Jérémie 45 - Mbeti ti Nzapa - Tënë so amu fini

Tënë ndali ti Baruk

¹ Na ngu osio ni so Yoakim, molenge ti Yosias ayeke gbia ti Juda laa Baruk, molenge ti Neria asu na mbeti atënë so asigigi na yanga ti wayanga-Nzapa Jérémie. Jérémie atene na Baruk:

² “Baruk, tënë so *KOTA GBIA, Nzapa ti Israel atene ndali ti mo ayeke so:

³ Mo tene: ‘So mawa na mbi! Mbi baa pasi kozoni awe, me KOTA GBIA akiri azia mbeni vundu na ndö ni! Mbi woko kue awe na peko ti dema ti mbi; mbi wara lege ti wu tere pepe!’

⁴ Baa, tënë so mo yeke tene na Baruk laa: Tënë so KOTA GBIA atene ayeke so: ‘Ye so mbi leke na nduzu, mbi yeke kungbi ni na sese; ye so mbi lu, mbi yeke gboto ni. Fade mbi yeke sara tongaso na ya ti kodro ni kue.

⁵ Ti mo, mo yeke gi lege ti wara akota ye ndali ti mo wani? Mo gi ye oko pepe! Biani, kpale so mbi yeke tokua ni ayeke ti na ndö ti ye so ayeke na fini; so tënë ti yanga ti KOTA GBIA laa. Me ti mo, mbi mu na mo pasa ti soo fini ti mo na ndo so kue mo yeke hon ande daa.’ ”