Jérémie 49 - Mbeti ti Nzapa - Tënë so amu fini

Tënë na ndö ti azo ti mara ti Amon

¹ Tënë na ndö ti azo ti mara ti Amon. Tënë so *KOTA GBIA atene ayeke so: “Israel ayeke na molenge-koli pepe? Israel ayeke na mbeni zo ti wara aye na peko ti lo pepe? Ngbanga ti nyen si nzapa Milkom amu sese ti Gad si aga ti lo so? Ngbanga ti nyen si azo ti Milkom amu gbata ti Gad si ayeke lango daa so?

² Ndani laa, ambeni lango ayeke ga so mbi yeke sara titene azo ama dekongo ti bira na Raba, li-kodro ti azo ti mara ti Amon; so tënë ti yanga ti KOTA GBIA laa. Fade gbata ni ayeke ga ngonda, wâ ayeke gbi akete kodro so ayeke na tere ni. Na pekoni, Israel ayeke kiri ti mu ye so ayeke lani ti lo.” Tënë so KOTA GBIA atene laa.

³ Ala, azo ti Heshebon, ala he bia ti totongo kuâ, ala tene: “A buba gbata ti Ai kue awe!” Ala, akete kodro so ayeke nduru na Raba, ala dekongo ngangu! Ala yu bongo ti mua, ala dema tere, ala tambula asi kâ, asi ge na ya ti gbagba: a gbu nzapa Milkom ti gue na lo na kodro wande, lo na awayango-sandaga ti lo na amakonzi ti lo.

⁴ Ae, gbata ti Raba, molenge-wali ti ngangu li! Ando mo yeke pika kate ti mo ndali ti popo-hoto ti mo; popo-hoto ti mo so ayeke pendere mingi so. Ando mo zia be ti mo na ndö ti amosoro ti mo, mo tene: “Zo wa laa ayeke ga ti tiri bira na mbi, zo wa?”

⁵ Mbi yeke sara titene kota mbeto aga na ndö ti mo; mbeto ni ayeke londo mbage na mbage kue si aga na ndö ti mo; so tënë ti yanga ti Kota Gbia NZAPA so ayeke na ndö ti dunia kue laa. Fade ala yeke kangbi kirikiri si zo oko oko akpe, lo baa ndo na peko pepe. Azo so ayeke kpe, zo oko ti bongbingo ala ayeke daa pepe.

⁶ Me na pekoni, mbi yeke sara si azo ti mara ti Amon akiri na kozo ndo ti ala. So tënë ti yanga ti KOTA GBIA laa.

Tënë na ndö ti Edom

⁷ Tënë na ndö ti Edom. Tënë so KOTA GBIA so ayeke na ndö ti dunia kue atene ayeke so: “Azo ti ndara ayeke na Teman mbeni pepe? Li ti azo ti hingango ndo ayeke daa mbeni pepe? Ndara ti ala afun awe?

⁸ Ala azo ti Dedan, ala turne peko, ala kpe! Ala honde tere ti ala na ya ti adu ti têne! Mbi yeke sara si ye ti vundu aga na ndö ti ala, *ahale ti Ezau; ndembe titene mbi ga na tere ti ala alingbi awe.

⁹ Tongana azo ti kongo ale ti *vinye asi na ndo ti ala, azo ni ayeke zia le ti vinye oko angba pepe. Tongana azo ti nzi aga na bi, ala yeke buba ye so kue ala lingbi ti buba ni.

¹⁰ Ala, *ahale ti Ezau, mbi laa mbi yeke zi aye ti ala na maboko ti ala, mbi yeke fa ndo so ala honde tere ti ala daa: ala lingbi ti honde tere ti ala mbeni pepe. Mara ti ala, na a-ita ti ala na azo so ayeke nduru na ala, fade a yeke hunzi ala kue; zo ayeke kiri ti tene na ala pepe, atene:

¹¹ ‘Ala zia anyindu ti ala na mbi senge; mbi laa, fade mbi yeke bata ala. Awali-mua ti ala alingbi ti zia be ti ala na ndö ti mbi senge.’ ”

¹² Tënë so KOTA GBIA atene ayeke so: “Azo so alingbi fade ti nyon kopo ti mbi pepe, a fâ ngbanga na li ti ala titene ala nyon ni. Ti mo, Edom, mo lingbi ti kpe ngbanga ni tongana nyen? Fade mo yeke sigigi na ya ni oko pepe. Kopo ni so, fade mo yeke nyon ni biani!

