Néhémie 3 - Mbeti ti Nzapa - Tënë so amu fini

Azuife akiri aleke agbagba ti Jérusalem

¹ Kota wayango-sandaga Eliashib alondo ti gbu kua ni, lo na amba ti lo awayango-sandaga. Ala kiri aleke yanga ti gbagba so iri ni Ti-ataba. So ala zia ayanga ti gbagba ni daa awe, ala zia ni nde ndali ti Nzapa. Na pekoni, ala kiri aleke gbagba ni ague ngbii asi na tere ti kota da so ayo na nduzu so iri ni Ngbangbo. Ala zia nga ni nde ndali ti Nzapa. Ala hon ala si na kota da ti Hananeel so ayo na nduzu.

² Na tere ti Eliashib, azo ti gbata ti Jéricho ayeke sara ti ala kua ni; na tere ti ala, Zakur, molenge ti Imri ayeke sara ti lo kua ni.

³ Azo ti Senaa asara yanga ti gbagba so iri ni Ti-asusu. Ala leke akadere ni si ala zia ale ti kadere ni daa, na angbongboro wen ti kangango na ni nga na akerere ni.

⁴ Na tere ti ala Meremot, molenge ti Uria, molenge ti Hakos ayeke sara ti lo kua ni. Na tere ti ala Meshulam, molenge ti Berekia, molenge ti Meshezabel ayeke sara ti lo kua ni; na tere ti ala Sadok, molenge ti Baana ayeke sara ti lo kua ni.

⁵ Na pekoni, ayeke azo ti gbata ti Tekoa. Me akota zo ti ala ake ti sara kua na gbe ti azo so a zia ala na li ti akua ni.

⁶ Yoyada, molenge ti Pasea, lo na Meshulam, molenge ti Besodia asara ti ala yanga ti gbagba so iri ni Ti-Yeshana. So ala leke akadere ni awe, ala zia ale ti kadere ni daa, angbongboro wen ti kangango na ni nga na akerere ni.

⁷ Na tere ti ala, Melatia, zo ti gbata ti Gabaon, lo na Yadon, zo ti Meronot, ala na ambeni koli ti Gabaon na ti Mispa ayeke sara ti ala kua ni; ala sara kua ni na iri ti govoronere so ayeke na Do ti ngu ti Efrate.

⁸ Na tere ti ala, Uziel, molenge ti Haraya, zo ti lekengo aye na lôro ayeke sara ti lo kua ni. Na tere ti Haraya ayeke Hanania, zo ti sarango ayombo. Ala hunzi kua ti ala na Jérusalem si ala si na ndo so le ti gbagba ni akono daa.

⁹ Na tere ti ala, Refaya, molenge ti Hur, makonzi ti ndambo ti kete sese so ayeke na tere ti Jérusalem.

¹⁰ Na tere ti ala, Yedaya, molenge ti Harumaf; lo yeke sara ti lo kua ni na mbeni ndo so abaa le na da ti lo wani. Na tere ti lo, Hatush, molenge ti Hashabeneya ayeke sara ti lo kua ni.

¹¹ Malkia, molenge ti Harim na Hashub, molenge ti Pahat-Moab ayeke sara ti ala kua ni na kota da so ayo na nduzu so iri ni Ti-afur.

¹² Na tere ti ala, Shalum, molenge ti Halohesh, makonzi ti ndambo ti kete sese so ayeke na tere ti Jérusalem ayeke sara ti lo kua ni. Amolenge ti lo ti wali ayeke mu na lo maboko na kua ni.

¹³ Hanun na azo ti gbata ti Zanoa ayeke leke yanga ti gbagba so iri ni Ti-popo-hoto. So ala leke yanga ti gbagba ni awe, ala zia ale ni daa, na angbongboro wen ti kangango na ni nga na akerere ni. Ala kiri aleke gbagba so yongoro ni ayeke metere ngbangbo oku; ala gue na ni ngbii asi na yanga ti gbagba so iri ni Ti-puru.

