Jérémie 38 - Mbeti ti Nzapa - Tënë so amu fini

A bi Jérémie na ya ti du ti ngu

¹ Shefatia, molenge ti Matan, Gedalia, molenge ti Pashehur, Yukal, molenge ti Shelemia na Pashehur, molenge ti Malkia, ama atënë so Jérémie ayeke tene na azo kue, atene:

² “Tënë so *KOTA GBIA atene ayeke so: ‘Zo so ayeke ngba ande na ya ti gbata so, fade lo yeke kui na lege ti bira, kota nzara na sioni kobela ti bubango kodro. Me zo so ayeke sigigi na ya ti gbata ni ti zia tere ti lo na maboko ti azo ti Babilone, fade lo yeke soo fini ti lo; ye so ayeke ngba na lo ayeke gi fini ti lo.’ ”

³ “Tënë so KOTA GBIA atene ayeke so: ‘Fade gbata so ayeke ti biani na maboko ti aturugu ti gbia ti Babilone si ala yeke mu ni.’ ”

⁴ Na pekoni, akota zo ti kodro ni atene na gbia Sedesias: “E ye gi kuâ ti Jérémie, ngbanga ti so atënë so lo yeke tene, asara si be ti aturugu nga na be ti azo ti kodro kue awoko. Koli so aye nzoni ti azo ti kodro so pepe, me lo ye gi sioni ti ala.”

⁵ Tongaso gbia Sedesias akiri tënë na ala: “Lo laa na maboko ti ala so! Ataa so mbi yeke gbia, mbi lingbi ti kanga lege na ala pepe.”

⁶ Tongaso ala mu Jérémie si ala bi lo na ya ti du ti ngu ti Malkia, molenge ti gbia. Du ti ngu ni ayeke na ya ti gbagba ti aturugu ti batango gbia. Ala zia lo na ya ti du ni na lege ti kamba. Na ya ti du ni, ngu ayeke daa pepe, gi potopoto. Nilaa Jérémie alinda na ya ti potopoto ni.

⁷ Andaa Ebed-Melek, mbeni zo ti Etiopii ayeke daa. Lo yeke mbeni kota zo so ayeke sara kua na yangbo ti gbia; lo ma a tene, a zia Jérémie na ya ti du ti ngu. Me gbia ayeke duti na yanga ti gbagba so iri ni Benjamin.

⁸ Tongaso Ebed-Melek asigigi na yangbo ti gbia, lo gue, lo baa gbia si lo tene na lo:

⁹ “Babâ gbia, ye so kue azo so asara na wayanga-Nzapa Jérémie so ayeke sioni mingi; ala bi lo na ya ti du ti ngu! Lo yeke kui na ya ti du ni, ngbanga ti so kobe ayeke na ya ti gbata ni mbeni pepe.”

¹⁰ Tongaso gbia amu yanga na Ebed-Melek, zo ti Etiopii ni, atene: “Mu akoli baleota na tere ti mo, mo gi lege ti sigigi na Jérémie na ya ti du ti ngu ni, tongaso si lo kui pepe.”

¹¹ Ebed-Melek amu akoli baleota so si ague na ala. Lo gue, lo si na yangbo ti gbia, na ya ti mbeni kubu so ayeke na gbe ti da ti mosoro. Kâ, lo mu agbagba bongo so asuru kue, lo kanga ni na yanga ti kamba si lo yoro ni na Jérémie na ya ti du ni.

¹² Na pekoni Ebed-Melek, zo ti Etiopii ni atene na Jérémie: “Zia agbagba bongo ni na gbe ti maboko ti mo; mo zia kamba ni na ndö ni.” Jérémie asara ye ni tongaso.

¹³ Akoli ni agboto Jérémie na kamba ni si ala sigigi na lo na ya ti du ni. Na pekoni Jérémie angba na ya ti gbagba ti aturugu ti batango gbia.

Gbia Sedesias akiri abaa Jérémie na tënë ti lo

¹⁴ Gbia Sedesias atokua mbeni zo ti gue ti ga na wayanga-Nzapa Jérémie; lo na Jérémie awara tere na ota yanga ti kota da ti Nzapa. Gbia atene na Jérémie: “Mbi ye ti hunda na mo mbeni tënë; mo honde ye oko na mbi pepe.”

