Nzoni Tënë so Luc asu na mbeti 22 - Mbeti ti Nzapa - Tënë so amu fini

Amakonzi ti azuife agi lege ti fâ Jésus

¹ Matanga ti Mapa so a sara na mama ni pepe aga nduru awe; matanga so a iri ni *Pake.

² Akota wayango-sandaga na awafango-ndia ayeke gi lege ti fâ Jésus; me ala sara mbeto ti azo ti kodro.

Judas aye ti ka Jésus

³ Tongaso Satan ali na be ti Judas so a iri lo Iskariote, mbeni disiple oko na popo ti adisiple baleoko na use.

⁴ Lo gue, lo baa akota wayango-sandaga na amakonzi ti aturugu ti batango lo si lo na ala ama tere na ndö ti lege so fade lo yeke ka Jésus na ala.

⁵ Tere ti ala anzere si ala ma tere ti mu na lo nginza.

⁶ Judas ayeda na ala si lo to nda ti gi nzoni lege ti ka Jésus na ala si gba ti azo ni ahinga tënë ni pepe.

Jésus atokua adisiple ti leke kobe ti Pake

⁷ Lango ti matanga ti Mapa so a sara na mama ni pepe asi awe, lango so alingbi azo afâ akete taba ndali ti *matanga ti Pake.

⁸ Jésus atokua Pierre na Jean; lo tene na ala: “Ala gue, aleke na e kobe ti Pake titene e gue, e te.”

⁹ Ala hunda lo, atene: “Mo ye e leke kobe ni na ndo wa?”

¹⁰ Lo tene na ala: “Na lingo ti ala na ya ti gbata ni, fade ala yeke tengbi na mbeni koli so ayo ta ti ngu na li ti lo. Ala mu peko ti lo na ya ti da so lo yeke li daa;

¹¹ fade ala yeke tene na wa ti da ni, atene: ‘Wafango-ye atene na mo: ndo titene mbi na adisiple ti mbi, e te kobe ti Pake daa ayeke na ndo wa?’

¹² Fade lo yeke fa na ala mbeni kota kubu na nduzu so a leke ya ni awe: na ndo so laa ala yeke leke kobe ni daa.”

¹³ Adisiple ague, awara aye ni kue gi tongana ti so lo fa na ala si ala leke kobe ti Pake ni.

Kobe ti Kota Gbia

¹⁴ So ngbonga ni alingbi awe, Jésus na *awatokua aduti ti te kobe.

¹⁵ Lo tene na ala: “Mbi ye mingi ti te kobe ti *Pake so na ala kozoni si mbi baa pasi!

¹⁶ Biani, mbi tene na ala: mbi yeke kiri ti te ni pepe ngbii Nzapa afa taa nda ti kobe ni na ya ti *Kodro-gbia ti lo.”

¹⁷ Na pekoni, Jésus amu kopo ti vin, lo mu singila na Nzapa si lo tene: “Ala mu ni, ala kangbi na popo ti ala.

¹⁸ Biani, mbi tene na ala: fade mbi yeke kiri ti nyon ngu ti le ti *vinye pepe ngbii kodro-gbia ti Nzapa asi.”

¹⁹ Na pekoni, lo mu mapa, lo mu singila na Nzapa, lo fâ ya ni, lo mu na ala si lo tene: “So ayeke tere ti mbi so mbi mu ndali ti ala. Ala sara ye so ti dabe ti ala na mbi.”

²⁰ So ala te kobe ni awe, lo mu nga kopo ti vin si lo tene: “Kopo so ayeke fini *mbuki na lege ti mene ti mbi, mene so atuku ndali ti ala.

²¹ Ala baa: zo ti kango mbi ayeke na ndo so, mbi na lo laa e yeke te kobe so!

²² *Molenge ti Zo ayeke gue ti lo tongana ti so Nzapa aleke awe; me mawa na zo so aka lo!”

²³ Adisiple ayeke hunda tere ti ala na popo ti ala ti hinga zo wa laa ayeke sara ande ye ni so.

Zo wa laa ayeke kota zo ahon amba ti lo?

²⁴ Na pekoni, papa alondo na popo ti adisiple, ngbanga ti so ala ye ti hinga zo wa na popo ti ala si ayeke kota zo ahon atanga ni.

²⁵ Jésus atene na ala: “Agbia ti amara nde ayeke sara komandema na ndö ti amara ni. Azo so ayeke na komandema na ndö ti amara ni aye titene azo ni airi ala ‘Azo ti sarango nzoni be’.