¹⁴ Malkia, molenge ti Rekab, makonzi ti kete sese ti Bet-Kerem asara yanga ti gbagba so iri ni Ti-puru. So Malkia aleke yanga ti gbagba ni awe, lo zia ale ni daa, na angbongboro wen ti kangango na ni nga na akerere ni.

¹⁵ Shalun, molenge ti Kol-Hoze, makonzi ti kete sese ti Mispa asara yanga ti gbagba so iri ni Ti-li-ti-ngu. So lo sara yanga ti gbagba ni awe, lo sara li ni daa; lo zia ale ti yanga ti gbagba ni daa, na angbongboro wen ti kangango na ni nga na akerere ni. Lo leke nga gbagba so ayeke nduru na *lende ti Siloe, na popo ti pendere ndo ti gbia so a lu akongo daa nga na eskalie so alondo na Gbata ti David ti zu na gbeni.

¹⁶ Na peko ti Shalun kâ, Néhémie, molenge ti Azbuk, makonzi ti kete sese ti Bet-Sur, ayeke sara ti lo kua ni ti gue na ni na tere ti du ti kuâ ti David; lo gue na ni ngbii lo si na lende so azo laa azi ni, ngbii lo si na tere ti da ti aturugu ti batango gbia.

¹⁷ Na peko ti Néhémie kâ, azo ti mara ti Lévi laa ayeke sara ti ala kua ni: Rehum, molenge ti Bani; na tere ti Rehum ayeke Hashabia, makonzi ti ndambo ti kete sese ti Keila; lo yeke sara kua ni na iri ti azo ti kete sese ti lo.

¹⁸ Na peko ti lo kâ, a-ita ti ala ayeke sara ti ala kua ni: Binui, molenge ti Henadad, makonzi ti mbeni mbage ti kete sese ti Keila;

¹⁹ na tere ti lo ayeke Ezer, molenge ti Yeshua, makonzi ti gbata ti Mispa; lo yeke leke gbagba ni na ndo so abaa le na da ti batango aye ti bira, na ndo so gbagba ni asi daa si angoro ti gue.

²⁰ Na peko ti lo kâ, Baruk, molenge ti Zabai ayeke sara ti lo kua ni na be ti lo kue; lo leke mbeni ndo ni, ti londo na ndo so gbagba ni asi daa si angoro ti gue, ngbii asi na tere ti da ti kota wayango-sandaga Eliashib.

²¹ Na peko ti lo kâ ayeke Meremot, molenge ti Uria; Uria ayeke molenge ti Hakos. Meremot ayeke sara ti lo kua ni, ti londo na yanga ti da ti Eliashib ngbii asi na ndo so da ti Eliashib ahunzi daa.

²² Na peko ti lo kâ, awayango-sandaga so alondo na ando so angoro Jérusalem si aga ayeke sara ti ala kua ni.

²³ Na peko ti ala kâ, Benjamin na Hashub ayeke leke mbeni ndo ni na ndo so abaa le na da ti ala wani; na peko ti ala, Azaria, molenge ti Maaseya, molenge ti Anania, ayeke leke ti lo gbagba ni nduru na da ti lo wani.

²⁴ Na peko ti ala kâ, Binui, molenge ti Henadad, ayeke leke mbeni ndo ni, ti londo na da ti Azaria ngbii asi na ndo so gbagba ni asi daa si angoro ti gue; ague ngbii asi na ndangoro ti gbagba ni.

²⁵ Palal, molenge ti Uzai ayeke sara ti lo kua ni, ti londo na ndo so gbagba ni asi daa si angoro nga na da so ayo na nduzu ti yangbo ti gbia so ayeke na mbage ti nduzu, nduru na gbagba ti aturugu ti batango gbia. Na peko ti Palal kâ, Pedaya, molenge ti Parosh,

²⁶ lo na azo ti kua ti kota da ti Nzapa so ayeke lango na vaka ti Ofel ayeke leke ti ala gbagba ni ti gue na ni ngbii ti si na yanga ti gbagba so iri ni Ti-ngu, na mbage ti To nga ti si na da so ayo na nduzu si asigigi na tere ti gbagba ni.

