Néhémie 8 - Mbeti ti Nzapa - Tënë so amu fini

¹ Azo ti Israel abongbi tere ti ala tongana zo oko na Jérusalem na kota le ti kodro so abaa le na yanga ti gbagba so iri ni Ti-ngu. Ala hunda na Esdras, wafango-ndia titene lo ga na mbeti ti *Ndia so *KOTA GBIA amu ando na azo ti Israel na lege ti Moïse.

² Wayango-sandaga Esdras aga na mbeti ti Ndia ni na gbe ti bongbi ti azo ni. Akoli, awali na azo so kue alingbi ti ma ya ti mbeni tënë nzoni, abongbi na ndo so. Ye ni ayeke na kozo lango ti nze mbarambara ni.

³ Ti londo na kota ndaperere ngbii asi na bekombite, Esdras aluti na kota le ti kodro so abaa le na yanga ti gbagba so iri ni Ti-ngu; lo diko mbeti ti Ndia ni na akoli, na awali nga na azo so kue alingbi ti ma ya ni. Azo ni kue aduti kpoo ti ma tënë ti Ndia so a yeke diko ni so.

⁴ Wafango-ndia Esdras aluti na ndö ti mbeni ye so a leke na nduzu na keke ndali ti bongbi ni. Matitia, Shema, Anaya, Uria, Hilkia na Maaseya aluti na tere ti lo, na mbage ti maboko ti lo ti koli; Pedaya, Mikael, Malkia, Hashum, Hashebadana, Zakarii na Meshulam aluti na tere ti lo, na mbage ti maboko ti lo ti wali.

⁵ Esdras aluti na nduzu ahon azo ni kue; azo ni kue alingbi ti baa lo nzoni. So lo zi le ti mbeti ni na le ti azo kue, ala kue alondo na nduzu.

⁶ Esdras amu singila na KOTA GBIA, lo so lo yeke kota Nzapa. Azo kue ayo maboko ti ala na nduzu si ala tene: “Amen, Amen!” Na pekoni, ala kuku, akpo li ti ala na sese ti voro KOTA GBIA.

⁷ Na pekoni, ala londo, ala ngba na nduzu si azo ti mara ti Lévi Yeshua, Bani, Sherebia, Yamin, Akub, Shabetai, Hodia, Maaseya, Kelita, Azaria, Yozabad, Hanan na Pelaya ato nda ti fa nda ti Ndia na ala.

⁸ Ala diko Ndia ni na ya ti mbeti ti Ndia ti Nzapa; ala diko ni na legeni, ala fa nda ni polele titene zo oko oko ama ya ni.

⁹ So azo ni ama atënë ti ya ti mbeti ti Ndia ni, ala ti na toto. Ndani laa govoronere Néhémie, lo na wayango-sandaga Esdras, so lo yeke nga wafango-ndia, ala na azo ti mara ti Lévi so ayeke fa nda ti Ndia ni, atene na azo ni, atene: “Lango so ayeke lango so a zia ni nde ndali ti KOTA GBIA, Nzapa ti ala. Ngoi titene ala duti na mawa si ala toto laa pepe!”

¹⁰ Esdras akiri atene na azo ni: “Ala kiri na ndo ti ala. Ala gue, ate anzoni kobe, ala nyon anzerengo samba, ala mu ambeni kobe ni na azo so ayeke na ye pepe, ngbanga ti so a zia lango so nde ndali ti KOTA GBIA ti e. Ala sara vundu pepe, ngbanga ti so ngia so alondo na KOTA GBIA laa ayeke ngangu ti ala!”

¹¹ Azo ti mara ti Lévi ayeke sara nga titene be ti azo ni ade; ala tene: “Ala kai-oo! Lango so ayeke lango so a zia ni nde ndali ti KOTA GBIA. Ala sara vundu pepe!”

¹² Tongaso azo ni kue akiri na ndo ti ala titene ala te, ala nyon. Ala tokua ambeni kobe na azo so ayeke na ye pepe, ala sara ngia ahon ndoni, ngbanga ti so ala ma nda ti atënë so a diko na ala.

Matanga ti akpangba

¹³ Lango oko na pekoni, amakonzi ti asewa ti azuife, awayango-sandaga nga na azo ti mara ti Lévi abongbi na tere ti wafango-ndia Esdras ti manda atënë ti *Ndia nzoni.

¹⁴ Na ya ti mbeti ti Ndia so Nzapa amu na Moïse, ala wara mbeni ndo so a su daa atene, alingbi azo ti Israel alango na gbe ti akpangba na ndembe so ala yeke sara matanga ti Akpangba, na nze mbarambara ni.

¹⁵ Alingbi ala to mbela na tënë ni na ya ti agbata ti ala kue nga na Jérusalem, ala tene: “Ala, azo ti Israel, ala gue na li ti ahoto; ala fâ amaboko ti keke ti olive ti ngonda na ti so a lu ni lungo, amaboko ti keke ti mirte, ti mburu, amaboko ti akeke so kugbe ni ayeke gbani gbani, ala sara na akpangba, alingbi na tënë so a su na ya ti mbeti ti Ndia.”

¹⁶ Tongaso azo ti Israel ague, afâ amaboko ti keke ti sara na akpangba. Ambeni asara ti ala kpangba ni na li ti ada ti ala, ambeni na ya ti gbagba ti ala wani, ambeni na ya ti gbagba ti kota da ti Nzapa, ambeni na kota ndo so ayeke na yanga ti gbagba so iri ni Ti-ngu si ambeni na kota ndo so ayeke na yanga ti gbagba so iri ni Ti-Efraim.

¹⁷ Azo so kue abongbi kâ, ala so alondo na kodro wande, na ndo so a gbu ala lani si a gue na ala daa si ala kiri so, ala sara akpangba si aduti na gbe ni. So ayeke ngoi so azo asara ngia mingi, ngbanga ti so, ti londo na ngoi ti Josué, molenge ti Nune, ngbii asi na lango so, azo ti Israel akiri asara matanga ti Akpangba pepe.

¹⁸ Na ya ti alango ni so oko oko kue, ti londo na kozo lango ti matanga ni ngbii asi na ndangba lango ni, mbeni zo ayeke diko mbeti ti Ndia ti Nzapa. Matanga ni asara lango mbarambara. Na lango miombe ni, ala sara mbeni kota bongbi ti hunzi na matanga ni tongana ti so ndia afa.