Josué 1 - Mbeti ti Nzapa - Tënë so amu fini

Nzapa asoro Josué na peko ti Moïse

¹ Na peko ti kuâ ti Moïse, zo ti kua ti *KOTA GBIA, KOTA GBIA atene na Josué, molenge ti Nune so lo yeke sara kua na tere ti Moïse, atene:

² “Moïse, zo ti kua ti mbi akui awe. Londo fadeso, mo fâ ngu ti Jourdain, mo na azo ti Israel kue titene ala li na ya ti kodro so mbi mu na ala.

³ Ndo so kue gere ti ala ayeke do ni, mbi mu ni na ala awe, tongana ti so mbi mu ando zendo ni na Moïse.

⁴ Fade katikati ti kodro ti ala ayeke londo na benyama, na mbage ti Mbongo, ague ngbii asi na ahoto ti Liban, na mbage ti Banga. Mbeni katikati ni ayeke londo na kota *bale ti Efrate, na mbage ti To, amu kodro ti azo ti mara ti Het, ague ngbii asi na kota ngu-ingo ti Mediterane, na mbage ti Do.

⁵ Na lango so kue mo ngba na fini, fade mbeni zo ti gbu le ni na mo ayeke daa pepe. Fade mbi yeke na mo tongana ti so mbi yeke ando na Moïse; mbi yeke do mo ti zia mo pepe, mbi yeke zia mo oko pepe.

⁶ Gbu ngangu, mo sara ye ti koli, ngbanga ti so mo laa mo yeke sara ande titene kodro so mbi deba yanga ti mbi ti mu na akotara ti ala, aga ye ti ala.

⁷ Biani, gbu ngangu, mo sara ye ti koli; mo sara ye alingbi na *Ndia so kue Moïse, zo ti kua ti mbi, afa na mo. Mo zia lege ti Ndia ni ti gue mbage na mbage pepe; tongaso si na ndo so kue mo yeke gue daa, aye so kue mo yeke sara, fade ayeke ga nzoni.

⁸ Ayeke nzoni atënë ti ya ti mbeti ti Ndia so angba lakue na yanga ti mo; mo gbu li ti mo daa bi na lâ, mo gi nga lege ti sara aye so kue alingbi na tënë so a su na ya ti mbeti ni. Tongaso si aye so kue mo leke na be ti mo ti sarango ni, mo yeke sara ni na legeni si aga nzoni.

⁹ Mbi mu yanga na mo, mbi tene: gbu ngangu, mo sara ye ti koli! Zia mbeto asara mo pepe, zia mbeto ahon ndö ti mo pepe, ngbanga ti so mbi KOTA GBIA, Nzapa ti mo, fade mbi yeke na mo na ndo so kue mo yeke gue daa.”

Josué ahunda na azo ti leke tere ti ala ti fâ ngu ti Jourdain

¹⁰ Tongaso Josué amu yanga na akapita so ayeke na ndö ti azo ni, atene:

¹¹ “Ala hon na ya ti bâbâ, ala mu yanga na azo ni, atene: ‘Ala leke akobe ti tengo ni, ngbanga ti so na ya ti lango ota, fade ala yeke fâ ngu ti Jourdain ti gue ti mu kodro so KOTA GBIA, Nzapa ti ala, ayeke mu na ala titene aga ti ala.’ ”

¹² Na pekoni, Josué atene na azo ti mara ti Ruben, ti Gad nga na ndambo ti mara ti Manase, atene:

¹³ “Ala dabe ti ala na yanga so Moïse, zo ti kua ti KOTA GBIA, amu na ala ando, lo tene: ‘KOTA GBIA, Nzapa ti ala, amu na ala lege ti wungo tere; lo mu na ala sese so ayeke na To ti ngu ti Jourdain so awe.’

¹⁴ Fade awali ti ala, amolenge ti ala nga na anyama ti ala ayeke ngba na sese so Moïse amu na ala na mbage ti ngu ti Jourdain ge so. Me ti ala azo so kue ayeke angangu zo ti bira, fade ala yeke leke tere ti ala ti tiri bira, ala yeke hon na dawa ti a-ita ti ala ti mu maboko na ala,

¹⁵ ngbii KOTA GBIA amu lege na a-ita ti ala ti wu tere, tongana ti so lo sara na ala so; fade a-ita ti ala ni ayeke wara nga sese so KOTA GBIA, Nzapa ti ala ayeke mu na ala. Na pekoni, ala azo ti mara ti Ruben, ti Gad nga na ndambo ti mara ti Manase ayeke kiri na sese so Moïse, zo ti kua ti KOTA GBIA amu na ala, na mbage ti ngu ti Jourdain, ndo so lâ ayeke sigigi daa so.”

¹⁶ Akapita ni akiri tënë na Josué, atene: “Aye so kue mo mu yanga na e titene e sara, fade e yeke sara ni; ndo so kue mo yeke tokua e daa, fade e yeke gue.

¹⁷ E yeke ma yanga ti mo na ya ti ye kue tongana ti so e ma lani yanga ti Moïse so. Biani, fade KOTA GBIA, Nzapa ti mo ayeke na mo tongana ti so lo yeke lani na Moïse so.

¹⁸ Zo so kue ayeke londo ti ke yanga ti mo si lo ma atënë ti mo pepe, fade a yeke fâ lo. Ti mo, gbu ngangu, mo sara ye ti koli!”