Jérémie 6 - Mbeti ti Nzapa - Tënë so amu fini

Kota kpale ayeke hara Jérusalem

¹ Ala, azo ti Benjamin, ala sigigi na ya ti Jérusalem. Ala kpe agi ndo ti honde tere ti ala daa. Kâ na Tekoa, ala huru didi; kâ na Bet-Kerem, ala yo na nduzu mbeni bendere ti fa atene, mbeni ye ti sioni na kota kpale ti bubango ndo alondo na Banga ti ga.

² Mo *Sion, mo yeke tongana pendere maseka-wali, mo *wali-ndomo, mbi sara si yanga ti mo akanga awe.

³ Azo aga na mbage ti lo tongana awabatango-taba so aga na anyama ti ala. Azo ni asara bâbâ ti ala na tere ti gbata ni, angoro ni kue; zo oko oko aduti na ndo ti lo, lo na aturugu ti lo.

⁴ Ala dekongo, atene: “E leke tere ti e ti tiri bira na azo ti gbata ni. Ala londo ma! E gue, e gbu ala taa na bekombite. So mawa na e! Lâ aga nduru ti kui awe, agbe ti de ayeke yo.

⁵ Ala londo! E gue, e gbu ala na bi. E buba apendere da ti ala!”

⁶ Tënë so *KOTA GBIA so ayeke na ndö ti dunia kue atene ayeke so: “Ala de akeke na sese, ala bongbi sese aga *koto na tere ti Jérusalem.” Nda ti gbata ni asigigi awe: na ya ni kue, gi sarango ngangu na zo.

⁷ Sioni ti lo ayeke sigigi tongana ngu so ayeke sigigi na li ti ngu. Na ya ti gbata ni kue, zo ayeke ma gi tënë ti sarango ngangu na zo nga na tënë ti bubango ye. Lakue, mbi yeke baa gi songo tere na aka.

⁸ “Jérusalem, zia a fa nzoni lege na mo. Tongaso pepe, mbi yeke zi maboko ti mbi na tere ti mo si ndo ti mo ayeke ga ande ngonda, sese so zo oko alingbi ti duti daa pepe.”

Azo so ake ti ma ndo

⁹ Tënë so *KOTA GBIA so ayeke na ndö ti dunia kue atene ayeke so: “Tongana ti so a yeke ro ale ti *vinye so angba na ya ti keke, ayeke nzoni ala ro azo ti Israel so angba na fini so. Ala gi ndo mbirimbiri tongana ti so zo ti kongo ale ti vinye ayeke gi ndo na tere ti amaboko ti keke ti vinye.”

(Jérémie)

¹⁰ Zo wa laa mbi yeke tene tënë na lo, zo wa? Zo wa laa mbi yeke gboto mê ti lo si lo ma mbi? A fâ mê ti ala na *ganza pepe, ala lingbi ti zia mê ti ala kpoo pepe. KOTA GBIA, ala yeke he tënë ti mo na ngia, tënë ti mo anzere na ala pepe.

¹¹ Ti mbi, ngonzo ti mo, KOTA GBIA, asi be ti mbi singo. Mbi kanga be ti mbi gbaa. “Ayeke nzoni mo tuku ngonzo ni na ndö ti amolenge so ayeke na ndö ti alege; mo tuku ni na ndö ti bongbi ti amaseka. Akoli na awali, akangba na azo so ate gigi mingi, fade a yeke mu ala kue ti hon na ala.

(KOTA GBIA)

¹² Fade ada ti ala ayeke ga ti ambeni zo nde; ayaka ti ala na awali ti ala ayeke ga ti ambeni zo nde; so tënë ti yanga ti KOTA GBIA laa. Biani, fade mbi yeke yoro maboko ti mbi ti pika azo ti kodro ni,

¹³ ngbanga ti so, ti londo na kete zo na popo ti ala asi na kota zo, ala kue ayeke gi gi nzoni ti ala wani. Ti londo na wayanga-Nzapa asi na wayango-sandaga, ala kue ayeke sara gi aye ti nzi.

¹⁴ Ye ti ngangu asi na azo ti mbi tongana kota ka; me ala kanga ka ni na legeni pepe si ala yeke tene: ‘Ye kue ayeke nzoni! Ye kue ayeke nzoni!’ Andaa ye ayeke nzoni oko pepe.

¹⁵ Kamene alingbi fade ti gbu le ti ala ndali ti asioni ye so ala sara si zo alingbi ti baa na le ti lo fani use pepe; me kamene agbu le ti ala oko pepe. Ala hinga atene, so sioni ye laa ala yeke sara so pepe. Ndani laa KOTA GBIA atene: Ala yeke ti legeoko na tanga ti azo so ayeke ti. Na ndembe so mbi yeke ga na tere ti azo ni, ala nga, ala yeke ti.

