Osée 2 - Mbeti ti Nzapa - Tënë so amu fini

Kota lango ti Yizreel

¹ Me mbeni lâ, fade wungo ti azo ti Israel ayeke ga tongana mbutu ti yanga ti kota ngu-ingo; mbutu so zo alingbi ti haka ni pepe wala ti diko ni pepe. Na ndo so, Nzapa atene lani na ala: “Ala yeke mara ti mbi pepe”, gi na ndo so laa lo yeke tene na ala: “Ala yeke amolenge ti Nzapa so ayeke na fini.”

² Fade azo ti Juda na azo ti Israel ayeke bongbi ti ga oko, ala yeke mu mbeni makonzi oko ti zia lo na ndö ti ala si ala yeke wu ti mu ya ti kodro ni kue. Lango ni so ayeke duti kota lango ti Yizreel!

³ Ala tene na a-ita ti ala ti koli: “Ami!” Ala tene na a-ita ti ala ti wali: “Ruhama!”

Israel ayeke tongana wali ti gingo akoli kirikiri

⁴ *KOTA GBIA atene: “Ala gue na mama ti ala na gbe ti ngbanga, ala gue na lo na gbe ti ngbanga, ngbanga ti so lo yeke wali ti mbi mbeni pepe si mbi, mbi yeke koli ti lo mbeni pepe. “Nzoroko ti aye ti ndumba so lo zia na le ti lo, ayeke nzoni lo zi ni; nzoroko ti gingo koli ti amba ti lo so lo zia na popo ti me ti lo, ayeke nzoni lo zi ni.

⁵ Tongaso pepe, mbi yeke zi bongo na tere ti lo ti zia lo ndumbu tongana ti lango so mama ti lo adu na lo. Fade mbi yeke sara titene lo ga tongana benyama, ndo so ngu ayeke daa pepe; mbi yeke sara titene nzara ti ngu afâ lo.

⁶ “Fade mbi yeke ye amolenge ti lo pepe, ngbanga ti so ala yeke amolenge ti ndumba.

⁷ Biani, mama ti amolenge ni asara ye ti ndumba, mama ti dungo ala asara ye ti kamene na tere ti lo. Biani, lo tene: ‘Mbi ye ti kpe na peko ti andeko ti mbi, ala so ayeke mu na mbi kobe na ngu, bongo so a sara na kua ti tere ti taba na bongo ti *len, mafuta nga na samba.’

⁸ “Ndani laa mbi KOTA GBIA, mbi yeke kanga lege ti lo na akamba ti ki, mbi yeke sara mbeni gbagba ti kanga na lege ni; fade lo yeke kiri ti wara lege ti lo ti hon daa pepe.

⁹ Lo yeke tumba peko ti andeko ti lo, me lo yeke tumba peko ti ala gbaa; lo yeke gi ala, me lo yeke wara ala pepe. Na pekoni, lo yeke tene: ‘Fade mbi yeke kiri na kozo koli ti mbi, ngbanga ti so mbi yeke duti lani nzoni mingi ahon ti fadeso.’

¹⁰ “Me wali ni ahinga ti lo pepe, atene, mbi laa mbi yeke mu na lo lani ale ti *ble, fini vin na nzoni mafuta; mbi yeke mu na lo gba ti nginza na lôro, me lo mu ni na *sandaga na Baal.

¹¹ Ndani laa, na ngoi ti fango ale ti kobe, fade mbi yeke ga ti zi na maboko ti lo aye so kue mbi mu na lo: ale ti ble na fini vin; mbi yeke zi na tere ti lo bongo so a sara na kua ti tere ti taba, na bongo ti len so ahonde fade tere ti lo so ayeke ndumbu so.

¹² Fadeso, mbi yeke fa tere ti lo so angba ndumbu so na le ti andeko ti lo; zo oko ti zi lo na maboko ti mbi ayeke daa pepe.