¹⁵ Jérémie akiri tënë na Sedesias, atene: “Tongana mbi tene taa-tënë na mo, fade mo yeke fâ mbi pepe? Tongana mbi mu wango na mo, mo yeke ma ni pepe!”

¹⁶ Me gbia Sedesias adeba yanga ti lo na hondengo ni na Jérémie, atene: “KOTA GBIA ayeke na fini! Lo so lo mu na e fini, fade mbi yeke fâ mo pepe. Azo so aye gi kuâ ti mo so, mbi yeke zia mo na maboko ti ala pepe.”

¹⁷ Tongaso Jérémie atene na Sedesias: “Tënë so KOTA GBIA, Nzapa so ayeke na ndö ti dunia kue, Nzapa ti Israel atene ayeke so: ‘Tongana mo sigigi ti gue ti zia tere ti mo na maboko ti aturugu ti kota kamba ti gbia ti Babilone, fade mo yeke soo fini ti mo si a yeke gbi gbata so pepe; mo yeke ngba na fini, mo na asewa ti mo.

¹⁸ Me tongana mo ke ti zia tere ti mo na maboko ti aturugu ti kota kamba ti gbia ti Babilone, fade a yeke zia gbata so na maboko ti azo ti Babilone si ala yeke bi wâ na ya ni; ti mo, mo yeke kpe na maboko ti ala pepe.’ ”

¹⁹ Gbia Sedesias akiri tënë na Jérémie: “Mbi yeke na mbeto ndali ti azo ti Juda so ahon na mbage ti azo ti Babilone so: mbi hinga pepe, fade a yeke zia mbi na maboko ti ala si ala yeke he mbi.”

²⁰ Me Jérémie atene na lo: “A yeke zia mo na maboko ti ala pepe. Ayeke nzoni mo ma tënë ti KOTA GBIA so mbi yeke tene peko ni na mo so; ndali ni, fade mo yeke baa nzoni si mo yeke soo fini ti mo.

²¹ Me tongana mo ke ti zia tere ti mo na maboko ti ala, baa ye so ayeke si ande na mo, so KOTA GBIA afa na mbi laa:

²² awali so kue angba na yangbo ti gbia ti Juda, fade a yeke mu ala ti gue na ala na aturugu ti kota kamba ti gbia ti Babilone; awali ni ayeke he bia so na iri ti mo, atene: ‘Ataa azo so aye mo mingi, ala handa mo alingbi ala awe! Mo linda na ya ti potopoto awe, ala do mo azia!’

²³ Biani, fade a yeke mu awali ti mo na amolenge ti mo ti gue na ala na azo ti Babilone; ti mo, mo yeke kpe na maboko ti ala oko pepe. Gbia ti Babilone ayeke gbu mo ti ga zo ti kanga si lo yeke bi wâ na gbata ni.”

²⁴ Tongaso Sedesias atene na Jérémie: “Tongana mo ye ti kui pepe, atënë so mbi na mo, e tene so, alingbi mbeni zo ama ni pepe.

²⁵ Tongana aturugu ti kota kamba ama a tene, mbi na mo, e tene tënë, ala yeke ga ti hunda mo, atene: ‘Tongana mo ye ti ngba na fini, alingbi mo honde tënë oko na e pepe.’

²⁶ Fade mo yeke kiri tënë na ala: ‘Mbi voro gi tere ti mbi na gbia titene lo kiri na mbi na da ti Jonatan pepe; tongaso pepe, fade mbi yeke kui.’ ”

²⁷ Andaa taa-tënë, aturugu ti kota kamba aga abaa Jérémie si ala hunda lo na tënë. Me Jérémie akiri tënë na ala gi tongana ti so gbia amu fade yanga na lo. Tongaso ala zia lo kpoo, ngbanga ti so tënë ni ade na gbe mingo.

²⁸ Jérémie angba na ya ti gbagba ti aturugu ti batango gbia ngbii asi na lango so a mu Jérusalem. Baa, ye so asi na ndembe so a mu Jérusalem laa: