Néhémie 10 - Mbeti ti Nzapa - Tënë so amu fini

Azo ti Israel adeba yanga ti sara ye na lege ti ndia

¹ Ndali ti aye so kue asi na e, e azo ti Israel, e bongbi yanga ti e oko, e ma tere; e su tënë ni na mbeti. Amakonzi ti e, azo ti e so ayeke azo ti mara ti Lévi, awayango-sandaga ti e asu maboko ti ala na gbe ti mbeti so a kpo nzoroko daa so.

² Iri ti azo so asu maboko ti ala na gbe ti mbeti ni ayeke so: – Govoronere Néhémie, molenge ti Hakalia. – Sidekia,

³ Seraya, Azaria, Irmeya,

⁴ Pashehur, Amaria, Malkia,

⁵ Hatush, Shebania, Maluk,

⁶ Harim, Meremot, Obadia,

⁷ Daniel, Gineton, Baruk,

⁸ Meshulam, Abia, Miamin,

⁹ Maazia, Bilgai na Shemaya. Azo so kue ayeke awayango-sandaga.

¹⁰ – Azo ti mara ti Lévi: Yeshua, molenge ti Azania, Binui, zo ti kete mara ti Henadad, Kadmiel

¹¹ na a-ita ti ala Shebania, Hodia, Kelita, Pelaya, Hanan,

¹² Mika, Rehob, Hashabia,

¹³ Zakur, Sherebia, Shebania,

¹⁴ Hodia, Bani na Beninu.

¹⁵ – Amakonzi ti amara: Parosh, Pahat-Moab, Elam, Zatu, Bani,

¹⁶ Buni, Azgad, Bebai,

¹⁷ Adonia, Bigvai, Adin,

¹⁸ Ater, Hizkia, Azur,

¹⁹ Hodia, Hashum, Besai,

²⁰ Harif, Anatot, Nebai,

²¹ Magpiash, Meshulam, Hezir,

²² Meshezabel, Sadok, Yadua,

²³ Pelatia, Hanan, Anania,

²⁴ Osée, Hanania, Hashub,

²⁵ Halohesh, Pila, Shobek,

²⁶ Rehum, Hashabna, Maaseya,

²⁷ Ahia, Hanan, Anan,

²⁸ Maluk, Harim na Baana.

²⁹ – Tanga ti azo ni, awayango-sandaga, azo ti mara ti Lévi, asanziri, azo ti hengo bia na azo ti sarango kua ti kota da ti Nzapa, ala na azo so aduti nde na ambeni mara so angba lani na ya ti kodro ni si ala yeke sara ye alingbi na *Ndia ti Nzapa, azo ni kue, ala na awali ti ala na amolenge ti ala ti koli na ti wali, azo so kue alingbi ti ma nda ti tënë,

³⁰ ala kue abongbi na a-ita ti ala, akota zo. Ala mu zendo si ala deba yanga ti ala ti sara ye na lege ti Ndia ti *KOTA GBIA so lo mu na e na lege ti Moïse, zo ti kua ti lo. E deba yanga ti e ti bata na ti sara ye alingbi na atënë ti ndia kue, andia nga na atënë ti yanga ti KOTA GBIA Nzapa ti e.

³¹ Tongaso, e mu zendo e tene, fade e yeke mu amolenge ti e ti wali na azo ti kodro ni pepe ti ga awali ti ala. E yeke soro amolenge-wali ti azo ti kodro ni pepe ti mu na amolenge ti e ti koli.

³² Na *lango ti wungo tere, wala na mbeni lango ti matanga, tongana azo so aga na *ble, wala na akungba nde ti kango ni, fade e yeke vo ni na maboko ti ala pepe. Lakue na peko ti ngu mbarambara, fade e yeke zia sese awu tere, e yeke zi ayongo kue na li ti azo.

³³ E lu mbeni ndia ndali ti e wani, e tene, na ngu oko oko, fade e yeke mu le ti nginza grame osio titene a sara na kua ti kota da ti Nzapa ti e.

³⁴ Fade a yeke mu nginza so ti vo na mapa so a leke si a yeke zia na dawa ti Nzapa, *sandaga ti farini so a yeke mu na ya ti lango oko oko, sandaga so a yeke gbi ni kue na wâ na ya ti lango oko oko, sandaga so a yeke mu na lango ti wungo tere, sandaga so a yeke mu ni na lango ti fini nze wala na ambeni lango ti matanga, ambeni sandaga so a zia ni nde ndali ti Nzapa nga na sandaga so azo ti Israel ayeke mu titene Nzapa azi siokpari na li ti ala. A yeke mu nga nginza ni ti sara na akua kue ti kota da ti Nzapa ti e.

³⁵ E, awayango-sandaga, azo ti mara ti Lévi na tanga ti azo kue, e bi ye ti hinga ngoi so sewa ti e oko oko ayeke ga na keke ti wâ ti mu na sandaga ndali ti kota da ti Nzapa ti e. Na ngu oko oko, na ngoi so a diko ni, e yeke ga na keke ti wâ titene a gbi na sandaga na ndö ti gbalaka ti KOTA GBIA Nzapa ti e, tongana ti so Ndia afa.

³⁶ Na ngu oko oko nga, e yeke ga na akozo le ti kobe ti yaka ti e nga na akozo le ti keke ti e na ya ti kota da ti Nzapa.

³⁷ E yeke ga na akozo molenge ti e nga na akozo molenge ti anyama ti e, tongana ti so Ndia afa. E yeke ga nga na akozo molenge ti abagara ti e, akozo molenge ti ataba na ti angasa ti e na ya ti kota da ti Nzapa ti e; e yeke mu ala na awayango-sandaga so ayeke sara kua na ya ti kota da ti Nzapa.

³⁸ Fade e yeke mu nga na awayango-sandaga ni mbeni mbage ti nzoni farini ti e, nga na asandaga nde nde ti ale ti keke ti e, ti fini vin na ti mafuta. E yeke gue na aye ni so na ya ti ada so ayeke na ya ti gbagba ti kota da ti Nzapa. E yeke mu na azo ti mara ti Lévi *dime ti ale ti kobe ti yaka ti e. Azo ti mara ti Lévi ayeke gue ala wani ti mu adime ni na ya ti agbata so kue e yeke sara kua daa.

³⁹ Mbeni wayango-sandaga oko ti *hale ti Aaron ayeke duti na tere ti azo ti mara ti Lévi na ndembe so ala yeke gue ti mu dime ni. Azo ti mara ti Lévi ayeke ga na dime ti adime ni na ya ti da ti mosoro ti kota da ti Nzapa.

⁴⁰ Azo ti Israel na azo ti mara ti Lévi ayeke ga na sandaga ti ala ti ble, ti fini vin na ti mafuta na ya ti ada ti ya ti gbagba so ayeke bata ka akungba ti ndo so ayeke nde si ayeke nzoni kue daa. Na ndo ni so laa awayango-sandaga ayeke sara kua daa, ala na asanziri nga na azo ti hengo bia. Tongana e sara tongaso, fade e yeke zia kota da ti Nzapa senge pepe.