¹³ Fade mbi yeke sara titene ngia ti lo, amatanga ti lo, amatanga ti lo ti fini nze, alango ti lo ti wungo tere nga na akota matanga ti lo akai.

¹⁴ Mbi yeke buba akeke ti vinye ti lo nga na akeke ti fige ti lo so lo yeke tene tënë ni lani, lo tene: ‘So futa ti mbi so andeko ti mbi amu na mbi laa.’ Mbi yeke sara si ayaka ni aga gbako si aga kobe ti anyama ti ngonda.

¹⁵ Mbi yeke ga ti kiri peko ti sioni na lo ndali ti ye so lo sara na ngoi so lo yeke zö dukani na anzapa *Baal, lo yeke yu bage na aye ti mê na aye ti go si lo yeke kpe na peko ti andeko ti lo ni; me ti mbi, be ti lo ayeke girisa na mbi. – So tënë ti yanga ti KOTA GBIA laa.

¹⁶ Tongaso, mbi yeke sara kue ti woko be ti lo, mbi yeke gue na lo na benyama si mbi yeke tene anzoni tënë na lo titene be ti lo ade.

¹⁷ Kâ, mbi yeke kiri na lo ayaka ti vinye ti lo, mbi yeke sara si popo-hoto ti Akor, – popo-hoto ti ye ti vundu so – aga tongana mbeni lege so lo yeke hon daa ti wara ye so lo zia be ti lo ti ku. Kâ, lo yeke ma yanga ti mbi tongana ti so lo sara na ndembe so lo de maseka, tongana ti so lo sara na ngoi so lo sigigi na sese ti Ezipte.”

Lango ti lekengo songo

¹⁸ “Na lango ni so, fade mo yeke iri mbi: ‘koli ti mbi’, – so tënë ti yanga ti *KOTA GBIA laa – mo yeke kiri ti iri mbi pepe: ‘baal ti mbi, wa ti mbi’.

¹⁹ Mbi yeke zi iri ti anzapa *Baal na yanga ti lo si azo ayeke kiri ti dabe ti ala na iri ni so pepe.

²⁰ Na lango ni so, ndali ti azo ti mbi, fade mbi yeke sara mbuki na anyama ti ngonda, andeke ti nduzu, anyama so ayeke hara harango na sese. Mbi yeke zi kokora, yongoro zeme na aye ti bira na ya ti kodro ni; mbi yeke sara titene azo ti kodro ni alango kpoo.

²¹ Fade mo yeke duti wali so mbi mu mo titene mo ga wali ti mbi kpu na kpu. Ye so mbi yeke ka na peko ti mo ayeke ye ti mbirimbiri nga na ndia, yengo tere nga na nzoni be.

²² Biani, ye so mbi yeke ka na peko ti mo ayeke batango tënë ti yanga ti mbi. Tongaso fade mo yeke hinga so mbi yeke KOTA GBIA.

²³ Na lango ni so, fade mbi yeke sara ye so a hunda na mbi, so tënë ti yanga ti KOTA GBIA laa. Fade mbi yeke sara ye so le ti nduzu ayeke ku na mbage ti mbi si le ti nduzu ayeke sara ye so sese ayeke ku na mbage ti lo.

²⁴ Ti sese, fade lo yeke sara ye so le ti ble, fini vin na nzoni mafuta ayeke ku na mbage ti lo si ti akobe ni so, ala yeke sara ye so popo-hoto ti Yizreel ayeke ku na mbage ti ala.

²⁵ Na ya ti kodro ni, fade mbi yeke sara si popo-hoto ti Yizreel aga mbeni ndo so mbi yeke lu ale ti kobe daa. Mbi yeke ye Lo-Ruhama si mbi yeke tene na Lo-Ami: ‘Mo yeke mara ti mbi’, ti lo, lo yeke tene na mbi: ‘Nzapa ti mbi!’ ”