara ngonzo na tere ti ala.

²¹ Lakue na ndaperere, zo oko oko ayeke ro akobe so alingbi na nzara ti lo. Tongana lâ asu, kobe ni ayeke ga ngu.

²² Na lango omene ni, ala ro mapa ni fani use ahon ti kozo, zo oko ta use. Amakonzi kue ti bongbi ti azo ni aga atene tënë ni na Moïse.

²³ Moïse atene na ala: “Yanga so KOTA GBIA amu laa: Kekereke ayeke *lango ti wungo tere, lango ti wungo tere so a zia ni nde ndali ti KOTA GBIA. Ye so ala ye ti zö, ala zö ni; ye so ala ye ti to, ala to ni. Tanga ti kobe ni, ala bata ndali ti kekereke na ndaperere.”

²⁴ Ala bata tanga ti kobe ni asi na ndaperere alingbi na yanga so Moïse amu. Kobe ni afun pepe, angusu adu nga daa pepe.

²⁵ Moïse atene: “Ala te kobe ni laso. Laso ayeke lango ti wungo tere ndali ti KOTA GBIA. Laso, ala yeke wara kobe ti tengo ni na gigi pepe.

²⁶ Biani, fade ala yeke ro kobe ni na ya ti lango omene; me lango mbarambara ni ayeke lango ti wungo tere. Fade kobe ayeke daa pepe.”

²⁷ Andaa na lango mbarambara ni, ambeni zo ni asigigi ti ro kobe, me ala wara ye oko pepe.

²⁸ KOTA GBIA atene na Moïse: “Ala yeke ngba ti ke ti sara ye alingbi na tënë ti yanga ti mbi na ndia ti mbi ngbii asi lawa?

²⁹ Alingbi ala hinga so: mbi KOTA GBIA, mbi mu na ala lango ti wungo tere. Ndani laa na lango omene ni, mbi mu nga na ala mapa ti lango use. Na lango mbarambara ni, ayeke nzoni zo oko oko angba na ndo ti lo; zo oko asigigi pepe.”

³⁰ Tongaso, azo ti Israel awu tere ti ala na lango mbarambara ni.

³¹ Azo ti Israel adi iri ti kobe ni *mane. Mane ayeke tongana lengo ti pere so iri ni koriandre, avuru vurungo, nzerengo ni ayeke tongana nzerengo ti makara so a sara na mafuta ti wotoro.

³² Moïse atene: “Baa, yanga so KOTA GBIA amu ayeke so: ‘Ayeke nzoni ala zia mane asi ya ti ta oko; fade ala bata ni ndali ti *ahale ti ala titene ala baa ni si ala hinga kobe so mbi mu ando na ala ti te na benyama, na ndembe so mbi sara si ala sigigi na kodro ti Ezipte.’ ”

³³ Na pekoni, Moïse atene na Aaron: “Mu kete ta, mo tuku mane daa asi; mo zia ni na ya ti mbeni kangu na dawa ti KOTA GBIA titene a bata ni ndali ti ahale ti ala.”

³⁴ Aaron asara ye alingbi na yanga so KOTA GBIA amu lani na Moïse: lo zia ta ni na dawa ti atêne so a su atënë ti mbuki na le ni.

³⁵ Azo ti Israel ate mane so na ya ti ngu baleosio ngbii ala si na sese so azo aduti daa. Ala te ni ngbii ala si na katikati ti sese ti Kanaan.

³⁶ Kobe ti mane ndali ti zo oko oko alingbi na kete ta oko so a iri ni “omer”. Omer baleoko alingbi na sembe oko so a iri ni “efa”.