Marc 5 - Mbeti ti Nzapa - Tënë so amu fini

Jésus atumba asioni yingo na ya ti mbeni koli

¹ Na pekoni, ala si na mbage ti kota ngu ti Galile, na sese ti azo ti Zeraza.

² So Jésus asigigi na ya ti ngo ni, mbeni koli asigigi na popo ti adu ti kuâ hio si aga atengbi na Jésus. Koli so ayeke na mbeni sioni yingo na ya ti lo

³ si lo yeke lango gi na popo ti adu ti kuâ. Zo oko ti gbu lo ti kanga lo ayeke daa pepe, ataa na zingiri kue gbaa.

⁴ Lege mingi ala gbu agere ti lo na wen si ala kanga nga maboko ti lo na zingiri, me lo fâ ya ti zingiri ni na wen ni kue. Mbeni zo oko so ayeke na ngangu ti gbu lo titene lo duti kpoo ayeke daa pepe.

⁵ Bi na lâ, lo yeke fono gi na popo ti adu ti kuâ, wala na ndö ti ahoto si lo yeke dekongo, lo yeke mu atêne ti suru tere ti lo na ka.

⁶ So lo baa Jésus yongoro kâ, lo kpe loro, lo kuku na gbe ti lo

⁷ si lo dekongo ngangu, lo tene: “Jésus, Molenge ti Nzapa so ayeke na yayu kâ na ndö ti aye kue, ti mo na mbi nyen? Mbi hunda mo na iri ti Nzapa, sara sioni na mbi pepe!”

⁸ (Lo tene tongaso, ngbanga ti so Jésus atene: “Sioni yingo, mo sigigi na ya ti koli so!”)

⁹ Jésus ahunda lo, atene: “Iri ti mo ayeke nyen?” Lo kiri tënë na lo: “Iri ti mbi ayeke: ‘Gbani-gbani’, ngbanga ti so e yeke gbani gbani.”

¹⁰ Na pekoni, lo voro Jésus mingi titene lo tumba asioni yingo ni ti hon yongoro na sese ni pepe.

¹¹ Andaa na ndo ni so, gba ti anguru ayeke gi kobe ti ala ti tengo ni nduru na hoto ni.

¹² Tongaso asioni yingo ni avoro Jésus, atene: “Tokua e na ya ti anguru so titene e li na ya ti ala.”

¹³ Jésus ayeda na ala. Tongaso asioni yingo ni asigigi na ya ti koli ni si ala li na ya ti anguru ni. Li ti anguru ni kue ayeke nduru na saki use. Ala londo na loro na li ti hoto ni si ala tuku kue na ya ti ngu, ala kui.

¹⁴ Awabatango-nguru ni akpe si ala fa tënë ni na ya ti gbata ni nga na ya ti akete kodro ti yanga ti yaka. Tongaso azo aga ti baa ye so asi so.

¹⁵ Ala si na tere ti Jésus si ala baa koli so lani gba ti asioni yingo ayeke na ya ti lo so. Lo duti, lo yu bongo si li ti lo aga nzoni. Mbeto agbu ala kue.

¹⁶ Azo so abaa ye so asi so, ala tene na akoli ni tënë ti ye so asi na koli ni nga na ye so asi na anguru ni.

¹⁷ Tongaso ala voro Jésus ti londo na sese ti ala ti hon.

¹⁸ So Jésus ako na ya ti ngo ti gue, koli so fade ayeke na asioni yingo so avoro lo ti ngba na tere ti lo.

¹⁹ Me Jésus ake si lo tene na koli ni: “Kiri na ndo ti mo, na ya ti sewa ti mo si mo fa na azo tënë ti ye so kue *Kota Gbia asara ndali ti mo na lege ti nzoni be ti lo.”

²⁰ Koli ni ague si lo to nda ti fa tënë ti ye so kue Jésus asara na lo so na ya ti Agbata-Baleoko. Azo so kue ama tënë ni, li ti ala kue akpe.

Molenge ti Yairus na wali so andu bongo ti Jésus

²¹ Jésus afâ ngu na ngo, lo kiri na mbage ti ngu ni. Lo duti na yanga ti ngu ni si gba ti azo aga, abongbi na tere ti lo.

