Matthieu 28 - Mbeti ti Nzapa - Tënë so amu fini

Jésus azingo na kuâ

¹ Na peko ti *lango ti wungo tere, na ndaperere ti layenga, Marie ti kodro ti Magdala na mbeni Marie ni aga ti baa du ti kuâ ni.

² Mo ye ti baa, sese ayingi ngangu mingi; *ange ti *Kota Gbia alondo na yayu azu na sese, lo pusu têne ti yanga ti du ni si lo duti na ndö ni.

³ Tere ti lo ayeke za tongana wâ ti bekpa si bongo ti lo avuru ahon ndoni.

⁴ Mbeto agbu aturugu ni si tere ti ala ado mingi, ala ga tongana azo so akui awe.

⁵ Me ange ni atene na awali ni: “Mbeto asara ala pepe; mbi hinga so ala yeke gi Jésus, lo so a fâ lo na ndö ti keke ti kroa.

⁶ Lo yeke na ndo so pepe, lo zingo na kuâ awe tongana ti so lo tene tënë ni lani. Ala ga, ala baa ndo so lani lo lango daa.

⁷ Ala gue hio atene na adisiple ti lo, atene: ‘Lo zingo na kuâ awe si lo hon kozo ti ala na Galile. Kâ laa ala yeke baa ande lo.’ Baa, tënë ni laa mbi tene na ala laa awe so.”

⁸ Awali ni alondo hio na yanga ti du ti kuâ ni, mbeto na ngia kue asi be ti ala si ala kpe, ague, atene tënë ni na adisiple ti Jésus.

⁹ Mo ye ti baa, Jésus aga atengbi na ala si lo tene na ala: “Mbi bara ala!” Ala ga nduru na tere ti lo, ala gbu gere ti lo si ala kuku na gbe ti lo.

¹⁰ Tongaso Jésus atene na ala: “Mbeto asara ala pepe. Ala gue, atene na a-ita ti mbi ti gue na Galile: kâ laa ala yeke baa ande mbi.”

Tënë so aturugu atene

¹¹ So awali ni ade na lege, ambeni turugu so abata du ti kuâ ni ague, ali na ya ti gbata si ala fa peko ti ye so asi so kue na akota wayango-sandaga.

¹² Akota wayango-sandaga ni na *akangba abongbi tere ti ala, ala ma tere si ala mu kota nginza na aturugu ni.

¹³ Ala tene na ala: “Ala tene na azo, atene: ‘Adisiple ti lo aga na bi, ala nzi kuâ ti lo ahon na ni na ndembe so e ngba ti lango.’

¹⁴ Tongana tënë ni asi na mê ti govoronere, fade e laa e yeke sara titene be ti lo ade si e yeke sara titene ala wara tënë pepe.”

¹⁵ Aturugu ni amu nginza ni si ala sara ye alingbi na tënë so a fa na ala. Nilaa tënë ti mvene so awu na popo ti azuife ngbii asi laso.

Jésus atokua adisiple ti lo

¹⁶ Adisiple baleoko na oko ague na Galile, na li ti hoto so Jésus ahunda na ala ti gue daa.

¹⁷ So ala baa lo, ala kuku na sese na gbe ti lo, me ambeni na popo ti ala adekite.

¹⁸ Jésus aga nduru na tere ti ala si lo tene na ala: “A mu na mbi ngangu kue na yayu nga na sese.

¹⁹ Tongaso, ala gue na ndo ti amara kue, ala sara si ala ga adisiple, ala batize ala na iri ti Babâ, ti Molenge na ti Yingo-Vuru;

²⁰ ala fa na ala ti bata lege ti aye so kue mbi mu yanga na ala. Baa, mbi yeke na ala lakue ngbii asi na ngoi ti ndani.”