Marc 7 - Mbeti ti Nzapa - Tënë so amu fini

Sarango ye na lege ti ndia ti akotara

¹ *Afarizien na ambeni wafango-ndia so alondo na Jérusalem aga, abongbi na tere ti Jésus.

² Ala baa so ambeni disiple ti lo ayeke mu *asioni maboko ti ala gi tongaso si ayeke te na kobe; ala sukula ni pepe.

³ Andaa afarizien na azuife kue ayeke bata ndia ti akotara ti ala. Tongana ala ye ti te kobe, ala yeke sukula maboko ti ala lakue nzoni nzoni si.

⁴ Tongana ala londo na gara si ala kiri na da, kozoni titene ala te kobe, ala yeke sukula tere ti ala si. Ala bata ambeni ndia mingi: andia na ndö ti nzoni lege ti sukulango akopo ti ngu, ata ti ngu, asembe [ na agbogbo].

⁵ Afarizien na awafango-ndia ahunda Jésus, atene: “Ngbanga ti nyen si adisiple ti mo akpe ndia ti akotara ti e pepe si ala yeke te kobe na *asioni maboko ti ala so?”

⁶ Jésus akiri tënë na ala: “Ala azo so tënë ti yanga ti ala ayeke nde na sarango ye ti ala so, peko ti tënë ti yanga ti Nzapa so wayanga-Nzapa Ésaïe atene na ndö ti ala ando so, ayeke taa-tënë; a su na mbeti, atene: ‘Nzapa atene: Azo so ayeke ne mbi gi na yanga senge, me be ti ala ayeke yongoro na mbi mingi.

⁷ Vorongo so ala yeke voro mbi, ayeke gi senge senge, ngbanga ti so ala yeke fa gi andia so azo laa asigigi na ni.’ ”

⁸ Jésus atene na ala: “Ala afarizien na awafango-ndia, ala zia ndia ti Nzapa si ala yeke bata gi lege ti andia ti akotara ti ala.”

⁹ Lo kiri lo tene na ala: “Ala ke biani ti sara ye so Nzapa ahunda na ala si ala yeke bata gi andia ti akotara ti ala!

¹⁰ Biani, Moïse atene: ‘Mo ne babâ na mama ti mo!’ Lo kiri lo tene: ‘Zo so atene sioni tënë na tere ti babâ ti lo wala mama ti lo, lo lingbi na kuâ.’

¹¹ Me ti ala, ala yeke tene: Zo so atene na babâ ti lo wala na mama ti lo, atene: ‘Mbi ye fade ti mu ye na mo, me ye ni so aga korban awe’, so ti tene ‘ye so a zia ni nde ndali ti Nzapa’.

¹² Tongaso ala mu na lo lege ti gbanzi ye na babâ wala mama ti lo.

¹³ Na sarango ye tongaso, ala yeke buba ya ti tënë ti Nzapa na lege ti andia so ala yeke fa ni na popo ti ala. Ala sara gi mara ti aye tongaso mingi.”

Aye so asara si zo aga sioni

¹⁴ Na pekoni, Jésus airi gba ti azo ni si lo tene na ala: “Ala ma mbi nzoni si ala ma ya ti tënë so nzoni:

¹⁵ Ye so alondo na gigi si ali na ya ti zo, alingbi ti sara si zo ni aga *sioni pepe; me ye so ayeke sigigi na ya ti be ti zo laa asara lo ti ga *sioni. [

¹⁶ Tongana mbeni zo ayeke na mê ti mango ndo, ayeke nzoni lo ma!”]

¹⁷ So Jésus azia gba ti azo ni si lo kiri na da awe, adisiple ti lo ahunda lo na nda ti toli so.

¹⁸ Lo tene na ala: “Ala nga, ala yeke na ndara ti ma ya ti tënë so pepe? Ala hinga pepe? Ye so alondo na gigi si ali na ya ti zo, alingbi ti sara si lo ga *sioni pepe,

¹⁹ ngbanga ti so ye ni ali na ya ti be ti lo pepe, me ali na ya ti lo si asigigi ague na ya ti du.” Jésus atene tënë so ti fa atene, e lingbi ti te akobe kue.

