Néhémie 13 - Mbeti ti Nzapa - Tënë so amu fini

Néhémie aleke aye si akiri aga nzoni

¹ Na ngoi ni so, a diko mbeti ti Moïse na le ti azo kue si na ya ni, a wara mbeni tënë so atene, fade zo ti mara ti Amon na ti Moab ayeke li laoko pepe na ya ti bongbi ti azo ti Nzapa.

² Biani, ando ala yamba azo ti Israel pepe na mungo na ala kobe na ngu. Azo ti mara ti Moab amu nginza na Balaam titene lo deba azo ti Israel. Me Nzapa ti e asara si tënë ti deba ni akiri aga tufa na ndö ti azo ti Israel.

³ So azo ti Israel ama tënë ti ndia so awe, ala tumba azo ti amara nde nde so kue ayeke na ya ti bongbi ti ala.

⁴ Kozoni si ye so asi, a soro wayango-sandaga Eliashib titene lo baa ndo na ndö ti ada so ayeke na ya ti gbagba ti kota da ti Nzapa ti e; Eliashib ayeke zo ti sewa ti Tobia.

⁵ Eliashib amu na Tobia mbeni kota kubu so a yeke bata na ya ni *asandaga ti ale ti kobe, dukani na agbakuru nde nde ti kota da ti Nzapa, na asandaga so a yeke mu na awayango-sandaga, *adime ti ble, ti fini vin na ti mafuta; adime ti aye so a bata ndali ti azo ti mara ti Lévi, azo ti hengo bia na azo ti batango yanga ti gbagba.

⁶ Na ngoi so aye so asi, mbi yeke na Jérusalem pepe. Na ngu baleota na use ni so Artakzerses ayeke gbia ti Babilone, mbi kiri na tere ti lo. Ngu mingi na pekoni, mbi hunda na gbia ti mu lege na mbi

⁷ ti kiri na Jérusalem. So mbi kiri awe, mbi ma tënë ti sioni ye so Eliashib asara: lo mu mbeni kota kubu ti ya ti gbagba ti kota da ti Nzapa na Tobia.

⁸ Ngonzo asara mbi mingi si mbi mu agbakuru ti Tobia so ayeke na ya ti kubu ni, mbi tuku na gigi.

⁹ Na pekoni, mbi mu yanga titene a sukula ya ti kubu ni si a kiri na akungba ti ya ti kota da ti Nzapa, asandaga na dukani.

¹⁰ Mbi ma nga atene, azo ti mara ti Lévi na azo ti hengo bia so ayeke sara kua ti KOTA GBIA ade ti wara ti ala asandaga so azo alingbi fade ti mu na ala so pepe. Ndani laa, zo oko oko akiri ti fâ yaka ti lo.

¹¹ Mbi suku na amakonzi, mbi tene: “Azo ado kota da ti Nzapa azia ngbanga ti nyen?” Na pekoni, mbi iri azo ti mara ti Lévi na azo ti hengo bia si mbi kiri ala na kua ti ala.

¹² Tongaso azuife ato nda ti ga na adime ti ble, ti fini vin na ti mafuta ti zia na ya ti ada so a leke ti bata aye ni so daa.

¹³ Mbi mu Shelemia, wayango-sandaga, lo na Sadok, wafango-ndia nga na Pedaya, zo ti mara ti Lévi, mbi zia ala ti bata ada ni. Mbi soro Hanan, molenge ti Zakur, molenge ti Matania, mbi zia lo na tere ti ala ti mu maboko na ala. A baa ala tongana azo so zo alingbi ti zia be ti lo na ndö ti ala. A mu ala titene ala laa akangbi aye na a-ita ti ala.

¹⁴ “Nzapa ti mbi, mo dabe ti mo na mbi ndali ti aye so kue! Be ti mo agirisa pepe na anzoni kua so mbi sara ndali ti kota da ti mo nga ndali ti vorongo mo!”

¹⁵ Na ngoi ni so, mbi baa so na sese ti Juda, ambeni zo ayeke pete ale ti *vinye na ya ti du so a leke ti pete ale ti vinye daa; ala yeke pete ale ti vinye ni na *lango ti wungo tere. Ambeni akanga gba ti ale ti kobe na ndö ti alele, vin, ale ti vinye, fige na ambeni ye nde nde si ala yeke gue na ni na Jérusalem na lango ti wungo tere. Mbi gboto mê ti ala na lango so ala yeke ka akungba ti ala ni.

¹⁶ Azo ti Tir so alango na Jérusalem ayeke nga daa. Ala yeke ga na asusu na akungba nde nde ti ka ni na lango ti wungo tere na azo ti Juda nga na azo ti Jérusalem.