²² Mbeni makonzi ti da ti sambelango Nzapa aga; iri ti lo ayeke Yairus. So lo baa Jésus, lo ti na gbe ti lo

²³ si lo voro Jésus mingi ti mu na lo maboko; lo tene: “Molenge ti mbi ti wali aga nduru ti kui. Mo ga, mo zia maboko ti mo na ndö ti lo titene lo soo kuâ si lo ngba na fini!”

²⁴ Lo na Jésus amu lege ague. Gba ti azo amu peko ti Jésus si ala yeke pete lo mbage na mbage.

²⁵ Mbeni wali ayeke daa, mene ayeke ga na tere ti lo mingi mingi, asara ngu baleoko na use awe.

²⁶ Lo baa pasi mingi na ndo ti anganga si lo buba nginza ti lo kue na lege ti ala; me tere ti lo aga nzoni pepe. Kobela ti lo ni akiri aga ngangu ahon ti kozoni.

²⁷ Lo ma tënë ti Jésus. Tongaso lo ga na popo ti gba ti azo ni, na mbage ti peko ti Jésus si lo ndu bongo ti lo.

²⁸ Lo tene na be ti lo: “Tongana mbi ndu gi ti bongo ti lo, fade kobela ti mbi ayeke kai.”

²⁹ Gi hio tongaso, kobela ti lo ni akai, tere ti lo aga nzoni.

³⁰ Gi na oko ndembe ni so, Jésus ahinga atene, mbeni ngangu asigigi na ya ti tere ti ni. Lo baa azo so angoro lo si lo hunda ndo, lo tene: “Zo wa laa andu bongo ti mbi?”

³¹ Adisiple ti lo atene na lo: “Mo baa azo so ayeke pete mo mbage na mbage so kue, mo kiri mo hunda ndo, mo tene: ‘Zo wa laa andu mbi?’ ”

³² Me Jésus abaa ndo na tere ti lo kue ti baa zo wa laa asara ye so.

³³ Wali ni ado na mbeto, ngbanga ti so lo hinga ye so asi fade na lo. Lo ga lo ti na gbe ti Jésus si lo tene na lo taa-tënë kue.

³⁴ Jésus atene na lo: “Molenge ti mbi ti wali, mabe ti mo asoo mo awe. Kobela ti mo akai awe, mo gue nzoni.”

³⁵ So Jésus angba ti tene tënë so, ambeni zo alondo na da ti Yairus aga; ala tene na lo: “Molenge ti mo ti wali akui awe. Mo ngba ti so li ti wafango-ye ngbanga ti nyen?”

³⁶ Me Jésus azia be ti lo na tënë ti ala so pepe. Lo tene na Yairus: “Sara mbeto pepe, mo ma gi na be!”

³⁷ Lo ke na azo kue ti mu peko ti lo, gi Pierre na Jean na ita ti lo Jacques.

³⁸ Tongana ala si na da ti Yairus, Jésus abaa azo ayeke sara ye kirikiri; ambeni ayeke toto si ambeni ayeke dekongo.

³⁹ Lo li na da ni si lo hunda ala, lo tene: “Nda ti aye so kue ayeke nyen? Ala yeke toto ngbanga ti nyen? Molenge so akui pepe, me lo yeke lango.”

⁴⁰ Ala he lo na ngia. Me lo hunda na ala kue ti sigigi; lo iri babâ na mama ti molenge ni na adisiple ti lo ota si ala li na ndo so molenge ni ayeke daa.

⁴¹ Lo gbu maboko ti molenge ni si lo tene na lo: “Talita kum!” Nda ni atene: “Molenge-wali, mbi tene na mo, mo londo!”

⁴² Gi hio tongaso, molenge-wali ni alondo si lo tambula. Lo yeke lani na ngu baleoko na use. So azo abaa ye so asi, li ti ala kue akpe.

⁴³ Me Jésus agboto mê ti ala ngangu titene ala tene tënë ni na zo oko pepe. Na pekoni, lo tene na ala: “Ala mu na lo mbeni ye ti tengo ni.”