Jérémie 5 - Mbeti ti Nzapa - Tënë so amu fini

Siokpari ti azo ti Jérusalem ahon ndoni (KOTA GBIA)

¹ “Ala tambula na ndö ti alege ti Jérusalem mbage na mbage kue, ala baa ndo, ala hunda ndo, ala gi ndo na ndö ti abalabala ti wara mbeni zo, zo so ayeke sara ye mbirimbiri, zo so ayeke sara ye na legeni. Tongana ala wara mbeni zo oko tongaso, fade mbi yeke zi siokpari na li ti azo ti Jérusalem.”

(Jérémie)

² Ala yeke deba yanga ti ala, atene: “*KOTA GBIA ayeke na fini!” Andaa so ayeke dengo ba ti mvene.

³ KOTA GBIA, ye so anzere na mo ayeke titene zo asara lakue ye so ayeke na legeni; ni laa ape? Mo pika ala, me pika ni aso ala pepe. Mo ye ti nika ala biani biani, me ala ke ti ma ye so mo fa na ala. Li ti ala akpengba ahon têne, ala ke ti kiri na mbage ti mo.

⁴ Mbi tene na be ti mbi, mbi tene: “Azo so ayeke akete zo, ala hinga ndo pepe. Ye so KOTA GBIA aye, ala hinga ni pepe; ala hinga atënë ti ndia ti Nzapa ti ala pepe.

⁵ Tongaso fade mbi yeke gue na mbage ti akota zo si mbi tene tënë na ala. Ala laa ahinga ye so KOTA GBIA aye; ala laa ahinga atënë ti ndia ti Nzapa ti ala.” Me ala kue ayeke gi legeoko: ala ke ti duti na gbe ti komandema ti KOTA GBIA, ala fâ ya ti ye so abongbi ala na Nzapa awe.

⁶ Ndani laa fade abamara ti gbako ayeke gbu ala, ambo ti benyama ayeke suru ya ti ala. Aze ayeke ku ala na tere ti agbata ti ala. Azo so kue alondo na ya ti agbata ni ti sigigi, aze ni ayeke gbu ala si ayeke suru ya ti ala, ngbanga ti so ala sara ngangu li ahon ndoni; ala sara aye gbani gbani so ake Nzapa.

(KOTA GBIA)

⁷ “Jérusalem, fade mbi yeke zi siokpari na li ti mo tongana nyen? Amolenge ti mo azia mbi awe; ala yeke deba na iri ti aye so ayeke Nzapa pepe. Mbi mu na ala anzoni ye kue so alingbi; me ala gue na peko ti koli wala wali nde, ala yeke gbugburu tere ti ala na da ti wali-ndumba.

⁸ Ala yeke tongana akoli-mbarata so akono mingi! So ngoi ti ala ti gingo awali alingbi awe, ala yeke toto totongo na peko ti wali ti amba ti ala.

⁹ Fade mbi yeke ga na tere ti azo tongaso pepe? Ti mara ti azo tongaso, mbana alingbi na mbana pepe? So tënë ti yanga ti KOTA GBIA laa.

¹⁰ Ala mondee na li ti agbagba ti azo ti mara ni, ala buba aye; me ala buba ye kue pepe! Ala fâ gi amaboko ti *vinye ti azo ni; amaboko ni so ayeke ti KOTA GBIA pepe.

¹¹ Azo ti Israel na azo ti Juda ahanda mbi biani awe”; so tënë ti yanga ti KOTA GBIA laa.

Nzapa ake azo ti Israel

¹² Azo ti Juda abere tënë ti KOTA GBIA, ala tene: “Lo yeke daa lawa! Fade mbeni ye ti sioni ayeke wara e pepe; bira wala nzara ayeke si na e pepe.

¹³ Awayanga-Nzapa ayeke ga gi pupu senge! Nzapa laa ayeke tene tënë na lege ti ala pepe. Ayeke nzoni aye so ala yeke fa asi na ala wani.”

¹⁴ Ndani laa, tënë so KOTA GBIA Nzapa so ayeke na ndö ti dunia kue atene ayeke so: “Ndali ti atënë so ala tene, tënë so mbi zia na yanga ti mo ti tene, mbi yeke sara si aga tongana wâ; mbi yeke sara si azo so aga tongana keke so wâ ni ayeke gbi ni kue.

