Marc 3 - Mbeti ti Nzapa - Tënë so amu fini

Koli so maboko ti lo abuba

¹ Jésus akiri ague na ya ti da ti sambelango Nzapa; mbeni koli so maboko ti lo abuba ayeke kâ.

² Le ti azo ni ayeke gi na tere ti Jésus; ala yeke ku ti baa wala lo yeke kai kobela ti koli so na *lango ti wungo tere titene ala wara mbeni tënë ti bi na li ti lo.

³ Jésus airi koli ni, atene: “Londo, mo luti na le ti azo kue!”

⁴ Na pekoni, lo hunda azo ni, lo tene: “*Ndia afa nyen na e? A fa na e ti sara nzoni wala sioni, ti soo fini ti zo wala ti fâ zo na lango ti wungo tere?” Me zo oko akiri tënë pepe.

⁵ Jésus abaa le ti ala oko oko kue na ngonzo; be ti lo awara vundu ngbanga ti sioni be ti ala. Lo tene na koli ni: “Yoro ya ti maboko ti mo.” Lo yoro ni si maboko ti lo akiri aga nzoni.

⁶ So *afarizien asigigi na ya ti da ti sambelango Nzapa ni, ala gue hio awara azo ti kama poroso ti Herode; ala bongbi ti gi lege ti fâ Jésus.

Gba ti azo aga ti baa Jésus

⁷ Jésus na adisiple ti lo agboto tere ti ala si ala gue na tere ti kota ngu ti Galile. Gba ti azo alondo na Galile nga na Judée aga si ala mu peko ti lo.

⁸ Ambeni alondo na Jérusalem; ambeni alondo na sese ti Idume nga na sese so ayeke na mbage ti ngu ti Jourdain; ambeni alondo na akodro so ayeke nduru na Tir nga na Sidon. Gba ti azo so aga, ngbanga ti so ala ma tënë ti aye so Jésus ayeke sara.

⁹ Tongaso Jésus ahunda na adisiple ti lo ti leke mbeni ngo ti ku na lo si azo ni alingbi ti pete lo pepe.

¹⁰ Biani, azo ti kobela ayeke gbugburu tere ti ala ti ndu Jésus, ngbanga ti so lo kai kobela ti azo mingi.

¹¹ Azo so ayeke na asioni yingo, tongana ala baa lo, ala ti na gbe ti lo, ala dekongo, atene: “Mo yeke Molenge ti Nzapa!”

¹² Me Jésus asuku na ala ngangu titene ala sigigi na nda ti lo pepe.

Jésus asoro awatokua baleoko na use

¹³ Na pekoni, Jésus ague na li ti hoto; lo iri azo so be ti lo aye si ala ga na tere ti lo.

¹⁴ Na popo ti ala, lo soro azo baleoko na use so lo di iri ti ala *awatokua. Lo soro ala ti duti na tere ti lo nga titene lo tokua ala ti fa Nzoni Tënë.

¹⁵ Lo mu na ala ngangu ti tumba asioni yingo.

¹⁶ Azo baleoko na use so lo soro ala ayeke azo tongana: Simon so Jésus adi iri ti lo Pierre,

¹⁷ Jacques na ita ti lo Jean so ala yeke amolenge ti Zebede – Jésus adi iri ti ala Boanerges, so nda ni atene: “Amolenge ti bekpa” –,

¹⁸ André, Philippe, Barthélemy, Matthieu, Thomas, Jacques, molenge ti Alfe, Tade, Simon so ayeke tiri ndali ti lipandaa ti kodro,

¹⁹ na Judas Iskariote, lo so lo yeke ka ande Jésus.

Jésus na sewa ti lo

²⁰ Na pekoni, Jésus akiri na da. Azo akiri abongbi gbani gbani, lege titene lo na adisiple ti lo ate kobe ayeke daa pepe.

²¹ So asewa ti Jésus ama tënë ni, ala ga si ala ye ti mu lo, ngbanga ti so ala tene: “Li ti lo aga kirikiri awe!”

Jésus akiri tënë na awafango-ndia

²² Ambeni wafango-ndia so alondo na Jérusalem aga, atene: “Beelzebul ayeke na ya ti lo, makonzi ti asioni yingo laa amu na lo ngangu ti tumba ayingo so.”

²³ Jésus airi ala si lo fa na ala mbeni toli, lo tene: “Satan alingbi ti tumba Satan?

²⁴ Kodro so kue azo ni akangbi si ala yeke tiri na popo ti ala, fade kodro ni alingbi ti ngba kodro pepe.

²⁵ Tongana azo ti ya ti sewa akangbi si ala yeke tiri na popo ti ala, fade sewa ni alingbi ti ngba pepe.

²⁶ Tongana Satan alondo ti tiri na lo wani si kodro ti lo akangbi, ngangu ti lo alingbi ti ngba pepe, me fade ayeke hunzi.

²⁷ “Titene mbeni zo ali na ya ti da ti mbeni ngangu koli ti nzi ye, ayeke nzoni lo kanga koli ni si fade lo lingbi ti nzi aye ti da ni.

²⁸ Mbi tene na ala taa-tënë: asioni ye so kue azo asara, ataa zonga so ala zonga na Nzapa, fade lo yeke zi tënë ni na li ti ala.

²⁹ Me zo so azonga Yingo-Vuru, fade Nzapa ayeke zi tënë ni na li ti lo laoko pepe; siokpari ni ayeke ngba na li ti lo kpu na kpu.”

³⁰ Jésus atene na ala tënë so, ngbanga ti so azo ni atene: “Sioni yingo ayeke na ya ti lo.”

Taa sewa ti Jésus ayeke zo wa?

³¹ Mama ti Jésus na a-ita ti lo aga; ala ngba na gigi si ala tokua mbeni zo ti iri lo.

³² Gba ti azo aduti na tere ti lo si a tene na lo: “Baa, mama ti mo na a-ita ti mo ayeke na gigi, ala yeke hunda mo.”

³³ Jésus akiri tënë: “Mama ti mbi na a-ita ti mbi ayeke azo wa?”

³⁴ Na pekoni, lo baa azo so aduti, angoro lo so si lo tene: “Ala baa, mama ti mbi na a-ita ti mbi laa so.

³⁵ Biani, zo so asara ye so be ti Nzapa aye ayeke ita ti mbi ti koli, wala ti wali, wala mama ti mbi.”