Sigingo 10 - Mbeti ti Nzapa - Tënë so amu fini

Miombe kpale ni: agbadola

¹ KOTA GBIA atene na Moïse: “Gue na ndo ti Faraon, ngbanga ti so mbi laa mbi sara si li ti lo akpengba, lo na azo ti gbe ti lo titene mbi sara aye ti kpene so na popo ti ala.

² Tongaso, fade mo lingbi ti fa na amolenge ti mo nga na amolenge ti amolenge ti mo peko ti ye ti ngangu so mbi sara na azo ti Ezipte nga na aye ti kpene so mbi sara na kodro ti ala. Fade ala azo ti Israel, ala yeke hinga atene, mbi laa mbi yeke KOTA GBIA.”

³ Moïse na Aaron ague na ndo ti Faraon si ala tene na lo: “Tënë so KOTA GBIA, Nzapa ti ahebro atene ayeke so: ‘Mo yeke ke ti sara tere ti mo kete na dawa ti mbi ngbii asi lawa? Zia lege na azo ti mbi titene ala gue, avoro mbi.

⁴ Tongana mo ngba ti ke, kekereke, mbi yeke tokua agbadola na ndö ti sese ti mo.

⁵ Ala yeke mu ndö ti sese kue, asara si zo alingbi ti kiri ti baa sese ni pepe. Ala yeke te tanga ti akobe ti yaka so angba; akobe so *pembe ti bekpa abuba ni pepe so. Ala yeke te akugbe ti akeke so kue asigigi na yaka.

⁶ Ala yeke si singo na ya ti ayangbo ti mo, na ya ti ada ti azo ti gbe ti mo kue nga na ya ti ada ti azo ti Ezipte kue. Ye ni ayeke duti mbeni kota kpale so, ngbene ye na ngoi ti akotara ti mo ngbii asi fadeso, zo ade ti baa ni laoko pepe.’ ” Na pekoni, Moïse alondo na ndo ti Faraon, asigigi.

⁷ Azo ti gbe ti Faraon atene na lo: “Zo so ayeke ngba tongana kuku ti gbungo e ngbii asi lawa? Zia lege na azo ti Israel titene ala gue, avoro KOTA GBIA, Nzapa ti ala. Kodro ti Ezipte ayeke gue ti buba laa; ade mo hinga ni pepe?”

⁸ A kiri aga na Moïse na Aaron na ndo ti Faraon si Faraon atene na ala: “Ala gue, avoro KOTA GBIA, Nzapa ti ala. Me zo wa laa aye ti gue, zo wa?”

⁹ Moïse akiri tënë: “E kue laa e yeke gue, amaseka na ambakoro, akoli na awali, ataba na angasa ti e nga na abagara ti e. Biani, alingbi e sara matanga ndali ti KOTA GBIA.”

¹⁰ Faraon atene na ala: “Ala ye titene mbi zia lege na ala titene ala na asewa ti ala ague? Ayeke nzoni KOTA GBIA aduti na ala ma! Fadeso sioni tënë ti be ti ala asigigi polele awe!

¹¹ Mbi ke awe! Gi akoli laa ayeke gue ti voro KOTA GBIA; ye so ala yeke gi laa.” Na pekoni, a tumba ala titene ala londo na ndo ti Faraon.

¹² KOTA GBIA atene na Moïse: “Yoro maboko ti mo na ndö ti Ezipte titene agbadola aga amu ya ti kodro ni kue; ala yeke te akugbe ti kasa so kue angba na peko ti pembe ti bekpa so.”

¹³ Moïse ayoro keke ti lo na ndö ti Ezipte si KOTA GBIA atokua mbeni pupu ti To na ndö ti kodro ni. Pupu ni aya na kota lâ kue nga na bi kue. Na ndaperere, pupu ti To ni aga na agbadola awe.

¹⁴ Agbadola ni amu ya ti Ezipte kue, ala duti na ndo kue. Ala wu ahon ndoni: kozoni, azo ti Ezipte ade ti baa mara ti gba ti agbadola tongaso laoko pepe; ala yeke kiri ti baa mara ni tongaso laoko pepe.

¹⁵ Agbadola ni amu ndö ti sese kue si ndö ti sese ni avuko vukongo. Ala te apere ti kodro ni kue nga na ale ti keke so kue angba na peko ti pembe ti bekpa. Na ya ti kodro ti Ezipte kue, mbeni kugbe oko angba na li ti akeke pepe, na ndo kue; mbeni kugbe ti kasa oko angba na yaka pepe.

¹⁶ Faraon airi Moïse na Aaron na loro si lo tene na ala: “Mbi sara sioni so ake KOTA GBIA, Nzapa ti ala awe; mbi sara nga sioni so ake ala.

¹⁷ Fadeso, ala kiri azi tënë na li ti mbi ti fani oko ni maa! Ala sambela KOTA GBIA, Nzapa ti ala titene lo zi mbi na ya ti kuâ so.”

¹⁸ Moïse alondo na ndo ti Faraon asigigi si lo sambela KOTA GBIA.

¹⁹ KOTA GBIA asara si ngangu pupu ti Do aya, ahon na agbadola ni si atuku ala na ya ti kota ngu-ingo ti Asosongo. Gbadola oko angba na sese ti Ezipte pepe.

²⁰ Me KOTA GBIA akpengba be ti Faraon si lo ke ti zia lege na azo ti Israel ti gue.

Gumbaya kpale ni: vukongo ndo

²¹ KOTA GBIA atene na Moïse: “Yoro maboko ti mo na nduzu! Ayeke nzoni ndo avuko pitipiti na ndö ti sese ti Ezipte, vukongo ndo so zo ayeke tatara ndo tatarango daa!”

²² Moïse ayoro maboko ti lo na nduzu si na ya ti lango ota, ndo avuko pitipiti ahon ndoni na kodro ti Ezipte kue.

²³ Na ya ti lango ota, zo oko abaa mba ti lo pepe, lo yeke londo nga na ndo so lo yeke daa ti hon na mbeni ndo nde pepe. Me lumiere ayeke na ndo so azo ti Israel kue ayeke duti daa.

²⁴ Gbia Faraon airi Moïse si lo tene na lo: “Ala gue, avoro KOTA GBIA. Ala na asewa ti ala alingbi ti gue senge; me gi ye oko, ataba ti ala, angasa ti ala nga na abagara ti ala ayeke ngba na ndo so.”

²⁵ Moïse atene: “Anyama so e yeke mu na *sandaga nga na sandaga so a yeke gbi ni kue na wâ na KOTA GBIA, Nzapa ti e, mo wani laa mo yeke mu ni na e?

²⁶ Na ndö ni kue, e yeke gue na anyama ti e. Nyama ti e oko ayeke ngba ge pepe. Na popo ti anyama so laa e yeke mu ambeni na sandaga na KOTA GBIA, Nzapa ti e. Me kozoni si e yeke si kâ, anyama so e lingbi ti mu na KOTA GBIA, e hinga ni pepe.”

²⁷ Me KOTA GBIA akpengba be ti Faraon si Faraon ake ti zia lege na azo ti Israel ti gue.

²⁸ Faraon atene na Moïse: “Hon na le ti mbi! Sara hange si mo kiri mo ga na dawa ti mbi pepe! Tongana mo kiri ti ga na dawa ti mbi, andaa kuâ ti mo laa!”

²⁹ Moïse atene: “Mo wani, mo tene awe; fade mbi yeke kiri ti ga na dawa ti mo pepe.”