²⁶ Ti ala azo ti mbi, ye ni ayeke tongaso pepe. Me ayeke nzoni zo so ayeke kota zo na popo ti ala ahon atanga ni kue aduti tongana kete zo ahon atanga ni kue; zo so ayeke na komandema, ayeke nzoni lo ga tongana zo ti sarango kua na ala.

²⁷ Biani, na popo ti zo so aduti ti te kobe na zo so ayeke sara kua ti kobe ni, zo wa laa ayeke kota zo? Ayeke lo so aduti ti te kobe so pepe? Ti mbi, mbi yeke na popo ti ala tongana zo so ayeke mu kobe na azo!

²⁸ Ti ala, ala yeke azo so angba lakue na tere ti mbi na ya ti pasi ti mbi.

²⁹ Tongana ti so Babâ amu na mbi *Kodro-gbia, mbi nga, mbi yeke mu kodro-gbia na ala:

³⁰ fade mbi na ala, e yeke te si e yeke nyon na ya ti Kodro-gbia ti mbi si ala yeke duti na ndö ti ambata ti gbia ti fâ ngbanga ti amara baleoko na use ti Israel.”

Fade Pierre ayeke bere tënë ti Jésus

³¹ Jésus atene: “Simon, Simon, Satan ahunda ti yengere ala tongana ti so zo ayeke yengere ale ti kobe.

³² Me mbi sambela ngbanga ti mo si mabe ti mo ati pepe. Tongana mo kiri ande na mbage ti mbi, ayeke nzoni mo sara titene a-ita ti mo akpengba.”

³³ Pierre atene na lo: “*Kota Gbia, ataa na da ti kanga, mbi na mo, e yeke gue; ataa ti kuâ ni, mbi na mo, e yeke kui!”

³⁴ Jésus atene na lo: “Pierre, mbi tene na mo: kozo titene koli-kondo atoto, fade mo yeke bere fani ota mo tene, mo hinga mbi pepe.”

Tënë ti bozo ti nginza, bozo ti kobe na yongoro zeme

³⁵ Jésus atene na ala: “So lani mbi tokua ala si ala gue na bozo ti nginza pepe, na bozo ti kobe pepe, na poro pepe so, mbeni ye atia ala?” Ala kiri tënë na lo, atene: “Ye oko atia e pepe.”

³⁶ Lo tene na ala: “Ti fadeso, zo so ayeke na bozo ti nginza, ayeke nzoni lo mu ni biani; zo so ayeke na bozo ti kobe, lo mu nga ni; zo so ayeke na yongoro zeme pepe, lo ka kota bongo ti lo ti vo na ni.

³⁷ Mbi tene na ala: ayeke nzoni ye ni asi alingbi na tënë so a su na ya ti Mbeti ti Nzapa na ndö ti mbi, atene: ‘A diko lo na popo ti azo ti fango zo.’ Biani, tënë so atene na ndö ti mbi so, ye ni ayeke si ande alingbi na ni.”

³⁸ Adisiple atene na lo: “*Kota Gbia, baa yongoro zeme use laa.” Lo kiri tënë na ala, lo tene: “Alingbi awe.”

Jésus asambela na hoto ti a-olive

³⁹ Jésus asigigi si lo gue na hoto ti a-olive tongana ti so lo yeke sara lakue; adisiple ti lo amu peko ti lo.

⁴⁰ So lo si kâ awe, lo tene na ala: “Ala sambela si ye ti tarango be ahon ndö ti ala pepe.”

⁴¹ Na pekoni, lo londo na tere ti ala, lo gue yongoro alingbi na ndo so tongana zo abi têne, ati daa. Lo kuku na sese, lo sambela,

⁴² lo tene: “Babâ, tongana mo ye, ayeke nzoni mo zi kopo ti pasi so na tere ti mbi. Me mbi ye pepe titene mo sara ye so be ti mbi aye, me mo sara gi ye so be ti mo aye.” [

⁴³ Tongaso mbeni *ange alondo na yayu asi na lo ti mu ngangu na be ti Jésus.

⁴⁴ So mbeto angba ti sara lo ahon ndoni, lo kiri lo sambela Nzapa ngangu. Gbiki asigigi na tere ti lo tongana angbongboro mene si ayeke yuru na sese.]

⁴⁵ So lo sambela awe, lo londo si lo ga na mbage ti adisiple; lo wara ala na lango ndali ti so vundu asara ala.

⁴⁶ Lo tene na ala: “Ala lango ngbanga ti nyen? Ala londo asambela si ye ti tarango be ahon ndö ti ala pepe.”

Azo agbu Jésus

⁴⁷ So Jésus angba ti tene tënë, gba ti azo asi. Mbeni oko ti adisiple baleoko na use so a iri lo Judas ayeke tambula na li ni; lo ga nduru na Jésus si asu ngbangba ti lo.

