Jonas 2 - Mbeti ti Nzapa - Tënë so amu fini

Jonas asambela Nzapa

¹ *KOTA GBIA atokua mbeni kota susu aga amene Jonas. Jonas asara lango ota na bi ota kue na ya ti susu ni.

² Na ya ti susu ni, Jonas asambela KOTA GBIA Nzapa ti lo,

³ lo tene: “Na ngoi so aye ti ngangu asi na mbi, mbi dekongo na mo, KOTA GBIA si mo kiri tënë na mbi. Na ngoi so mbi yeke na ya ti kuâ, mbi iri mo ti mu maboko na mbi si mo ma go ti mbi.

⁴ Mo bi mbi na gbe ti kota ngu-ingo; mo bi mbi taa na be ti kota ngu-ingo ni. Kota ngu-ingo amene mbi kue, *amapo so kue mo sara na le ti ngu ayeke hon na ndö ti mbi, ayeke hon na ndö ti mbi.

⁵ Mbi tene na be ti mbi, mbi tene: ‘KOTA GBIA, mo tumba mbi yongoro na le ti mo awe! Me nzara ti kiri ti baa kota da ti mo angba na be ti mbi, kota da ti mo so ayeke nde si ayeke nzoni kue so.’

⁶ Ngu amu mbi si aye ti fâ mbi, kota ngu-ingo amene mbi kue; apere ti gbe ti ngu akanga li ti mbi.

⁷ Mbi linda ngbii, mbi si na gere ti ahoto, yanga ti sese akanga na ndö ti mbi, akanga na ndö ti mbi biani biani; me, mo KOTA GBIA, Nzapa ti mbi, mo kiri mo mu mbi na gbe ni kâ si mo sigigi na mbi na fini.

⁸ So mbi ga nduru na kuâ, be ti mbi ati na ndö ti mo, KOTA GBIA. Mbi sambela mo si mo ma sambela ti mbi na ya ti kota da ti mo so ayeke nde si ayeke nzoni kue so.

⁹ Azo so ayeke voro asenge senge nzapa so, ala ke lege ti nzoni be so mo sara na ala.

¹⁰ Ti mbi, fade mbi yeke he bia ti mu singila na mo, KOTA GBIA, mbi yeke mu *sandaga na mo. Ye so mbi deba yanga ti mbi ti sarango ni, fade mbi yeke sara ni. Biani, mo KOTA GBIA laa, mo yeke soo zo na kuâ.”

¹¹ Tongaso, KOTA GBIA amu yanga na susu ni si lo de Jonas na tere ti ngu.