²⁰ Lo kiri lo tene: “Ye so ayeke sigigi na ya ti zo laa asara si lo ga *sioni.

²¹ Biani, asioni tënë ti be alondo na ya ti zo, na be ti lo si afa na lo lege ti sarango asioni ye: sarango ye ti ndumba, nzi, fango zo,

²² gingo wali wala koli ti zo, sarango nzara ti ye ti zo, sioni be, handango zo, sarango ye ti kirikiri, kota be, tenengo sioni tënë na iri ti zo, sarango baba nga na sarango ye ti buba.

²³ Asioni ye so kue alondo gi na ya ti zo si asara titene lo ga *sioni.”

Mbeni wali ti mara nde ama na be na Jésus

²⁴ Na pekoni, Jésus alondo na ndo so si lo gue na sese ti Tir. Lo li na ya ti mbeni da si lo ye titene azo ahinga ndo so lo yeke daa pepe; me lo honde tere ti lo gbaa.

²⁵ Mbeni wali so molenge ti lo ti wali ayeke na sioni yingo ama tënë ti Jésus si lo ga hio na tere ti lo, lo ti na gbe ti lo.

²⁶ Andaa wali so ayeke zuife pepe; a du lo na Fenisii, na sese ti Sirii. Lo voro Jésus ti tumba sioni yingo so ayeke na ya ti molenge ti lo.

²⁷ Me Jésus atene na lo: “Mo zia amolenge ate kobe, ya ti ala asi nzoni si! So ayeke na legeni pepe ti mu kobe ti amolenge ti tuku na akete mbo.”

²⁸ Wali ni akiri tënë na lo: “Taa-tënë, kota zo! Me akete mbo so ayeke duti na gbe ti meza ayeke te afuku ti kobe so ayeke ti na maboko ti amolenge.”

²⁹ Tongaso Jésus atene na lo: “Ndali ti kiringo tënë so, mo lingbi ti kiri na ndo ti mo senge; sioni yingo ni asigigi na ya ti molenge ti mo awe.”

³⁰ So lo kiri na da ti lo, lo baa molenge ni ayeke lango na ndö ti gbogbo; sioni yingo ni asigigi na ya ti lo awe.

Jésus asara si mê na yanga ti mbeni buburu azi

³¹ Jésus alondo na sese ti Tir, lo hon na ya ti sese ti Sidon; lo fâ, lo hon na ya ti Agbata-Baleoko si lo kiri na mbage ti kota ngu ti Galile.

³² Ambeni zo amu mbeni koli, aga na lo na Jésus; mê ti lo akanga si lo yeke tene tënë nzoni pepe. Ala hunda na lo titene lo zia maboko ti lo na ndö ti koli ni.

³³ Tongaso Jésus amu lo gi lo oko, ague na lo yongoro na tere ti azo. Lo yoro ali ti maboko ti lo na ya ti mê ti koli ni, lo tuku ngu ti yanga ti lo si lo ndu na menga ti koli ni.

³⁴ Na pekoni, lo yo le ti lo na nduzu, lo wu si lo tene na koli ni: “Efata!”, so ti tene: “Zi tere ti mo!”

³⁵ Gi hio tongaso, mê ti koli ni azi; ye so akanga menga ti lo azi si lo to nda ti tene tënë nzoni.

³⁶ Jésus amu yanga na ala titene ala tene tënë ni na zo oko pepe. Me lakue tongana lo yeke ke na ala ti fa na azo tënë ti aye so lo sara, ala kiri adekongo na ni ahon ti kozoni.

³⁷ Azo so ama tënë ni, li ti ala kue akpe si ala tene: “Ye so kue lo yeke sara ayeke nzoni mingi! Lo yeke sara nga si azo so mê ti ala akanga ama ndo si abuburu atene tënë!”