Jérémie 37 - Mbeti ti Nzapa - Tënë so amu fini

Gbia Sedesias atokua azo ti baa Jérémie na tënë ti lo

¹ Nabukodonosor, gbia ti Babilone amu Sedesias, mbeni molenge ti Yosias, azia lo gbia na kodro ti Juda. Tongaso Sedesias amu mbata ti gbia na peko ti Konia, molenge ti Yoakim.

² Tënë so *KOTA GBIA atene na lege ti wayanga-Nzapa Jérémie, Sedesias, na akota zo ti yangbo ti lo nga na azo ti kodro ti Juda ama ni pepe.

³ Andaa gbia Sedesias atokua Yukal, molenge ti Shelemia, lo na wayango-sandaga Sefania, molenge ti Maaseya, ti tene na wayanga-Nzapa Jérémie, atene: “E gbu gere ti mo, sambela KOTA GBIA Nzapa ti e ndali ti e!”

⁴ Na ngoi ni so, ade ti zia Jérémie na da ti kanga pepe; lo yeke tambula na popo ti azo senge.

⁵ Aturugu ti gbia Faraon alondo na Ezipte ti ga. So azo ti Babilone so ayeke ngoro gbata ti Jérusalem ti mu ni na bira, ama sango ni, ala gboto tere ti ala ahon yongoro kete na Jérusalem.

⁶ Tongaso, tënë ti KOTA GBIA asi na wayanga-Nzapa Jérémie, atene:

⁷ “Tënë so KOTA GBIA, Nzapa ti Israel atene ayeke so: ‘Ala gue, atene na gbia ti Juda so atokua ala ti ga ti baa mbi so, ala tene: aturugu ti Faraon so aga fade ti mu maboko na ala so amu lege ti kiri na Ezipte, kodro ti ala awe.

⁸ Azo ti Babilone ayeke kiri ti ga, ala yeke tiri bira na gbata so, ala yeke mu ni si ala yeke bi wâ daa.

⁹ Tënë so KOTA GBIA atene ayeke so: Ala handa tere ti ala pepe, atene: azo ti Babilone alondo na kodro ti e ahon biani biani awe. Ên-en, ala yeke hon pepe!

¹⁰ Ataa ala hon ndö ti aturugu ti Babilone so kue ayeke tiri bira na ala si gi ambeni so awara ka laa angba, fade ala oko oko ayeke londo na ya ti da ti ala ti bongo, ala kue ayeke ga ti bi wâ na gbata so.’ ”

A bi Jérémie na da ti kanga

¹¹ So aturugu ti Babilone agboto fade tere ti ala ahon yongoro kete na Jérusalem ti kpe aturugu ti Faraon,

¹² Jérémie alondo na gbata ni ti gue na sese ti Benjamin ti wara ti lo mbage ti sese na popo ti azo ti mara ti lo.

¹³ So lo si na yanga ti gbagba ti Benjamin, lo tengbi na mbeni makonzi ti aturugu ti batango gbia so iri ti lo Iria, molenge ti Shelemia, molenge ti Hanania. Iria agbu wayanga-Nzapa Jérémie si atene na lo: “Mo yeke kpe ti kiri na mbage ti azo ti Babilone laa!”

¹⁴ Jérémie akiri tënë: “Mvene! Mbi yeke kpe ti kiri na mbage ti azo ti Babilone pepe!” Me Iria aye ti ma tënë so oko pepe; lo gbu Jérémie si ague na lo na akota zo ti lo.

¹⁵ Akota zo ni asara ngonzo mingi na tere ti Jérémie si ala pika lo. Na pekoni, ala kanga lo na ya ti da ti Jonatan, wakuasu ti letaa; andaa azo ni asara si da ni aga da ti kanga.

¹⁶ Ala bi Jérémie na ya ti du so a yeke kanga azo daa, taa na ngbonda ni kâ; lo ngba na ya ni aninga.

¹⁷ Na pekoni gbia Sedesias atokua titene a ga na Jérémie. Gbia ni ahunda lo na hondengo ni na ya ti yangbo ti lo, atene: “Mbeni tënë ti *KOTA GBIA ayeke daa ndali ti mbi?” Jérémie akiri tënë: “Een, ayeke daa; tënë ni ayeke so: ‘Fade a yeke zia mo na maboko ti gbia ti Babilone.’ ”

¹⁸ Na pekoni, Jérémie atene na gbia Sedesias: “Sioni ti nyen laa mbi sara na mo, wala na azo ti gbe ti mo, wala na azo ti gbata so si ala bi mbi na da ti kanga so?

¹⁹ Awayanga-Nzapa ti ala so lani ayeke tene peko ti tënë ti yanga ti Nzapa na ala, atene: ‘Gbia ti Babilone ayeke ga ti tiri bira na ala pepe, lo yeke tiri nga bira na kodro so pepe’, ala yeke fadeso na ndo wa?”

²⁰ Ti hunzi na ni, Jérémie akiri atene: “Babâ gbia, fadeso, mbi gbu gere ti mo, mo ma mbi si! Ayeke nzoni vorongo tere ti mbi na mo agbu be ti mo: mo sara si a kiri na mbi na da ti wakuasu Jonatan pepe; tongaso pepe, fade mbi yeke kui kâ.”

²¹ Tongaso gbia Sedesias amu yanga titene a bata Jérémie na ya ti gbagba ti aturugu ti batango gbia. Lo mu nga yanga titene a mu na lo na ya ti lango oko oko, mapa oko ti balabala ti awazongo-mapa; a mu ni na lo ngbii mapa ahunzi kue na ya ti gbata ni si! Nilaa Jérémie angba na ya ti gbagba ti aturugu ti batango gbia.