Joël 4 - Mbeti ti Nzapa - Tënë so amu fini

KOTA GBIA afâ ngbanga na ndö ti amara

¹ *KOTA GBIA atene: “Biani, taa na ya ti alango ni so, fade mbi yeke sara titene Juda na Jérusalem akiri na kozo ndo ti ala,

² mbi yeke bongbi amara nde kue si mbi yeke sara titene ala gue na popo-hoto so iri ni ‘KOTA GBIA ayeke fâ ngbanga’. Kâ, fade mbi yeke gue na ala na gbe ti ngbanga ndali ti ye so ala sara na Israel, azo ti mbi, ala so aga ye ti mbi: azo ni akangbi azo ti mbi kirikiri na popo ti amara si ala kangbi kodro ti mbi na popo ti ala.

³ Ala bi mbeni ye ti baa lege so ala lingbi ti kangbi azo ti mbi na popo ti ala. Ala ka amaseka-koli ti vo na awali-ndumba; ala ka amaseka-wali ti vo na samba si ala nyon.

⁴ Ti ala azo ti Tir na ti Sidon nga na ala, azo so kue ayeke na sese ti azo ti Filistii, nyen laa ala ye ti sara na mbi, nyen? Ala ye ti kiri na mbi peko ti mbeni ye so mbi sara? Tongana ala ye ti kiri peko ni na mbi, fade mbi yeke ku kungo pepe ti sara si sioni ni akiri na li ti ala wani.

⁵ Ala mu wen ti nginza ti mbi na lôro ti mbi, ala mu aye ti mosoro ti mbi ti kota ngere, ala gue, azia ni na ya ti ada ti nzapa ti ala.

⁶ Ala ka azo ti Juda nga na azo ti Jérusalem na agreke, ti sara titene azo ti Juda na azo ti Jérusalem aduti yongoro na kodro ti ala wani.

⁷ Me fade mbi yeke gue ti mu ala na ndo so ala ka ala daa ti kiri na ala. Sioni ye so ala sara na ala, fade mbi yeke sara titene sioni ye ni akiri na li ti ala, azo ti Tir na ti Sidon.

⁸ Fade mbi yeke ka amolenge ti ala ti koli na ti wali na azo so alango na Juda, azo ti Juda ayeke kiri ti ka amolenge ni na azo ti mara ti Saba so ayeke lango yongoro kâ. KOTA GBIA laa atene tënë so.”

Bira ti ndani na tënë ti fango ngbanga

⁹ Ala to mbela na tënë so na popo ti amara nde, atene: “Ala leke tere ti ala ndali ti bira, ala zingo akpengba zo ti bira! Ayeke nzoni aturugu kue amu lege aga!

¹⁰ Ala mu akpoka ti masini ti fango na yaka ti ala, ala sara na ayongoro zeme; ala mu anzenze ti ala, ala leke na alikongo. Ayeke nzoni zo so ayeke na ngangu pepe atene: ‘Mbi yeke kpengba koli!’

¹¹ Ala amara so kue ayeke lango nduru na e so, ala londo hio, ala ga si! Ala bongbi tere ti ala!” *KOTA GBIA, tokua akpengba zo ti bira ti mo na tere ti ala kâ!

¹² KOTA GBIA atene: “Ayeke nzoni amara nde amu lege ague; ala gue na popo-hoto so iri ni ‘KOTA GBIA ayeke fâ ngbanga’. Kâ laa mbi yeke duti ti fâ ngbanga ti amara so kue ayeke lango nduru na kodro so.

¹³ Ala gbu nzenze na maboko, ale ti kobe abe awe. Ala ga, ala pete ale ti vinye, ngbanga ti so ndo so a yeke pete ale ti vinye daa asi awe; du so a yeke pete ale ti vinye daa asi si ayeke tuku tukungo. Biani, sioni ti azo ni ayeke mingi.”

¹⁴ Tongaso gba ti azo, gba ti azo ayeke ga na popo-hoto ti fango ngbanga. *Lango ti KOTA GBIA aga nduru awe; lango ti gango ti lo na popo-hoto ni.

¹⁵ Le ti lâ na ti nze avuko pitipiti si atongoro akiri aza pepe.

¹⁶ Ti londo na hoto ti *Sion, KOTA GBIA atoto tongana bamara; ti londo na Jérusalem, lo dekongo ngangu. Tongaso nduzu na sese ayingi ngangu. Me KOTA GBIA ayeke tongana ndo so azo ti lo ayeke bata tere ti ala daa, ndo so azo ti Israel ayeke kpe daa ti bata tere ti ala.

¹⁷ KOTA GBIA atene na ala: “Tongaso, fade ala yeke hinga atene, mbi yeke KOTA GBIA, Nzapa ti ala. Mbi yeke duti na Sion, hoto ti mbi so ayeke nde si ayeke nzoni kue. Fade Jérusalem ayeke ga mbeni ndo so ayeke nde si ayeke nzoni kue si awande ayeke kiri ti li kâ pepe.”

Fini mosoro ndali ti azo ti Nzapa

¹⁸ “Na lango ni so, fade fini vin ayeke mu ndö ti akota hoto kue, ngu ti me ti bagara ayeke sua suango na ndö ti akete hoto; na ya ti akete ngu ti Juda kue, fade ngu ayeke sua daa. Mbeni li ti ngu ayeke sigigi na ya ti kota da ti *KOTA GBIA si ayeke sua na popo-hoto ti Shitim.

¹⁹ Fade Ezipte ayeke buba kue, ye oko angba daa pepe, kodro ti Edom ayeke ga benyama, ye oko angba daa pepe, ngbanga ti aye ti ngangu so ala sara na azo ti Juda. Azo so asara sioni pepe, azo ti Ezipte na ti Edom atuku mene ti ala senge senge na kodro ti ala.

²⁰ Me ti Juda, azo ayeke ngba ti lango kâ kpu na kpu; azo ayeke ngba ti lango na Jérusalem ngu na ngu.

²¹ Biani, mbi tene: azo so atuku mene so, mbi zi ando tënë ni na li ti ala pepe, me fadeso mbi yeke zi tënë ni na li ti ala. Ti mbi KOTA GBIA, mbi yeke duti na *Sion.”