Jonas 3 - Mbeti ti Nzapa - Tënë so amu fini

Jonas afa tënë ti Nzapa na Ninive

¹ Ti fani use, tënë ti KOTA GBIA asi na Jonas, atene:

² “Londo, mo gue na Ninive, kota gbata so! Mo dekongo na azo ni na tënë ti yanga ti mbi so mbi yeke tene na mo.”

³ Ti so ni, Jonas asara ye alingbi na tënë ti KOTA GBIA, lo londo, lo gue na Ninive. Andaa Ninive ayeke mbeni gbata so akono ahon ndoni; ti londo na li ti gbata ni ti si na ngbonda ni, zo ayeke tambula lango ota.

⁴ Na ya ti lango oko, Jonas atambula na ya ti gbata ni si lo yeke dekongo, lo tene: “Angba lango baleosio titene Ninive abuba biani biani.”

⁵ Azo ti Ninive ayeda na tënë ti Nzapa. Ti londo na azo ti mosoro asi na azo ti mawa, ala leke be ti ala kue ti ke kobe, ala yu bongo ti mua.

⁶ So gbia ti Ninive ama tënë ti ye so asi, lo londo na ndö ti mbata ti lo ti gbia, lo zi bongo ti gbia na tere ti lo, lo yu bongo ti mua si lo duti na ya ti mburu ti wâ.

⁷ Lo na akota zo ti Ninive amu mbeni mbela si ala dekongo na ni na ya ti gbata ni, atene: “Azo, abagara na ataba, na anyama kue, ala te mbeni ye oko pepe wala ala nyon ngu pepe.

⁸ Azo na anyama ayu bongo ti mua, ala sambela Nzapa ngangu. Zo oko oko azia sioni lege ti sarango ye ti lo na aye ti ngangu so lo yeke sara na azo.

⁹ E hinga pepe, fade Nzapa ayeke zia lege ti ye so lo leke na be ti lo ti sara; e hinga pepe, fade ngonzo so agbu lo mingi so akai si e kui pepe.”

¹⁰ Nzapa abaa aye so kue azo ti Ninive asara ti fa atene, ala zia sioni lege ti sarango ye ti ala awe. Tongaso sioni ye so Nzapa atene tënë ti sarango ni na ala so, lo zia ti sarango ni.