¹³ Mbi KOTA GBIA, mbi deba na iri ti mbi wani: Fade Bosra, li-kodro ti mo ayeke ga ngonda, ye ti hengo na ngia, ndo ti gba ti atêne; ayeke ga nga tapande ndali ti azo so ayeke deba amba ti ala. Agbata so ayeke na tere ni ayeke ga ndo ti gba ti atêne kpu na kpu.” So tënë ti yanga ti KOTA GBIA laa.

¹⁴ Mbi ma mbeni tënë so alondo na KOTA GBIA si mbeni watokua ague na ni na amara kue; tënë ni atene: “Ala bongbi tere ti ala! Ala londo ague na tere ti Edom! Ala londo! Ala tiri bira!”

¹⁵ “Biani, Edom, mbi yeke sara si mo ga ndangba ti amara kue; mbi yeke sara si azo abaa mo tongana mbumbuse ye.

¹⁶ Ando, mo yeke zia mbeto na be ti azo kue, mo baa tere ti mo kota mo hon azo kue, andaa mo handa tere ti mo wani. Mo so mo yeke lango na ya ti adu ti têne so, mo so ndo ti duti ti mo ayeke na li ti ahoto so, ataa mo sara da ti mo yongoro na nduzu ahon ti *ngoalo, mbi yeke gboto mo kâ ti bi mo na sese.” So tënë ti yanga ti KOTA GBIA laa.

¹⁷ “Fade Edom ayeke ga kota ngonda; azo so ayeke hon na tere ni, li ti ala ayeke kpe si ala yeke huru yanga ti ala na bango akota kpale so asi na lo.

¹⁸ KOTA GBIA atene: Fade kota kpale ni ayeke duti legeoko tongana ti so asi na Sodome na Gomore, nga na agbata so ayeke na tere ni. Zo ayeke kiri ti duti na ya ti kodro ni pepe, a yeke kiri ti baa le ti zo oko na ya ni pepe.”

¹⁹ KOTA GBIA atene: “Mbi yeke duti tongana bamara so asigigi na ya ti pere ti yanga ti ngu ti Jourdain ti gue na ndo so anyama ayeke wara fini pere daa. Gi hio tongaso, mbi yeke sara si azo ni kue alondo ahon. Na pekoni, mbi yeke zia na ndö ti Edom makonzi so mbi yeke soro lo. Biani, zo wa laa alingbi na mbi, zo wa? Zo wa laa alingbi ti gue na mbi na gbe ti ngbanga, zo wa? Zo ti li ni wa laa alingbi ti gbu le ni na mbi, zo wa?”

²⁰ Azo, ala ma tënë ti ye so KOTA GBIA agbu li ti lo ti sara na Edom, tënë ti ye so lo leke na be ti lo ti sara na azo so alango na Teman. Biani, fade a yeke gbu ala ti hon na ala tongana akete bagara. Biani, ndali ti ala, fade a yeke buba ndo ti dutingo ti ala.

²¹ Gi so azo ama tënë ti tingo ti ala awe, sese ayingi; azo ama dekongo ti ala kâ na kota ngu-ingo ti Asosongo.

²² Wato azi ya ti *kpangi ti lo, lo yeke huru na le ti nduzu tongana *ngoalo na ndö ti gbata ti Bosra. Na lango ni so, fade be ti angangu zo ti bira ti Edom ayeke fun kue tongana ti wali na ndembe ti dungo ni.

Tënë na ndö ti Damas

²³ Tënë na ndö ti Damas. “Kamene ahon ndö ti azo ti agbata ti Hamat na ti Arpad, ngbanga ti so ala ma sioni sango si ala yeke gi be ti ala. Ala yeke do tongana kota ngu-ingo so alingbi ti duti kpoo pepe.

²⁴ Be ti azo ti Damas awoko kue awe, ala turne tere ti ala ti kpe ti hon, ala yeke do na mbeto. Be ti ala afun kue si ala yeke baa pasi tongana wali na ndembe ti dungo ni.

²⁵ So nyen! Azo akpe gbata ni kue awe, gbata so iri ni awu lani mingi so, gbata so azia ngia na be ti mbi so!