¹⁵ So tënë ti yanga ti KOTA GBIA laa: Ti ala azo ti Israel, mbi yeke tokua mbeni mara so alondo na yongoro ndo ti ga na tere ti ala; ayeke mara so ala lingbi ti kinda ni pepe, mara ni ayeke ando giriri; ala hinga yanga ti kodro ti azo ti mara ni pepe, ala ma ya ti atënë so ala yeke tene pepe.

¹⁶ Bozo ti kokora ti ala ayeke tongana du ti kuâ so yanga ni azi kota. Azo ni kue ayeke angangu zo ti bira.

¹⁷ Fade ala yeke te ale ti kobe ti mo na mapa ti mo kue; ala yeke te amolenge ti mo ti koli na ti wali; ala yeke te anyama ti mo kue: abagara, ataba na angasa; ala yeke te akeke ti *vinye na ti fige ti mo. Agbata ti mo so gbagba ti bira ayeke na tere ni si mo baa mo tene, mbeni sioni ye ayeke wara mo na ya ni pepe so, fade ala yeke buba ni kue na lege ti bira.

¹⁸ “Ataa na ngoi ni so, fade mbi yeke fâ ala kue pepe; so tënë ti yanga ti KOTA GBIA laa.

¹⁹ Tongana ala tene: ‘KOTA GBIA Nzapa ti e asara ye so kue na e ngbanga ti nyen?’, fade mo yeke kiri tënë na ala, mo tene: Na ya ti kodro ti ala wani, ala zia mbi ti sara na anzapa ti awande. Ndani laa, fade ala yeke sara na awande na ya ti kodro so ayeke ti ala, azo ti Israel pepe.”

Azo abaa ngangu ti Nzapa tongana senge ye

²⁰ KOTA GBIA atene: “Ayeke nzoni ala fa tënë so na *ahale ti Jacob. Ala sara si azo ti Juda ama tënë so.

²¹ Ala ma tënë so, ala abuba zo so li ti ala ayeke daa pepe so. Ala yeke na le, me ala baa ndo pepe; ala yeke na mê, me ala ma ndo pepe.

²² Ala kpe mbeto ti mbi pepe? So tënë ti yanga ti KOTA GBIA laa. Tere ti ala ado na dawa ti mbi pepe? Mbi laa mbi zia mbutu ti sara si kota ngu-ingo angba na ndo so ayeke daa. So ayeke katikati so angba kpu na kpu; kota ngu-ingo ni ayeke hon ni pepe. Ataa *amapo ti ngu ni alondo tongana nyen, ngu ni alingbi ti hon ndö ni pepe.

²³ Me mara ti azo so, be ti ala akpengba mingi, ala yeke azo ti ngangu li. Ala gboto tere ti ala si ala hon.

²⁴ Ala tene na be ti ala pepe, atene: ‘Ayeke nzoni e kpe mbeto ti KOTA GBIA, Nzapa ti e, lo so lo yeke mu na e ngu-Nzapa na ngoi ni so alingbi: ngu-Nzapa ti kozo ngoi, ngu-Nzapa ti ndangba ngoi. Na ya ti ngu oko oko, lo laa lo yeke bata na e ngoi ti kongo ale ti kobe.’

²⁵ Sioni ti ala laa abuba lege ti aye so kue, siokpari ti ala laa akanga lege na ala ti wara anzoni ye so.

²⁶ Na popo ti azo ti mbi, azo ti sioni ayeke daa. Ala honde tere ti ala ti ku tongana zo ti gingo andeke. Ala sara akuku ti gbu na azo.

²⁷ Tongana sakpa so ya ni asi na andeke, ya ti da ti ala asi singo na aye ti handa. Lege so ala yeke ga akota zo na azo ti mosoro laa.

²⁸ Ala kono mingi si tere ti ala ayeke za zango. Ala hon azo kue na sarango sioni. Ala yeke fâ ngbanga na legeni pepe; ala yeke baa tënë ti nyindu na legeni pepe; tongaso pepe, ka nyindu ni abaa nzoni. Ala yeke baa tënë ti awayere na legeni pepe.

²⁹ Fade mbi yeke ga na tere ti azo tongaso pepe? Ti mara ti azo tongaso, mbana alingbi na mbana pepe? So tënë ti yanga ti KOTA GBIA laa.

³⁰ Mbeni ye ti sioni mingi na kota ye ti buba asi na ya ti kodro so awe:

³¹ awayanga-Nzapa ayeke tene peko ti atënë ti mvene; awayango-sandaga ayeke gi ti wara aye ndali ti ala wani si azo ti mbi ayeda na sarango aye tongaso. Na ndani, fade ala yeke sara nyen?”