¹⁷ Mbi suku na akota zo ti sese ti Juda, mbi tene: “Ala baa sioni ye so ala yeke sara so? Ala sara si lango ti wungo tere aga sioni!

¹⁸ Akotara ti ala asara ando gi tongaso. Ndani laa Nzapa ti e asara si akpale so kue aga na ndö ti e nga na gbata ti e. Ti ala, na sarango titene lango ti wungo tere aga sioni, ala yeke sara titene ngonzo ti Nzapa akiri alondo ngangu na tere ti azo ti Israel”.

¹⁹ Biaku, mbi mu yanga titene a kanga ayanga ti gbagba ti Jérusalem na lakui, kozo titene lango ti wungo tere ato nda ni. Mbi mu nga yanga titene a zi ayanga ti gbagba ni pepe tongana lango ti wungo tere ade ti hunzi pepe. Mbi zia ambeni zo ti kua ti mbi ti bata ayanga ti gbagba ni si mbeni zo ali na kungba pepe na ya ti gbagba ni na lango ti wungo tere.

²⁰ Fani oko wala fani use, ambeni zo ti dengo buze na ambeni zo ti kango aye nde nde alango na gigi ti gbagba ti Jérusalem na lango ti wungo tere.

²¹ Mbi gboto mê ti ala, mbi tene: “Ngbanga ti nyen si ala lango na dawa ti gbagba ti Jérusalem? Tongana ala kiri asara ni, fade mbi yeke gbu ala!” Ti londo na ngoi ni so, ala kiri aga na ndo so na lango ti wungo tere pepe.

²² Mbi mu nga yanga na azo ti mara ti Lévi titene ala *sukula asioni na tere ti ala si ala gue ti bata ayanga ti gbagba ni, tongaso si azo abaa lango ti wungo tere tongana lango so a zia nde ndali ti Nzapa. “Nzapa ti mbi, mo dabe ti mo na mbi ndali ti aye so nga! Mo so mo yeke nzoni mingi, mo baa mawa ti mbi!”

²³ Na ngoi ni so nga, mbi baa so ambeni zuife amu awali ti mara ti Asdod, ti Amon na ti Moab ti ga wali ti ala.

²⁴ Ndambo ti amolenge ti ala ayeke tene yanga ti kodro ti azo ti mara ti Asdod. Ambeni ayeke tene mbeni yanga ti kodro nde; me mbeni molenge oko ti tene yanga ti kodro ti azuife ayeke daa pepe.

²⁵ Mbi suku na azuife ni si mbi deba ala. Mbi pika ambeni zo na popo ti ala si mbi gboto kua ti li ti ala. Na pekoni, mbi tene na ala ti deba yanga ti ala na iri ti Nzapa ti kiri ti mu amolenge ti ala ti wali pepe na awande. Ala nga, alingbi ala mu awali wande pepe ti ga wali ti ala wani wala ti amolenge ti ala ti koli.

²⁶ Mbi tene na ala, mbi tene: “Ndali ti mungo awali wande laa Salomon, gbia ti azo ti Israel, asara siokpari pepe? Na popo ti amara mingi, mbeni gbia ti lingbi na lo ayeke daa pepe. Nzapa ti lo aye lo si amu lo ti ga gbia ti Israel kue. Andaa awali wande asara si Salomon ati na ya ti siokpari.

²⁷ Titene ala sara kota sioni tongaso ti ke KOTA GBIA na mungo awali wande ti ga wali ti ala so, e ye ti ma so mbeni pepe!”

²⁸ Mbeni molenge oko ti Yoyada, tara ti kota wayango-sandaga Eliashib amu molenge ti Sanebalat, zo ti gbata ti Horon, ti ga wali ti lo. Ndani laa, mbi tumba lo ti londo na Jérusalem.

²⁹ “Nzapa ti mbi, dabe ti mo lakue so azo asara si kua ti awayango-sandaga aga sioni! Ala sara nga si *mbuki ti mo na awayango-sandaga na azo ti mara ti Lévi aga sioni!”

³⁰ Fade mbi yeke zi azo ni na ya ti asioni ye ti awande kue. Mbi yeke kiri ti fa lege ti kua ti awayango-sandaga na ti azo ti mara ti Lévi.

³¹ Mbi yeke kiri ti fa lege so azo ayeke ga na asandaga ti keke na ngoi so a diko; ala yeke ga nga na akozo le ti kobe. “Nzapa ti mbi, mo dabe ti mo na mbi, mo sara nzoni be na mbi.”