²⁶ Biani, na lango ni so, amaseka-koli ti lo ayeke ti kirikiri na be ti lege si aturugu ti lo kue ayeke kui; so tënë ti yanga ti KOTA GBIA so ayeke na ndö ti dunia kue laa.

²⁷ Mbi yeke bi wâ na gbagba ti Damas; wâ ni ayeke gbi yangbo ti gbia Ben-Hadad.”

Tënë na ndö ti a-arabu

²⁸ Tënë na ndö ti a-arabu ti Kedar na akodro-gbia ti Hasor so Nabukodonosor, gbia ti Babilone, akinda ala na ya ti bira. Tënë so *KOTA GBIA atene ayeke so: “Ala azo, ala londo! Ala gue na tere ti Kedar ti mu ni na bira! Ala buba ye kue na ndo ti azo ti benyama!

²⁹ Ayeke nzoni ala gbu ada ti bongo na abagara ti azo ni, abongo ti ala ti sarango na da nga na akungba ti ala ahon na ni. Ala mu nga *azambala ti azo ni ahon na ni; ala dekongo na li ti ala, atene: ‘Mbeto ayeke mbage na mbage kue!’

³⁰ Ala azo ti Hasor, ala kpe, ala hon hio! Ala honde tere ti ala na ya ti adu ti têne! So tënë ti yanga ti KOTA GBIA laa. Biani, Nabukodonosor, gbia ti Babilone, agbu li ti lo ti sara sioni na ala, lo leke na be ti lo ti sara sioni na ala.

³¹ Ala londo! Mara so aduti ti lo gi kpoo so, ala gue, atiri bira na lo! So tënë ti yanga ti KOTA GBIA laa. Azo ni abaa lani atene, sioni ye ayeke si na ala pepe; ada ti ala, yanga ni ayeke daa pepe, kerere ayeke nga daa pepe; ala duti ti ala lani yamba!

³² Fade awato ayeke mu azambala ti azo ni nga na gba ti abagara ti azo ni tongana ye so a gbu na peko ti bira. Azo so ayeke kio kua ti tere ti li ti ala, mbi yeke kangbi ala na ando nde nde kue. Mbi yeke sara si akpale alondo mbage na mbage ti ga na ndö ti ala; so tënë ti yanga ti KOTA GBIA laa.

³³ Gbata ti Hasor ayeke ga ndo ti lango ti *anzagua; gbata ni ayeke ga kota ngonda kpu na kpu; zo ayeke kiri ti lango ndo so pepe, a yeke kiri ti baa le ti zo oko na ndo so pepe.”

Tënë na ndö ti Elam

³⁴ Tënë ti *KOTA GBIA asi na wayanga-Nzapa Jérémie ndali ti azo ti sese ti Elam. Tënë ni asi na lo na ngoi so Sedesias, gbia ti Juda, ato nda ti le-gbia.

³⁵ Tënë so KOTA GBIA so ayeke na ndö ti dunia atene ayeke so: “Mbi yeke fâ ya ti kokora ti azo ti Elam so ayeke sara ngangu ti ala.

³⁶ Ti londo na Banga asi na Mbongo, nga na To asi na Do, mbi yeke tokua apupu osio ti ga na mbage ti Elam. “Mbi yeke kangbi azo ti Elam na mbage kue. Azo ti Elam so akpe kodro ti ala ti gue na kodro wande, ala yeke duti na ya ti akodro mobimba.

³⁷ Mbi yeke sara si azo ti Elam ado na mbeto na le ti awato ti ala nga na le ti azo so aye gi kuâ ti ala. Ye ti vundu so mbi yeke tokua ti ga na ndö ti ala ayeke ngonzo ti mbi ti wâ; so tënë ti yanga ti KOTA GBIA laa. Mbi yeke tumba peko ti ala na bira ngbii mbi hunzi ala kue.

³⁸ Mbi yeke zi na sese ti Elam gbia na akota zo ti lo, mbi yeke zia na ya ti kodro ni mbata ti mbi ti gbia; so tënë ti yanga ti KOTA GBIA laa.

³⁹ Me mbeni lâ, mbi yeke sara si Elam akiri na kozo ndo ti lo.” So tënë ti yanga ti KOTA GBIA laa.