¹⁶ Tënë so KOTA GBIA atene ayeke so: Lege so ala ngba ti gue daa so, ala luti kete si: ala baa ndo, ala hunda ndo na ndö ti lege so azo amu ando so: ‘Nzoni lege ayeke na ndo wa?’ Ayeke nzoni ala mu lege ni so, tongaso si fade ala duti na siriri. Me ala kiri tënë: ‘E ye ti mu lege so pepe!’

¹⁷ Mbi zia asanziri na ndö ti ala ti tene na ala ti sara hange; asanziri ni atene: ‘Ala dingi mê ti ala ti ma toto ti didi!’ Me ala kiri tënë: ‘Ngbanga ti e ayeke daa ape!’

¹⁸ Ala ma si, ala azo ti amara nde! Ayeke nzoni ala ma tënë ti ye so ayeke si na azo ti Jérusalem.

¹⁹ Ala ma si, ala azo ti sese kue: mbi yeke sara titene kota kpale ati na ndö ti azo ni, so ayeke futa ti asioni gbungo-li ti ala laa. Ala dingi mê ti ala ti ma atënë ti mbi pepe; ala baa atënë ti ndia ti mbi tongana mbumbuse ye.

²⁰ Dukani so ala mu kâ na Saba a ga na ni na mbi so, nyen laa mbi yeke sara na ni, nyen? Pere ti sarango na yombo so afun nzoni si ala mu kâ na mbeni kodro yongoro aga na ni na mbi so, nyen laa mbi yeke sara na ni, nyen? Be ti mbi ake tënë ti asandaga ti ala so a yeke gbi ni kue na wâ; asandaga ti anyama ti ala anzere na mbi pepe.

²¹ Ndani laa, tënë so KOTA GBIA atene ayeke so: Mbi yeke zia na lege ti azo so mbeni ye titene ala pika gere ti ala daa si ala ti: ababâ na amolenge ti ala ayeke ti legeoko, azo so ayeke nduru na ala nga na amba ti ala ayeke kui.”

Wato alondo na Banga si ayeke ga

²² Tënë so KOTA GBIA atene ayeke so: “Mbeni mara alondo na mbeni kodro ti Banga si ayeke ga; mbeni kota mara alondo yongoro na nda ti sese si ayeke ga.

²³ Aturugu ti mara ni so agbu akokora na alikongo. Ala yeke sioni mingi, ala yeke baa mawa ti zo pepe; go ti ala ayeke toto tongana kota ngu-ingo. Ala ko na ndö ti ambarata; ala leke tere ti ala awe ti tiri bira na *Sion, pendere maseka-wali.”

(Azo ti kodro)

²⁴ “Na mango tënë so, e woko kue si be ti e afun kue. E baa pasi tongana wali na ndembe ti dungo ni.

²⁵ Ala sigigi ti gue na yaka pepe, ala fono na ndö ti alege pepe, ngbanga ti so wato ayeke kâ si lo yeke fâ azo; mbeto ayeke mbage na mbage kue.”

(KOTA GBIA)

²⁶ “Ala azo ti mbi, ayeke nzoni ala yu bongo ti mua, ala rule tere ti ala na ya ti fuku ti sese, ala sara aye so kue zo ayeke sara na ngoi ti mua, ala toto na ngu ti le tongana ti so zo ayeke toto ndali ti oko molenge ti lo ti koli so akui. Biani, gi hio tongaso, wato ayeke ga ti hunzi e kue!”

Ala yeke tongana wen so a zi puru ni daa gbaa (KOTA GBIA)

²⁷ “Jérémie, mbi zia mo titene mo ga zo ti tarango azo ti mbi tongana ti so zo ti pikango ndao ayeke tara wen. Fade mo yeke tara sarango ye ti ala si mo hinga ni.”

(Jérémie)

²⁸ Ala kue ayeke azo ti ngangu li, li ti ala akpengba ahon ndoni; li ti ala akpengba tongana bengba wen nga na wen. Ala yeke du mvene na li ti azo, ala kue ayeke azo ti bubango ye.

²⁹ Ye ti pengo na wâ ti ndao ayeke pe wâ ngangu ti zi azende na tere ti wen ni. Me ala pe wâ ni gbaa ti zi apuru ti wen ni daa; apuru ni alondo pepe.

³⁰ A di iri ti azo ni, atene: “Wen ti nginza so abuba”, ngbanga ti so KOTA GBIA ake ala awe.