Josué 9 - Mbeti ti Nzapa - Tënë so amu fini

Azo ti Israel na azo ti Gabaon aga ambuki

¹ Agbia so kue ayeke na mbage ti ngu ti Jourdain, ala so ayeke na sese ti ahoto, ala so ayeke na *Kodro-ti-gbeni, ala so ayeke na yanga ti kota ngu-ingo ti Mediterane ngbii asi na Liban ama tënë ti ye so asi na gbata ti Ai. Tongaso azo ti mara ti Het, ti Amori, ti Kanaan, ti Perizi, ti Hivi na ti Yebus

² ama tere ti tiri bira na Josué nga na azo ti Israel.

³ Azo ti Gabaon ama tënë ti ye so Josué asara na agbata ti Jéricho na ti Ai.

⁴ Ti azo ti Gabaon, ala sara ye na mayere. Ala leke akobe ti ala ti tengo ni na lege, ala mu agbagba sake na agbagba bozo ti samba so a sara ni na poro ti nyama, a suru surungo, ala fu ni kirikiri si ala zia ni na ndö ti alele.

⁵ Ala yu agbagba pâpä so a fu ni kirikiri, ala yu nga agbagba bongo; ala mu amapa so ahole holengo si aga fuku.

⁶ Ala gue, awara Josué na ya ti bâbâ so ayeke na Gilgal si ala tene na lo na azo ti Israel, atene: “E londo na mbeni kodro yongoro si e ga so. Fadeso, e hunda na ala titene e na ala e ga ambuki.”

⁷ Azo ti Israel atene na azo ti mara ti Hivi so, atene: “E hinga pepe, kodro ti ala ayeke nduru na e ge! Tongana ayeke tongaso, fade e na ala e ga ambuki ni tongana nyen?”

⁸ Azo ti Hivi atene na Josué: “E yeke azo ti kua ti mo.” Josué ahunda ala, atene: “Ala yeke azo wa? Ala londo na ndo wa?”

⁹ Ala kiri tënë na lo, atene: “E azo ti kua ti mo, e londo na mbeni kodro yongoro mingi. E ga ndali ti so, e ma sango ti *KOTA GBIA, Nzapa ti mo. E ma nga tënë ti aye so kue lo sara na kodro ti Ezipte,

¹⁰ na ye so lo sara na agbia use ti azo ti mara ti Amori so ayeke na mbage ti ngu ti Jourdain. Agbia ni ayeke Sihon, gbia ti Heshebon, na Og, gbia ti Bashan so ayeke lango na Ashetarot.

¹¹ *Akangba ti e na azo so kue ayeke lango na kodro ti e atene na e: ‘Ala mu kobe ti tengo ni na lege, ala gue, awara azo ti Israel, ala tene na ala, atene: E yeke azo ti kua ti ala. Fadeso, e hunda na ala titene e na ala e ga ambuki.’

¹² Ala baa, mapa ti e laa! Na ndembe so e mu ni na ya ti ada ti e si e londo ti ga ge, mapa ni angba fade wâ. Fadeso, mapa ni ahole kue si aga fuku!

¹³ Ala baa abozo ti poro so! Na ndembe so e tuku vin daa, abozo ni angba fade fini ni. Fadeso, abozo ni asuru awe! Abongo ti e na apâpä ti e abuba kue awe ndali ti yongoro tambula so e sara so.”

¹⁴ Azo ti Israel ayeda ti mu ambeni kobe ti azo ti Gabaon, me ala hunda KOTA GBIA ndali ni pepe.

¹⁵ Josué na azo ni aleke tënë ti siriri si ala ga ambuki; lo zia ala si ala ngba na fini. Akota zo ti bongbi ti azo ni adeba yanga ti ala ti bata tënë ti mbuki ni.

¹⁶ Lango ota na peko ti mango tere ti ala ti ga ambuki, azo ti Israel ama a tene, azo ti Gabaon ayeke nduru na ala; ala lango ayo na ala pepe.

¹⁷ Azo ti Israel amu lege ague si lango ota na pekoni, ala li na ya ti agbata ti azo ni; agbata ni ayeke Gabaon, Kefira, Beerot na Kiriat-Yearim.

¹⁸ Azo ti Israel afâ azo ni pepe, ngbanga ti so akota zo ti bongbi ti ala adeba yanga ti ala na iri ti KOTA GBIA, Nzapa ti Israel. Me bongbi ti azo ni kue akasa akota zo ni.

¹⁹ Me akota zo ni kue atene na bongbi ti azo ni kue, atene: “E deba yanga ti e na azo ti Gabaon na iri ti KOTA GBIA, Nzapa ti Israel awe; e lingbi ti sara sioni na ala mbeni pepe.

²⁰ Ye so e yeke sara ande na ala ayeke so: e yeke zia ala titene ala ngba na fini. Tongaso pepe, ngonzo ti KOTA GBIA ayeke ti na ndö ti e ndali ti deba ti yanga ti e so e de na ala so.

²¹ E yeke zia ala titene ala ngba na fini, me ala yeke ga azo ti surungo akeke, azo ti tongo ngu ndali ti bongbi ti azo ni kue.” Ye so akota zo ni aleke na be ti ala ti sara laa.

²² Josué airi azo ti Gabaon si lo hunda ala, lo tene: “Ngbanga ti nyen si ala handa e atene, ala yeke lango yongoro so? Ala laa ayeke lango nduru na e ge so pepe?

²³ Ti londo na lango ti laso, a deba ala awe. Ala yeke ngba lakue ti sara kua ti ngbaa, kua ti surungo akeke na ti tongo ngu ndali ti da ti Nzapa ti mbi.”

²⁴ Azo ti Gabaon akiri tënë na Josué, atene: “E azo ti kua ti mo, e sara ye tongaso, ngbanga ti so e ma a tene, KOTA GBIA, Nzapa ti mo, amu yanga na Moïse, zo ti kua ti lo atene, fade ni yeke mu sese ni kue na ala, azo ti Israel si ala yeke fâ azo ti sese ni kue ti hunzi ala. Mbeto ti ala agbu e mingi si e baa e tene, e kui ti e awe.

²⁵ Fadeso, e yeke na gbe ti komandema ti mo; sara na e tongana ti so mo baa nzoni na le ti mo si ayeke mbirimbiri.”

²⁶ Ye so Josué asara na ala ayeke so: lo kanga lege na azo ti Israel ti fâ ala.

²⁷ Gi na lango ni so, Josué azia azo ti Gabaon titene ala ga azo ti surungo akeke na ti tongo ngu ndali ti bongbi ti azo ti Israel nga ndali ti gbalaka ti KOTA GBIA. Ala yeke sara kua ni na ndo so fade KOTA GBIA ayeke soro ni. Ala ngba ti sara kua ni ngbii asi laso.