Josué 8 - Mbeti ti Nzapa - Tënë so amu fini

Mungo gbata ti Ai na lege ti bira

¹ *KOTA GBIA atene na Josué: “Sara mbeto pepe, be ti mo awoko pepe. Mu aturugu ti mo kue, mo gue, mo tiri bira na azo ti gbata ti Ai. Baa, mbi zia na maboko ti mo awe gbia ti Ai, azo ti gbata ti lo, gbata ti lo nga na kodro ti lo.

² Fade mo yeke sara na gbata ti Ai na gbia ni gi mara ti ye so mo sara lani na gbata ti Jéricho nga na gbia ni. Me ala lingbi ti mu aye so ala yeke gbu na peko ti bira, anzoni ye nga na anyama ti gbata ni titene aga ti ala. Mo tokua ambeni turugu na hondengo ni na mbage ti peko ti gbata ni.”

³ Josué na aturugu ti lo kue aleke tere ti ala ti gue ti tiri bira na gbata ti Ai. Lo soro aturugu saki baleota, angangu zo ti bira si lo tokua ala na bi.

⁴ Lo mu yanga na ala, lo tene: “Ala gue, ahonde tere ti ala na mbage ti peko ti gbata ni, ala gue yongoro mingi pepe; ala kue aduti nduru ti sara bira ni.

⁵ Ti mbi, fade mbi na azo ti mbi kue, e yeke gue nduru na gbata ti Ai. Tongana azo ti gbata ni asigigi ti ga ti tiri na e tongana ti kozo, e yeke kpe na dawa ti ala.

⁶ Ala yeke londo ti tumba peko ti e, tongaso e yeke handa ala ti hon na ala yongoro na gbata ni. Ala yeke baa ti ala atene, e kpe na dawa ti ala tongana ti kozo.

⁷ Tongaso ala, aturugu, fade ala yeke sigigi na ndo so ala honde tere ti ala daa so si ala yeke mu gbata ni. Biani, KOTA GBIA, Nzapa ti ala ayeke zia ni na maboko ti ala.

⁸ Tongana ala mu gbata ni awe, fade ala yeke bi wâ daa alingbi na yanga so KOTA GBIA amu. Baa, yanga so mbi mu na ala laa.”

⁹ Josué atokua aturugu ni na ndo so lo ye titene ala gue, ahonde tere ti ala daa so. Ala gue, aduti na mbage ti Do ti gbata ti Ai, na popo ti Betel na Ai. Ti Josué, lo na tanga ti aturugu ni angba alango na bi ni so.

¹⁰ Na ndaperere so ndo angba kâ, Josué atambula ti baa aturugu ni. Na pekoni, lo na *akangba ti Israel amu li ti aturugu ni si ala gue ti tiri bira na gbata ti Ai.

¹¹ Aturugu so kue ayeke na lo aleke tere ti ala ti tiri bira; ala gue, asi na ndo so abaa le na gbata ti Ai, ala sara bâbâ ti ala na mbage ti Banga. Mbeni popo-hoto laa akangbi ala na Ai.

¹² Josué asoro aturugu nduru na saki oku si lo mu yanga na ala ti honde tere ti ala na Do ti gbata ti Ai, na popo ti Betel na Ai.

¹³ Aturugu ni asara bâbâ ti ala na Banga ti gbata ni. Mbeni mbage ti aturugu so ayeke ga na peko asara ti ala bâbâ ni na Do ti gbata ni. Na bi ni so, Josué ague na popo-hoto ni.

¹⁴ Na ndaperere, so gbia ti Ai abaa azo ti Israel, lo na aturugu ti lo kue asigigi hio na ya ti gbata ni ti gue ti tiri bira na azo ti Israel, na oko ndo so lani ala tiri bira kozoni daa so; ndo ni ayeke na mbage ti popo-hoto ti Jourdain. Me lo hinga pepe lo tene, ambeni turugu ahonde tere ti ala na mbage ti peko ti gbata ni.

¹⁵ Josué na azo ti Israel kue azia azo ni ahon ndö ti ala na ngangu si ala kpe ti gue na mbage ti benyama.

¹⁶ A mu yanga na azo ti Ai kue ti tumba peko ti azo ti Israel. Ala tumba peko ti azo ni si ala handa ala, ahon na ala yongoro na gbata ni.

¹⁷ Mbeni zo oko angba na ya ti agbata ti Ai na ti Betel pepe. Ala kue asigigi ti tumba peko ti azo ti Israel; ala zia ya ti gbata ni angba senge.

¹⁸ KOTA GBIA atene na Josué: “Yoro likongo so ayeke na maboko ti mo na mbage ti Ai, ngbanga ti so mbi yeke zia gbata ni na maboko ti mo.” Josué ayoro likongo ni na mbage ti Ai.

