Josué 20 - Mbeti ti Nzapa - Tënë so amu fini

Agbata so azo ayeke kpe daa ti bata tere ti ala

¹ *KOTA GBIA atene na Josué:

² “Tene na azo ti Israel, mo tene: ayeke nzoni ala soro agbata so ala lingbi ti kpe daa ti bata tere ti ala; mbi tene tënë ni ando na Moïse ti tene na ala.

³ Tongana mbeni zo afâ zo na mbana pepe, wala lo laa lo yeda ti fâ zo ni pepe, lo lingbi ti kpe na ya ti mbeni gbata ni so ti bata tere ti lo. Tongaso, fade lo lingbi ti kpe zo so aye ti kiri peko ti sioni na zo ti fango zo ni.

⁴ Zo so afâ mba ti lo na mbana pepe so, tongana lo si na yanga ti gbata ni, fade lo yeke luti na ndo so ti fa na akangba ti gbata ni peko ti ye so lo sara. Akangba ni ayeke mu lo na tere ti ala, ala yeke li na lo na ya ti gbata ni si ala yeke mu na lo ndo titene lo lango daa na popo ti ala.

⁵ Zo so aye ti kiri peko ti sioni, tongana lo tumba peko ti zo ti fango zo ni ti sara sioni na lo, fade azo ti gbata ni azia lo na maboko ti zo ni pepe. Biani, lo laa lo yeda ti fâ zo ni pepe; lo ke zo ni na be ti lo kozoni pepe.

⁶ Zo ti fango zo ni ayeke ngba na ya ti gbata so ngbii asi na ndembe so a yeke fâ ngbanga na ndö ti lo na dawa ti bongbi ti azo. Lo yeke ngba kâ ngbii kota wayango-sandaga so ayeke sara kua na ngoi ni so akui si. Na pekoni, fade zo ti fango zo ni akiri na da ti lo, na gbata so lo londo daa si lo kpe so.”

⁷ Agbata so azo ti Israel azia ni nde ayeke so: Kedesh, so ayeke na Genezaret na sese ti Neftali, ndo so ahoto ayeke daa, Sishem, so ayeke na sese ti Efraim, ndo so ahoto ayeke daa, Kiriat-Arba, so a iri ni nga Hebron na sese ti Juda, ndo so ahoto ayeke daa.

⁸ Na mbage ti ngu ti Jourdain, na To ti Jéricho, ala soro gbata ti Beser, so ayeke na benyama, na kpangbara sese so ayeke ti azo ti mara ti Ruben. Ala soro nga Ramot, so ayeke na sese ti Galaad si ayeke ti azo ti mara ti Gad; Golan, so ayeke na Bashan si ayeke ti azo ti mara ti Manase.

⁹ So ayeke agbata so azo ti Israel asoro ni titene zo so afâ zo na mbana pepe, lo kpe daa ti bata tere ti lo. Agbata ni ayeke ndali ti azo ti Israel nga ndali ti awande so aduti na popo ti ala. Tongaso, zo so afâ mba ti lo na mbana pepe alingbi ti kpe kâ si zo so aye ti kiri peko ti sioni na zo ti fango zo ni awara lege ti sarango sioni na lo pepe. Fade a yeke fâ lo pepe kozo titene a fâ ngbanga na ndö ti lo na dawa ti bongbi ti azo.