Josué 13 - Mbeti ti Nzapa - Tënë so amu fini

Tanga ti asese so angba titene azo ti Israel amu ni

¹ Josué aga mbakoro awe, ngu ti lo ahon mingi awe si *KOTA GBIA atene na lo: “Mo ga mbakoro awe, ngu ti mo ahon mingi awe. Me tanga ti asese so alingbi titene ala mu ni so angba mingi.

² Baa, tanga ti asese so angba ayeke so: sese kue ti azo ti Filistii na sese kue ti azo ti Geshur.

³ Azo abaa sese ni so tongana ti azo ti Kanaan; sese ni alondo na ngu ti Shihor so ayeke baa le na Ezipte, ague ngbii asi na katikati ti sese ti Ekron, na mbage ti Banga. Agbia oku ti azo ti Filistii ayeke kâ: gbia ti Gaza, ti Asdod, ti Askalon, ti Gat na ti Ekron; sese ti azo ti mara ti Avi ayeke nga kâ,

⁴ na Mbongo. Sese so angba titene ala mu ni ayeke sese kue ti azo ti Kanaan, ti londo na Ara, so ayeke ti azo ti Sidon, ague ngbii asi na Afek so ayeke katikati ti sese ti azo ti Amori.

⁵ Mbeni sese so angba titene ala mu ni ayeke sese ti Gebal nga na hoto ti Liban, na mbage ti To, ti londo na Baal-Gad so ayeke na gbe ti hoto ti Hermon ngbii asi na Lebo-Hamat.

⁶ Mbeni sese so angba ayeke sese so ahoto ayeke daa so ayeke na popo ti Liban na Misrefot-Maim; azo ti sese ni kue ayeke azo ti Sidon. Na singo ti ala azo ti Israel, mbi yeke tumba azo ti sese ni. Mo yeke bi mbeni ye ti baa lege so mo yeke kangbi sese ni na popo ti azo ti Israel titene aga ti ala, tongana ti so mbi mu yanga na mo.

⁷ Fadeso, mo kangbi sese ni na tanga ti amara gumbaya ni nga na ndambo ti mara ti Manase titene aga ti ala.”

Kangbingo sese so ayeke na mbage ti ngu ti Jourdain

⁸ Azo ti mara ti Ruben, ti Gad na kozo ndambo ti mara ti Manase awara ti ala asese ni awe na mbage ti To ti Jourdain. Moïse, zo ti kua ti *KOTA GBIA laa amu na ala titene aga ti ala.

⁹ Katikati ti sese ti ala ni na mbage ti Mbongo ayeke gbata ti Aroer so ayeke na yanga ti ngu ti Arnon nga na gbata so ayeke na popo-hoto ti Arnon. Sese ni amu kpangbara sese so kue alondo na Medeba ngbii asi na Dibon,

¹⁰ amu nga agbata ti gbia Sihon, gbia ti azo ti Amori; Sihon ale-gbia lani na gbata ti Heshebon si lengo-gbia ti lo ague ngbii asi na katikati ti sese ti azo ti Amon.

¹¹ Sese ti Galaad, ti Geshur na ti Maaka, hoto ti Hermon nga na Bashan, ague ngbii asi na Salka, kue ayeke na ya ti sese ti ala.

¹² Kodro-gbia ti Og ayeke nga na ya ti sese ti ala. Og ayeke tanga ti azo ti mara ti Refa so lo le-gbia na ndö ti Ashetarot nga na ndö ti Edrei, so ayeke na sese ti Bashan. Moïse ahon ndö ti azo ni na bira si lo mu asese ni na maboko ti ala.

¹³ Me azo ti Israel atumba azo ti mara ti Geshur na ti Maaka pepe. Azo ti Geshur na azo ti Maaka angba ti lango na popo ti azo ti Israel ngbii asi laso.

¹⁴ Gi azo ti mara ti Lévi oko laa Moïse amu na ala sese pepe titene aga ti ala. Biani, ye so aga ti ala ayeke gi *asandaga so a yeke gbi ni kue na wâ, so azo amu na KOTA GBIA, Nzapa ti Israel, tongana ti so KOTA GBIA wani amu zendo ni na ala.