¹⁹ Gi so lo yoro maboko ti lo, azo ti Israel so ahonde tere ti ala, asigigi hio na ndo so ala yeke daa, ala kpe, ala gue, ali na ya ti gbata ni si ala mu ni. Na pekoni, ala bi wâ daa hio.

²⁰ Azo ti Ai abaa ndo na peko ti ala, ala baa so guru ti wâ alondo na ya ti gbata ni si ayeke gue na nduzu. Ala hinga ndo so ala lingbi ti kpe daa pepe, ngbanga ti so azo ti Israel so ayeke kpe fade ti gue na mbage ti benyama, ala kiri na peko ti tiri na azo so ayeke tumba peko ti ala.

²¹ So Josué na azo ti Israel kue abaa so azo so ahonde tere ti ala na mbage ti peko ti gbata ni amu gbata ni awe si guru ti wâ ayeke londo na ya ti ya ti gbata ni, ala kiri na peko ti tiri na azo ti Ai.

²² Ambeni zo ti Israel alondo na ya ti gbata ni si ala gue ti tiri nga na azo ti Ai. Azo ti Israel akanga lege mbage na mbage si azo ti Ai ayeke gi na popo ti azo ti Israel. Azo ti Israel afâ ala kue, zo oko angba na fini pepe, zo oko awara lege ti kpe pepe.

²³ Ti gbia ti Ai, ala gbu lo na fini le ti lo si ala gue na lo na Josué.

²⁴ Azo ti Israel afâ azo ti Ai kue na ya ti ngonda, na benyama so ala tumba peko ti ala daa so. So azo ti Israel afâ azo ni kue, ahunzi ala awe, ala kue akiri na gbata ti Ai si ala fâ tanga ti azo ni kue.

²⁵ Azo so kue awara kuâ na lango ni so, akoli na awali, wungo ti ala kue ayeke saki baleoko na use, ala kue gi azo ti Ai.

²⁶ Josué angba ti yoro likongo ti lo na mbage ti Ai ngbii a fâ azo ti Ai ni kue si.

²⁷ Me ti azo ti Israel, ye so ala gbu na peko ti bira si aga ti ala ayeke anyama na anzoni ye ti gbata ni alingbi na yanga so KOTA GBIA amu lani na Josué.

²⁸ Josué agbi Ai; lo sara si gbata ni aga gba ti têne kpu na kpu, aga tongana benyama; angba tongaso ngbii asi laso.

²⁹ Ti gbia ti Ai, Josué amu yanga titene a kanga go ti lo na tere ti keke na nduzu; kuâ ti lo angba na ya ti keke ni ngbii asi na lakui. Na lakui, Josué amu yanga titene ala zi kuâ ti lo ni. Ala gue, abi kuâ ni na yanga ti gbata ni si ala bongbi gba ti têne na ndö ni; atêne ni angba ngbii asi laso.

Josué adiko mbeti ti Ndia na ndö ti hoto ti Ebal

³⁰ Josué aleke mbeni gbalaka na ndö ti hoto ti Ebal ndali ti *KOTA GBIA, Nzapa ti Israel.

³¹ Lo leke ni alingbi na yanga so Moïse, zo ti kua ti KOTA GBIA amu na azo ti Israel. A su tënë ni na ya ti mbeti ti *Ndia ti Moïse, atene: “Gbalaka ni ayeke na asenge têne so zo andu tere ni na wen oko pepe.” Na ndö ti gbalaka ni, azo ti Israel ayeke mu na KOTA GBIA *asandaga so a yeke gbi ni kue na wâ nga na asandaga ti beoko.

³² Na ndo so, na le ti azo ti Israel kue, Josué akiri asu na ndö ti atêne, Ndia so Moïse asu ando so.

³³ Azo ti Israel kue na *akangba ti ala, amakonzi ti ala, awafango-ngbanga ti ala na awande so ayeke na popo ti ala, aluti na tere ti sanduku ti mbuki ti KOTA GBIA mbage na mbage. Ala luti na le ti awayango-sandaga so ayeke azo ti mara ti Lévi so ayeke yo sanduku ti mbuki ni. Mbeni ndambo ti azo ni aluti na mbage ti hoto ti Garizim si mbeni ndambo ti ala aluti na mbage ti hoto ti Ebal. Moïse, zo ti kua ti KOTA GBIA amu ando yanga na azo ni ti sara tongaso ti sara tufa na ndö ti azo ti Israel.

³⁴ Na pekoni, Josué adiko atënë so kue a su na ya ti mbeti ti Ndia, atënë ti tufa na atënë ti dengo ba.

³⁵ Josué adiko atënë ti Ndia ti Moïse na dawa ti bongbi ti azo ti Israel kue, na awali, amolenge nga na awande so ayeke na popo ti ala; lo girisa mbeni tënë oko daa pepe.