Jérémie 47 - Mbeti ti Nzapa - Tënë so amu fini

Tënë na ndö ti azo ti Filistii

¹ Tënë ti *KOTA GBIA asi na wayanga-Nzapa Jérémie ndali ti azo ti Filistii. Tënë ni asi na lo kozoni si Faraon ague ti tiri bira na Gaza.

² Tënë so KOTA GBIA atene ayeke so: “Baa, ngu so asuku alondo na Banga ti ga; aga ngu so ayeke sua ngangu, asuku amu le ti kodro kue nga na aye so ayeke na ya ni; amu agbata na azo so ayeke lango na ya ni. Azo ato nda ti dekongo; azo ti kodro kue ayeke he bia ti totongo kuâ.

³ Ala ma toto ti gere ti ambarata so ado sese ngangu; ala ma toto ti apusu ti mbarata na toto ti gere ti apusu ni. Tongaso be ti ababâ awoko kue, be ti ala agirisa na amolenge ti ala,

⁴ ngbanga ti so lango titene ye kue abuba na ndo ti azo ti Filistii alingbi awe, lango ti zi na gbata ti Tir na ti Sidon zo so angba na fini si alingbi ti mu maboko na ala. Biani, KOTA GBIA abuba ye kue na ndo ti azo ti Filistii, so ti tene azo ti zoa ti Kaftor so angba na fini.

⁵ Na Gaza, azo afâ kua ti li ti ala; na Askalon, ndo ade ngii. Ala azo so ayo mingi si ala ngba na fini so, ala yeke ngba ti suru tere ti ala na ka ngbii asi lawa?

⁶ Ala tene: ‘So mawa! Yongoro zeme ti KOTA GBIA, mo yeke wu ka tere ti mo pepe? Kiri na ya ti bozo ti mo, mo duti kpoo! Awe!’

⁷ – Me yongoro zeme ni alingbi ti wu tere ti lo tongana nyen? KOTA GBIA laa amu yanga na lo ti gue ngbii ti si na Askalon nga na tere ti kota ngu-ingo. Ndo so lo mu yanga na lo ti si daa laa.”