²⁷ Na peko ti ala kâ, azo ti gbata ti Tekoa ayeke leke mbeni ndo ni, ti londo na ndo so abaa le na kota da so ayo na nduzu si asigigi na ya ti gbagba ni; ala leke ni ngbii asi na gbagba ti Ofel.

²⁸ Ti londo na yanga ti gbagba so iri ni Ti-ambarata ti gue na ni, awayango-sandaga ayeke leke ti ala gbagba ni; zo oko oko ayeke sara kua ni na ndo so abaa le na da ti lo wani.

²⁹ Na peko ti ala kâ, Sadok, molenge ti Imer ayeke sara ti lo kua ni na ndo so abaa le na da ti lo wani. Na peko ti Sadok kâ, Shemaya, molenge ti Shekania, sanziri ti yanga ti gbagba ti mbage ti To.

³⁰ Na peko ti lo kâ, Hanania, molenge ti Shelemia, lo na Hanun, omene molenge ti Salaf ayeke leke mbeni ndo ni. Na peko ti ala, Meshulam, molenge ti Berekia ayeke leke gbagba ni na ndo so abaa le na ndo ti lango ti lo.

³¹ Na peko ti Meshulam kâ, Malkia, zo ti lekengo aye na lôro ayeke sara ti lo kua ni ti gue na ni ngbii ti si na da ti azo ti sarango kua ti kota da ti Nzapa na ti azo ti dengo buze, na ndo so abaa le na yanga ti gbagba ti Mifkad. Lo yeke sara nga kua ni ngbii ti si na ndo so asanziri ayeke duti daa na ndangoro ti gbagba ni.

³² Ambeni zo ti lekengo aye na lôro, ala na azo ti dengo buze ni ayeke sara ti ala kua ni na tanga ti ndo ni so ayeke na popo ti ndo so asanziri ayeke duti daa nga na yanga ti gbagba so iri ni Ti-ataba.

Awato aye ti kanga lege na kua ni

³³ So Sanebalat ama a tene, e kiri e yeke leke gbagba ni, ngonzo agbu lo, be ti lo aso mingi. Lo he e azuife na ngia

³⁴ si lo tene na le ti a-ita ti lo nga na le ti aturugu ti Samarii, lo tene: “Nyen laa azuife so awoko ngbii so aye ti sara so? Ala yeke wara ande lege ti hunzi kua ti ala ni si ala mu *sandaga na Nzapa ti ala ma? Ala yeke hunzi kua ni laso laa ma? Atêne so alango na gbe ti gba ti azende si wâ agbi ni awe so, fade ala yeke kiri ti sara na kua?”

³⁵ Tobia, zo ti mara ti Amon ayeke na tere ti Sanebalat; lo tene: “Zia ala leke gbagba ni na têne senge! Tongana mbeni nyama ti gbungo kondo ako na ndö ni, fade gbagba so kue ayeke tuku na sese!”

³⁶ Tongaso mbi sambela, mbi tene: “Nzapa ti e, mo ma! Awato ti e abaa e tongana abuba zo! Mo sara si hengo ndo ti ala ni akiri na li ti ala wani. Mo sara si azo agbu aye ti ala kue na ya ti mbeni kodro so a gbu ala si a gue na ala daa.

³⁷ Mo zi siokpari na li ti ala pepe, mo sara si siokpari ti ala ahon na le ti mo pepe. Biani, ala zonga e taa na le ti e, ngbanga ti so e kiri e yeke leke gbagba ti gbata ni.”

³⁸ Lege so e kiri e leke gbagba ni laa; e leke ni ngbii asi na ndambo ti yongo ni na nduzu, ngbanga ti so azo kue azia be ti ala na kua ni.