Ruth 3 - Mbeti ti Nzapa - Tënë so amu fini

Ruth ague na ndö ti lakere

¹ Mbeni lâ, Noemi, kogara ti Ruth atene na lo: “Molenge ti mbi, mbi ye ti gi lege titene dutingo ti mo aga nzoni.

² Fadeso, mo hinga, mo tene, Booz ayeke mbeni zo ti sewa ti e. Lani mo sara kua na tere ti awali so asara kua na lo. Na bi so, lo yeke gue na le ti lakere ti pe ya ti ale ti *orze ti lo.

³ Mo sukula ngu, mo zia yombo na tere ti mo, mo yu pendere bongo ti mo. Mo gue na le ti lakere ni; me mo fa tere ti mo na lo hio pepe, mo ku lo te, lo nyon si.

⁴ Tongana lo gue ti lango, mo baa ndo so lo yeke lango daa so nzoni. Mo gue nduru, mo zi bongo so lo zia na ndö ti lo, na mbage ti gere ti lo so si mo lango na mbage ti gere ti lo ni. Fade lo wani, lo yeke fa na mo ye ti sarango ni.”

⁵ Ruth akiri tënë na Noemi, atene: “Atënë so kue mo tene na mbi so, fade mbi yeke sara ye alingbi na ni.”

⁶ Ruth ague na le ti lakere ni si lo sara aye so kue kogara ti lo amu yanga na lo ti sara.

⁷ Booz ate, anyon si tere ti lo anzere. Na pekoni, lo gue, lo lango na tere ti gba ti ale ti kobe ti lo. Ruth ague yeke-yeke, azi bongo so Booz azia na ndö ti lo, na mbage ti gere ti lo so si lo lango na mbage ti gere ti Booz.

⁸ Na be ti bi, Booz azingo na ngangu, lo mu tere ti lo na nduzu; lo baa mbeni wali ayeke lango na mbage ti gere ti lo.

⁹ Lo hunda ndo, lo tene: “Mo yeke zo wa?” Ruth akiri tënë, atene: “Mbi Ruth, zo ti gbe ti mo laa. Mu mbi, mo bata mbi, ngbanga ti so ndia amu na mo lege ti mu mbi ti bata mbi na peko ti sewa ti mo.”

¹⁰ Booz atene na lo: “Molenge ti mbi, KOTA GBIA asara tufa na ndö ti mo-oo. Ye so mo kiri mo sara so, ayeke nzoni ahon ti so mo sara kozoni. Mo kpe na peko ti amaseka-koli pepe, ataa azo ti mosoro wala azo ti mawa.

¹¹ Fadeso, molenge ti mbi, sara mbeto pepe. Ye so kue mo yeke hunda ande, mbi yeke sara ni na mo. Azo ti kodro ti e kue ahinga atene, mo yeke ngangu wali.

¹² Biani, ndia amu na mbi lege ti mu mo, ti bata mo. Me mbeni zo ti sewa ti e ayeke daa, popo ti sewa ni na koli ti mo ayo pepe. Lo laa lo lingbi ti baa lege ti mungo mo kozoni na mbi.

¹³ Mo lango na ndo so na bi so; kekereke na ndaperere, tongana lo ye ti mu mo ti bata mo, ayeke nzoni lo sara ni. Me tongana lo ye ti mu mo ti bata mo pepe, fade mbi mu mo, mbi bata mo. Tënë so mbi tene na mo so, mbi tene ni na le ti KOTA GBIA so ayeke na fini! Mo lango, ndo ahan si.”

¹⁴ Ruth alango na mbage ti gere ti Booz ngbii ndo ahan. So ndo angba kâ, na ndembe so zo alingbi ti baa mba ti lo ti hinga lo pepe, Ruth alondo ti lo awe. Ruth alondo hio tongaso, ngbanga ti so Booz aye titene azo ahinga atene, Ruth aga na le ti lakere ni pepe.

¹⁵ Booz atene na Ruth: “Ga na kota bongo so ayeke na tere ti mo so; gbu yanga ni nzoni.” Ruth agbu yanga ti kota bongo ni si Booz amu mbeni sembe, lo haka na ale ti orze fani omene si lo tuku na ya ni; lo zia ni na li ti Ruth si lo mu lege, lo kiri na kodro.

¹⁶ Ruth akiri na tere ti kogara ti lo si kogara ti lo ahunda lo, atene: “Ye ni asara kâ tongana nyen, molenge ti mbi?” Na pekoni, Ruth afa na lo peko ti aye so kue koli so asara na lo,

¹⁷ atene: “Lo mu mbeni sembe, lo haka na ale ti orze fani omene si lo mu ni na mbi; ni laa mo yeke baa so. Lo tene na mbi, lo tene: ayeke nzoni mbi kiri na ndo ti kogara ti mbi maboko senge pepe.”

¹⁸ Noemi atene: “Mo duti kpoo, molenge ti mbi. Mo ku mo baa wala tënë ni ayeke ga ande tongana nyen. Tongana koli so abaa lege ti tënë so kue laso pepe, lo yeke lango ande pepe.”