⁴⁸ Jésus atene na lo: “Judas, na lege ti sungo ngbangba si mo yeke ka *Molenge ti Zo?”

⁴⁹ Azo so ayeke na tere ti Jésus abaa ye so azo ni aye ti sara na lo si ala hunda lo, atene: “*Kota Gbia, alingbi e de ala na yongoro zeme?”

⁵⁰ Mbeni oko na popo ti ala ade zo ti kua ti kota wayango-sandaga si afâ mê ti lo ti mbage ti koli.

⁵¹ Me Jésus atene: “Ala zia! Alingbi awe!” Lo ndu mê ti koli ni si mê ti lo ni akiri aga nzoni.

⁵² Na pekoni, Jésus atene na akota wayango-sandaga, amakonzi ti aturugu ti kota da ti Nzapa na *akangba so aga ti gbu lo, lo tene: “Ala ga na ayongoro zeme na akeke ti gbu mbi, mo baa mo tene, mbi yeke zo ti nzi!

⁵³ Lakue mbi yeke na popo ti ala na ya ti kota da ti Nzapa, me ala gbu mbi pepe. Biani, so ayeke ngbonga ti ala si ayeke nga ngbonga ti komandema ti vukongo ndo.”

Pierre abere tënë ti Jésus

⁵⁴ Ala gbu Jésus si ala gue na lo na ya ti da ti kota wayango-sandaga. Pierre ague na peko ti ala, me lo gue nduru nduru pepe.

⁵⁵ Azo asara wâ na ya ti gbagba ni si ala yeke duti na tere ni; Pierre aga aduti na popo ti ala.

⁵⁶ Mbeni wali so ayeke sara kua kâ abaa lo so lo duti na tere ti wâ ni. Wali ni abaa le ti lo ngbii si atene: “Koli so nga ayeke zo ti lo!”

⁵⁷ Me Pierre abere, atene: “Wali, mbi hinga lo pepe.”

⁵⁸ Kete na pekoni, mbeni koli abaa Pierre si atene na lo: “Mo nga, mo yeke mbeni zo ti Jésus!” Me Pierre atene: “Mbi yeke ti mbi zo ti lo pepe!”

⁵⁹ Ngbonga oko na pekoni, mbeni zo nde akiri atene: “Taa-tënë, lo so nga lo yeke mbeni zo ti lo si lo yeke nga zo ti Galile!”

⁶⁰ Pierre akiri tënë na lo, atene: “Mbi gi li ti mbi na tënë ti mo ni gbaa!” Gi so tënë angba na yanga ti lo, koli-kondo atoto.

⁶¹ *Kota Gbia abaa ndo na peko, lo baa le ti Pierre si Pierre adabe ti lo na tënë so Kota Gbia atene: “Laso, kozo titene koli-kondo atoto, fade mo yeke bere tënë ti mbi fani ota.”

⁶² Pierre asigigi si lo toto ngangu mingi.

Azo azonga Jésus si ala pika lo

⁶³ Azo so ayeke bata Jésus ahe lo si ala pika nga lo.

⁶⁴ Ala kanga le ti lo na bongo si ala hunda lo, atene: “Sara tongana wayanga-Nzapa! Zo wa laa apika mo?”

⁶⁵ Ala zonga lo na ambeni gba ti zonga.

Jésus na gbe ti azo ti Kota Bongbi ti Fango Ngbanga

⁶⁶ So ndo ahan awe, *akangba ti azuife na akota wayango-sandaga na awafango-ndia abongbi tere ti ala. Ala mu Jésus ague na lo na gbe ti azo ti *Kota Bongbi ti Fango Ngbanga ti ala.

⁶⁷ Ala hunda lo, atene: “Tongana mo yeke *Mesii, tene na e.” Lo kiri tënë na ala: “Tongana mbi tene na ala, ala yeke ma na be pepe.

⁶⁸ Tongana mbi hunda ala na mbeni tënë, ala yeke kiri peko ni na mbi pepe.

⁶⁹ Me ti londo na ndembe so ti gue na ni, fade *Molenge ti Zo ayeke duti na tere ti Nzapa so ngangu ti lo ahon angangu kue; lo yeke duti na mbage ti maboko ti lo ti koli.”

⁷⁰ Ala kue atene: “So ti tene mo yeke Molenge ti Nzapa?” Lo kiri tënë na ala: “Tënë ni laa ala wani atene so: mbi yeke lo.”

⁷¹ Ala tene: “E yeke kiri ti hunda mbeni tënë ngbanga ti nyen? E wani e ma tënë ni na yanga ti lo wani awe!”