¹⁵ Moïse amu sese na azo ti mara ti Ruben alingbi na akete mara ti ala.

¹⁶ Katikati ti sese ti ala ni na mbage ti Mbongo ayeke gbata ti Aroer so ayeke na yanga ti ngu ti Arnon nga na gbata so ayeke na popo-hoto ti Arnon. Sese ni amu nga kpangbara sese so ayeke na tere ti Medeba;

¹⁷ amu nga Heshebon na agbata ti kpangbara sese ni kue: Dibon, Bamot-Baal, Bet-Baal-Meon,

¹⁸ Yahas, Kedemot, Mefaat,

¹⁹ Kiriataim, Sibma, Seret-Shahar, so ayeke na ndö ti kete hoto, na ndö ti popo-hoto,

²⁰ Bet-Peor, atere ti hoto ti Pisga na Bet-Yeshimot.

²¹ Agbata so ayeke na kpangbara sese nga na kodro kue ti gbia Sihon ayeke na ya ti sese ti ala. Sihon ayeke gbia ti azo ti mara ti Amori so ale-gbia na Heshebon. Moïse ahon ndö ti Sihon na amakonzi ti Madian na bira, ala so ayeke na ya ti kodro ti lo si ala yeke na gbe ti lo so. Amakonzi ni ayeke Evi, Rekem, Sur, Hur na Reba.

²² Na popo ti azo so azo ti Israel afâ ala, Balaam, molenge ti Beor ayeke daa. Balaam ayeke zo ti bango nda ti aye.

²³ Katikati ti sese ti azo ti mara ti Ruben ayeke ngu ti Jourdain nga na asese so ayeke na tere ni. So ayeke sese so aga ye ti azo ti mara ti Ruben alingbi na akete mara ti ala, agbata ti ala nga na akete kodro ti ala laa.

²⁴ Moïse amu sese na azo ti mara ti Gad alingbi na akete mara ti ala.

²⁵ Sese so ala wara ayeke sese ti Yazer, agbata ti Galaad kue na ndambo ti sese ti azo ti Amon, ague ngbii asi na Aroer, so ayeke baa le na Raba.

²⁶ Sese ni akiri alondo na Heshebon ague ngbii asi na Ramat-Mispe nga na Betonim; akiri alondo na Mahanaim ague ngbii asi na sese ti Lo-Dabar.

²⁷ Na popo-hoto ti Jourdain, agbata ti Bet-Haram, ti Bet-Nimra, ti Sukot na ti Safon ayeke na ya ti sese ti ala. So ayeke tanga ti ando so angba na ya ti kodro-gbia ti Sihon, gbia ti Heshebon. Sese ni ayeke na To ti Jourdain; Jourdain ayeke na katikati ti sese ni, ague ngbii asi na yanga ti kota ngu ti Genezaret, na Banga.

²⁸ So ayeke agbata na akete kodro ti tere ni so Moïse amu na azo ti mara ti Gad titene aga ti ala, alingbi na akete mara ti ala laa.

²⁹ Moïse amu sese na azo ti ndambo ti mara ti Manase alingbi na akete mara ti ala.

³⁰ Katikati ti sese ti ala ni na mbage ti Mbongo ayeke Mahanaim. Sese ti Bashan kue, sese kue ti Og, gbia ti Bashan nga na akete kodro baleomene ti Yair so ayeke na Bashan, kue ayeke na ya ni.

³¹ Ndambo ti sese ti Galaad nga na agbata ti Ashetarot na ti Edrei so ayeke ando agbata ti kodro-gbia ti Og na sese ti Bashan, kue ayeke na ya ni. Sese ni ayeke ando ti azo ti kete mara ti Makir, molenge ti Manase.

³² Asese so Moïse akangbi ni na azo ti Israel titene aga ti ala na ndembe so lo yeke na lando ti Moab so laa. Asese ni ayeke na To ti Jéricho, na mbage ti ngu ti Jourdain.

³³ Me gi azo ti mara ti Lévi oko laa Moïse amu na ala sese pepe titene aga ti ala. KOTA GBIA, Nzapa ti Israel laa ayeke ye so ala wara, tongana ti so lo mu zendo ni na ala.