Sigingo 13 - Mbeti ti Nzapa - Tënë so amu fini

Ambeni ndia ndali ti matanga ti Pake

¹ KOTA GBIA atene na Moïse:

² “Akozo molenge-koli so kue ayeke na Israel, ala so azi lege ti dungo ni na mama ti ala, mo zia ala nde ndali ti mbi. Biani, akozo molenge-koli ti zo na akozo molenge-koli ti nyama ayeke ti mbi.”

³ Moïse atene na azo ni, atene: “Lango so lani ala sigigi na sese ti Ezipte, ndo so ala yeke angbaa daa so, ala dabe ti ala na ni! Biani, na lege ti ngangu ti maboko ti KOTA GBIA, lo zi ala, lo sigigi na ala na ya ti kodro ni. Mapa so a sara na mama ni, fade ala te ni pepe.

⁴ Laso na nze ti Abib laa ala sigigi.

⁵ Tongana KOTA GBIA asara si ala si na kodro ti azo ti Kanaan, azo ti mara ti Het, ti Amori, ti Hivi nga na ti azo ti Yebus, fade ala yeke sara matanga so na ya ti nze so. Kodro so KOTA GBIA adeba yanga ti lo na akotara ti ala ti mu ni na ala laa; ngu ti me ti bagara na mafuta ti wotoro asi singo daa.

⁶ Na ya ti lango mbarambara, fade ala te mapa so a sara na mama ni pepe. Na lango mbarambara ni, fade ala sara matanga ndali ti KOTA GBIA.

⁷ Na ya ti alango so kue, fade ala yeke te mapa so a sara na mama ni pepe. Na ya ti sese ti ala kue, mapa so a sara na mama ni, wala mama ti mapa, alingbi a wara ni na ndo ti ala pepe.

⁸ Na lango ti matanga so, fade ala yeke fa nda ti tënë so na amolenge ti ala, atene: ‘E sara matanga so ndali ti ye so KOTA GBIA asara na e na ndembe so e sigigi na kodro ti Ezipte.’

⁹ Na lege ti ngangu ti maboko ti KOTA GBIA laa, lo zi ala na Ezipte, lo sigigi na ala. Fade matanga so ayeke ga ye ti dango be ti ala, legeoko tongana mbeni nzoroko na tere ti maboko ti ala nga na ndö ti le ti ala. Matanga ni ayeke dabe ti ala so, ala lingbi ti fa *Ndia ti KOTA GBIA na azo.

¹⁰ Na ngu oko oko, fade ala sara ye alingbi na mbela so, gi na lango so a fa na ala.”

¹¹ Moïse akiri atene na azo ni, atene: “Fade KOTA GBIA ayeke sara si ala si na sese ti Kanaan; lo yeke mu sese ni na ala tongana ti so lo deba yanga ti lo na ala nga na akotara ti ala.

¹² Tongana ala si kâ, fade ala yeke mu na KOTA GBIA amolenge-koli so azi lege ti dungo ni na mama ti ala nga na amolenge ti nyama so azi lege ti dungo ni na mama ti ala. Ala kue ayeke ti KOTA GBIA.

¹³ Ti kozo molenge ti lele, fade ala yeke sanze lo na kete taba wala na kete ngasa. Tongana ala sanze lele ni pepe, fade ala pete go ti lo, ala fâ lo. Me ti akozo molenge-koli ti zo so ayeke na popo ti ala, fade ala yeke kiri ti vo ala vongo.

¹⁴ Gbanda, tongana amolenge ti ala ahunda ala, atene: ‘Nda ti ye so ala sara so ayeke nyen?’ Fade ala kiri tënë na ala, atene: ‘Na ngangu ti maboko ti KOTA GBIA, lo sara si e sigigi na Ezipte, ndo so lani e yeke angbaa daa so.

¹⁵ Lani Faraon akpengba be ti lo si lo ke ti zia lege na e ti gue. Tongaso KOTA GBIA afâ akozo molenge-koli kue ti kodro ti Ezipte, akozo molenge-koli ti zo na ti anyama. Ndani laa e yeke ya akozo molenge-koli ti anyama na *sandaga na KOTA GBIA. Me akozo molenge ti e ti koli, e yeke kiri ti vo ala vongo.’

¹⁶ Asandaga so ayeke ga ye ti dango be ti ala, legeoko tongana mbeni nzoroko na tere ti maboko ti ala nga na ndö ti le ti ala. Asandaga ni ayeke dabe ti ala na ngangu ti maboko ti KOTA GBIA, lo so lo zi ala na Ezipte lo sigigi na ala.”

Nzapa wani ayeke tambula na dawa ti azo ti lo fa lege na ala

¹⁷ So Faraon azia lege na azo ti Israel ti gue, Nzapa azia lege na ala ti gue na kodro ti azo ti Filistii pepe, ataa so nduru lege ni laa. Biani, Nzapa atene na be ti lo, atene: “Tongana awato ti ala asara bira na ala, fade be ti ala ayeke woko si ala kiri na Ezipte.”

¹⁸ Ndani laa Nzapa asara si azo ti Israel amu lege so ague na benyama, na mbage ti kota ngu-ingo ti Asosongo. Ala londo na Ezipte na aye ti bira ti ala kue na tere ti ala si ala gue.

¹⁹ Moïse amu abio ti Joseph ague na ni, ngbanga ti so Joseph ahunda ando na azo ti Israel atene: “Gba fade Nzapa ayeke ga ti mu maboko na ala; ala deba yanga ti ala ti mu abio ti mbi ti gue na ni.”

²⁰ Azo ti Israel alondo na Sukot, ala gue, asara bâbâ ti ala na Etam, na yanga ti benyama.

²¹ KOTA GBIA wani laa ayeke tambula na dawa ti ala. Na kota lâ, lo yeke na ya ti ngbongboro mbinda ti fa lege na ala. Na bi, lo yeke na ya ti ngbongboro wâ ti za na tere ti ala. Tongaso ala lingbi ti tambula na kota lâ nga na bi.

²² Na kota lâ, ngbongboro mbinda ni ayeke zia azo ti Israel pepe; na bi, ngbongboro wâ ni ayeke zia nga ala pepe.