Jérémie 42 - Mbeti ti Nzapa - Tënë so amu fini

Azo so angba na fini abaa Jérémie na tënë ti ala

¹ Tongaso amakonzi kue ti aturugu, mbirimbiri Yohanan, molenge ti Karea, lo na Yezania, molenge ti Hoshaya nga na azo so kue ayeke na ndo so, akete zo na akota zo, ague nduru na

² wayanga-Nzapa Jérémie si ala tene na lo: “E gbu gere ti mo, ayeke nzoni vorongo tere ti e agbu be ti mo. Sambela *KOTA GBIA, Nzapa ti mo ndali ti tanga ti e so e ngba na fini so. Lani e yeke mingi, fadeso e ngba gi kete, tongana ti so mo yeke baa na le ti mo so.

³ Ayeke nzoni KOTA GBIA, Nzapa ti mo afa na e lege so e lingbi ti mu nga na ye so e lingbi ti sara.”

⁴ Wayanga-Nzapa Jérémie atene na ala: “Mbi ma awe! Fade mbi yeke sambela KOTA GBIA, Nzapa ti ala tongana ti so ala hunda na mbi. Na pekoni, tënë so kue KOTA GBIA ayeke kiri ni na ala, fade mbi yeke fa ni na ala; mbi yeke honde tënë oko na ala pepe.”

⁵ Ala kiri tënë na Jérémie: “E deba yanga ti e ti sara ye alingbi gi na tënë so KOTA GBIA, Nzapa ti mo ayeke fa na mo ti tene na e. Ayeke nzoni lo duti taa lo so ayeke bi tënë na li ti e tongana e sara ye alingbi na tënë ti yanga ti e ni pepe!

⁶ E tokua mo na KOTA GBIA, Nzapa ti e ti hunda lo na tënë ti e. Fade e yeke sara ye alingbi na yanga so KOTA GBIA ayeke mu na e, ataa tënë ni anzere na be ti e wala anzere na be ti e pepe. Tongaso, fade e yeke baa nzoni, ngbanga ti so e ma yanga ti KOTA GBIA, Nzapa ti e.”

⁷ Lango baleoko na pekoni, tënë ti KOTA GBIA asi na Jérémie.

⁸ Jérémie airi Yohanan, molenge ti Karea; lo iri nga amakonzi ti aturugu so kue ayeke na tere ti Yohanan nga na azo so ayeke na ndo so, akete zo na akota zo.

⁹ Lo tene na ala: “Ala tokua mbi titene mbi fa na KOTA GBIA, Nzapa ti Israel ye so ala voro tere ti ala daa. Tënë so lo tene ayeke so:

¹⁰ ‘Tongana ala yeda ti ngba na ya ti kodro so, fade mbi yeke kiri ti leke ala na nduzu, mbi yeke kiri ti kungbi ala na sese pepe; mbi yeke kiri ti lu ala tongana ti so a yeke lu keke, mbi yeke kiri ti gboto ala pepe. Fade mbi yeke zia lege ti sioni ye so mbi sara na ala.

¹¹ Fadeso ala kiri asara mbeto ti gbia ti Babilone pepe, lo so mbeto ti lo ahon ndö ti ala so. Ala sara mbeto ti lo pepe! So tënë ti yanga ti KOTA GBIA laa. Biani, mbi yeke na ala ti soo ala, ti zi ala na maboko ti lo.

¹² Fade mbi yeke baa mawa ti ala; lo nga lo yeke baa mawa ti ala si lo yeke zi lege na ala titene ala kiri na sese ti ala.’ ”

¹³ Jérémie akiri atene: “Me tongana ala ke ti ma yanga ti KOTA GBIA, Nzapa ti ala si ala tene: ‘Ên-en, e ye ti duti na ya ti kodro so pepe;

¹⁴ e yeke gue na Ezipte. Kâ, fade e yeke kiri ti hinga ye so iri ni bira pepe, e yeke kiri ti ma toto ti tatalita pepe si nzara ayeke kiri ti fâ e pepe. E yeke sara kodro gi kâ!’

¹⁵ Tongana ye ni ayeke tongaso, ala atanga ti azo ti Juda, ala ma tënë so KOTA GBIA atene. Tënë so KOTA GBIA so ayeke na ndö ti dunia kue, Nzapa ti Israel atene ayeke so: ‘Tongana ala ye biani ti gue na Ezipte, tongana ala gue ti honde tere ti ala kâ,

¹⁶ bira so ala yeke sara mbeto ni so, fade ayeke wara ala kâ; nzara so ayeke sara si ala yeke gi be ti ala mingi so, fade ayeke tumba peko ti ala ti wara ala kâ; kâ laa ala yeke kui.

¹⁷ Azo so kue ayeda ti honde tere ti ala na Ezipte, fade ala yeke kui na lege ti bira, kota nzara na sioni kobela ti bubango kodro. Kpale so mbi yeke sara si aga na ndö ti ala, zo oko ayeke sigigi na ya ni pepe, zo oko ayeke ngba na fini pepe.’ ”

¹⁸ Jérémie akiri atene: “Tënë so KOTA GBIA so ayeke na ndö ti dunia kue, Nzapa ti Israel atene ayeke so: ‘Ngonzo ti mbi na ngonzo ti mbi ti wâ alondo lani na tere ti azo ti Jérusalem. Legeoko nga, fade mbi tuku ngonzo ni na ndö ti ala, azo ti Juda, tongana ala si na Ezipte. Tongaso, fade ala ga tapande ndali ti azo so ayeke deba amba ti ala, ala yeke ga ye ti dongo be, ye ti dengo ba na ye ti ziango kamene na le ti zo. Ala yeke kiri ti baa kodro so oko pepe.’ ”

¹⁹ “Ala atanga ti azo ti Juda, KOTA GBIA atene na ala: Ala gue na Ezipte pepe! Ala ma tënë so nzoni: laso, mbi tene tënë so na ala polele!

²⁰ Ala tokua mbi na KOTA GBIA, Nzapa ti ala ti hunda lo ndali ti tënë ti ala. Ala tene na mbi: ‘Sambela KOTA GBIA, Nzapa ti e ndali ti e. Tënë so kue KOTA GBIA ayeke tene, tene na e, fade e yeke sara ni.’ Andaa kuâ laa ala iri na ndö ti ala.

²¹ Biani, laso, mbi tene tënë ni na ala awe; me ala ma yanga ti KOTA GBIA Nzapa ti ala pepe; atënë so lo zia na yanga ti mbi ti tene na ala, ala ma ni oko pepe.

²² Ti fadeso, kite ni ayeke daa pepe: fade ala yeke kui na lege ti bira, kota nzara na sioni kobela ti bubango kodro na ya ti kodro so ala ye ti gue ti honde tere ti ala daa.”