Joël 3 - Mbeti ti Nzapa - Tënë so amu fini

Fade KOTA GBIA ayeke sara titene Yingo aga na ndö ti azo kue

¹ *KOTA GBIA atene: “Na pekoni, fade mbi yeke sara titene Yingo ti mbi aga na ndö ti azo kue. Fade amolenge ti ala ti koli na ti wali ayeke tene peko ti tënë ti yanga ti mbi, ambakoro ti ala ayeke baa li ti ala, amaseka ti ala ti koli ayeke baa aye na ya ti mbeni ye tongana bango-li.

² Na ya ti alango ni so, ataa azo ti kua ti koli na ti wali, mbi yeke sara titene Yingo ti mbi aga na ndö ti ala.

³ Fade mbi yeke sara aye ti kpene na le ti nduzu nga na ndö ti sese: mene, wâ na angbongboro guru ti wâ;

⁴ lâ ayeke ga vukongo ndo, nze ayeke ga bengba tongana mene. Na pekoni, fade *lango ti KOTA GBIA ayeke si, kota lango, lango so ayeke zia mbeto na be ti zo.”

⁵ Tongaso, zo so kue ayeke iri KOTA GBIA ti mu maboko na lo, fade lo yeke soo kuâ. Na ndö ti hoto ti *Sion, na gbata ti Jérusalem, ambeni zo ayeke wara lege ti sigigi na ya ti akpale ni alingbi na tënë so KOTA GBIA atene. Azo so KOTA GBIA airi ala, ala yeke duti na popo ti azo so angba na fini.