Néhémie 5 - Mbeti ti Nzapa - Tënë so amu fini

Néhémie akanga lege na azo ti sarango ngangu na awayere

¹ Mbeni lâ, kota demango tere alondo na popo ti azo na awali ti ala ndali ti sarango ye ti ambeni ita ti ala, azuife.

² Ambeni atene: “E na amolenge ti e ti koli na ti wali, e yeke mingi. E ye ti wara *ble ti te si e ngba na fini.”

³ Ambeni atene nga: “Na ndembe so nzara ahon ndö ti e si e ye ti wara ble, alingbi e zia ayaka ti e, ayaka ti *vinye ti e nga na ada ti e na ambeni zo si ala mu ni na e.”

⁴ Ambeni nga atene: “Titene e wara nginza ti futa na lapo ti gbia, e yeke mu ayaka ti e nga na ayaka ti vinye ti e na boon na ambeni zo.

⁵ Andaa e na azo ni kue, e yeke mara oko! Amolenge ti e na amolenge ti ala ayeke legeoko! Me ti e, a gbu e na ngangu titene e mu amolenge ti e ti koli na ti wali na ngbaa; ambeni molenge ti e ti wali aga nga angbaa ni awe. E yeke wara ti e ngangu na ndo wa ti kanga lege na ye ni, so ayaka ti e nga na ayaka ti vinye ti e aga ti azo ni awe so!”

⁶ So mbi ma tënë so nga na demango tere ti ala ni, ngonzo agbu mbi mingi.

⁷ Tongaso mbi leke na be ti mbi ti suku na akota zo nga na amakonzi. Mbi tene na ala, mbi tene: “Ala yeke sara boon na a-ita ti ala si ala yeke hunda titene a-ita ti ala ni azia mbeni ye na ndö ni si akiri na ni na ala?” Na pekoni, mbi tisa azo ni na ya ti mbeni kota bongbi.

⁸ Mbi tene na ala: “A-ita ti e azuife so a ka ala lani na amara nde, e laa e kiri e vo ala alingbi na nginza so e yeke na ni. Fadeso ala laa akiri ayeke ka a-ita ti ala? Ala ye ti ka ala taa na e amba ti ala, amolenge ti kodro?” Yanga ti ala ade sui, zo oko akiri azi yanga pepe.

⁹ Mbi tene na ala: “Ye so ala yeke sara so ayeke nzoni pepe. Ayeke fade nzoni titene ala duti na kpengo mbeto ti Nzapa ti e; tongaso si azo ti amara nde so ayeke awato ti e awara lege pepe ti zonga e!

¹⁰ Mbi nga, mbi na a-ita ti mbi, na azo ti mbi, e sara lani boon ti nginza na ti ble na azo ni. Fade e yeke zi yongo ni na li ti ala.

¹¹ Gi laso laso, ayeke nzoni ala kiri na azo ni ayaka ti ala, ayaka ti vinye ti ala, ayaka ti a-olive ti ala nga na ada ti ala. Ataa nginza, ble, fini vin na mafuta so ala sara boon ni na azo ni titene azo ni azia mbeni ye na ndö ni si akiri na ni na ala, ayeke nzoni ala kiri ahunda ni pepe.”

¹² Azo ni akiri tënë: “Fade e yeke sara ye so mo hunda na e so. Aye so lani e mu na maboko ti azo ni so, fade e yeke kiri ni na ala; e yeke kiri ti hunda ye na maboko ti ala pepe.” Tongaso mbi iri awayango-sandaga; na le ti ala, mbi hunda na azo so boon ti amba ti ala angba na li ti ala titene ala deba yanga ti ala ti sara ye alingbi na zendo so ala mu.

¹³ Na pekoni, mbi yingi yanga ti kota bongo ti mbi si mbi tene: “Zo so kue ayeke sara ye alingbi na tënë ti yanga ti lo pepe, ayeke nzoni Nzapa ayingi lo legeoko tongaso. Ayeke nzoni Nzapa azi lo na ya ti da ti lo nga amosoro ti zo ni!” – Bongbi ti azo ni kue atene: “Amen! Ayeke nzoni ye ni aduti tongaso!” Ala kue asepela *KOTA GBIA si na pekoni, ala sara ye alingbi na tënë ti yanga ti ala.

¹⁴ A mu mbi ti duti govoronere ti sese ti Juda na ngoi so Artakzerses ayeke gbia, ti londo na ngu baleuse ni ngbii asi na ngu baleota na use ni. Na ya ti ngu baleoko na use so, ataa mbi, ataa a-ita ti mbi, laoko e mu nginza ti lapo ti govoronere ti te na kobe pepe.

¹⁵ Agovoronere so ayeke lani kozoni na mbi ayeke zia anengo kungba na ndö ti azo. Ala yeke hunda gi kobe na vin na maboko ti azo ni pepe, me ala yeke hunda nga titene azo ni azia ale ti nginza baleosio na ndö ni. Ataa azo ti kua ti agovoronere ni asara ngangu mingi na azo ni. Me mbi, mbi sara tongaso pepe, ngbanga ti so mbi kpe mbeto ti Nzapa.

¹⁶ Mbi wani, mbi sara kua ti lekengo gbagba so; mbi vo sese oko pepe. Azo ti mbi so kue asara kua ti lekengo gbagba ni avo nga mbeni sese pepe.

¹⁷ Azuife na amakonzi so ayeke te kobe na mbi, wungo ti ala ayeke ngbangbo oko na baleoku; ala so alondo na popo ti amara so angoro e si aga, a diko wungo ti ala pepe.

¹⁸ Lâ oko oko, a yeke fâ bagara oko, ataba omene ti nzoni ni na akondo. Lakue na peko ti lango baleoko, azo ayeke ga na mbi gba ti vin. Aye so kue, mbi vo ni na nginza ti mbi wani. Ataa so kue, mbi hunda nginza ti lapo ti govoronere pepe, ngbanga ti so kua ti gbagba ane na ndö ti azo awe.

¹⁹ “Ae Nzapa ti mbi, mo dabe ti mo na ye so kue mbi sara ndali ti azo so! Mo sara nzoni be na mbi!”