Jérémie 32 - Mbeti ti Nzapa - Tënë so amu fini

Jérémie avo yaka

¹ Tënë ti *KOTA GBIA asi na Jérémie na ngu baleoko ni so Sedesias ayeke gbia ti Juda; ngu ni so alingbi na ngu baleoko na miombe ni so Nabukodonosor ayeke gbia ti Babilone.

² Andaa na ngoi ni so, aturugu ti Babilone angoro Jérusalem ti mu ni na bira. Ti wayanga-Nzapa Jérémie, a gbu lo si a kanga lo na yangbo ti gbia ti Juda, mbirimbiri na ya ti gbagba ti aturugu ti batango gbia.

³ Sedesias, gbia ti Juda amu fade yanga titene a kanga Jérémie kâ. Biani, lo suku na Jérémie ngbanga ti tënë ti peko ti yanga ti KOTA GBIA so Jérémie atene: “Baa, tënë so KOTA GBIA atene ayeke so: Mbi yeke zia Jérusalem na maboko ti gbia ti Babilone si lo yeke mu ni.

⁴ Ti Sedesias, gbia ti Juda, lo yeke kpe na maboko ti azo ti Babilone pepe. Biani, fade a yeke zia lo na maboko ti gbia ti Babilone, lo wani, lo yeke tene tënë na gbia ni si lo yeke baa lo le na le.

⁵ Na pekoni, fade a yeke gue na Sedesias na Babilone, lo yeke ngba kâ ngbii, mbi wani, mbi baa lege ti lo si; so tënë ti yanga ti KOTA GBIA laa. Tongana ala ngba ti sara bira na azo ti Babilone, ala azo ti Juda, ala yeke sara gbaa.”

⁶ Jérémie atene: “Tënë ti KOTA GBIA asi na mbi, atene:

⁷ ‘Fade ita ti mo Hanameel, molenge ti Shalum, ita ti babâ ti mo ayeke ga ti baa mo ndali ti yaka so lo yeke na ni na Anatot. Lo yeke hunda na mo ti vo yaka ni, ngbanga ti so mo laa mo yeke mbeni zo ti sewa ti lo so popo ni ayo pepe; tënë ti vongo yaka ni titene aga ti mo abaa mo kozoni.’

⁸ “Tongana ti so KOTA GBIA atene lani na mbi, ita ti mbi Hanameel, molenge ti ita ti babâ ti mbi aga si awara mbi na ya ti gbagba ti aturugu ti batango gbia; lo tene na mbi: ‘Vo yaka ti mbi so ayeke na Anatot, na sese ti Benjamin. Biani, tënë ti vongo yaka ni titene aga ti mo abaa mo kozoni.’ “Tongaso mbi hinga, mbi tene, KOTA GBIA laa atene tënë na mbi so.

⁹ “Nilaa mbi vo yaka ti Hanameel, molenge ti ita ti babâ ti mbi; yaka so ayeke na Anatot. Mbi futa ngere ni na ale ti nginza baleoko na mbarambara.

¹⁰ Mbi su mbeti ti vongo yaka ni, mbi kpo nzoroko ti mbi na ndö ni na le ti azo so mbi iri ala ti duti na tere ni. Na pekoni, mbi zia nginza ni na ndö ti kilo ti hinga nengo ni.

¹¹ Mbi mu mbeti ti vongo yaka ni, ti so mbi kpo nzoroko ti mbi daa alingbi na tënë ti ndia so, nga na ti so a kanga yanga ni pepe so,

¹² mbi mu na Baruk, molenge ti Neria, molenge ti Maaseya, na le ti ita ti mbi Hanameel, lo na azo so kue aduti na tere ti tënë ni si ala su nga maboko ti ala na gbe ti mbeti ti vongo yaka ni; mbi mu nga mbeti ni na le ti azo ti Juda so kue ayeke na ya ti gbagba ti aturugu ti batango gbia.

¹³ Na dawa ti azo so kue, mbi mu yanga na Baruk, mbi tene:

¹⁴ ‘Tënë so KOTA GBIA so ayeke na ndö ti dunia kue, Nzapa ti Israel atene ayeke so: Mu ambeti use so, ti so mbi kpo nzoroko ti mbi daa na ti so a kanga yanga ni pepe so, mo zia ni na ya ti ta ti sese, tongaso si ambeti ni alingbi ti ninga.’

¹⁵ “Biani, tënë so KOTA GBIA so ayeke na ndö ti dunia kue, Nzapa ti Israel atene ayeke so: ‘Na ya ti kodro so, fade azo ayeke kiri ti vo ada, ayaka na ayaka ti *vinye.’ ”

Jérémie asambela Nzapa

¹⁶ Na peko ti so mbi mu mbeti ti vongo yaka ni na Baruk, molenge ti Neria, mbi sambela *KOTA GBIA, mbi tene:

¹⁷ “Ae Kota Gbia NZAPA, mo laa mo sara yayu na sese na lege ti kota ngangu ti mo, na lege ti maboko ti mo so mo yoro. Mbeni ye so ayeke ngangu na mo ayeke daa pepe.

¹⁸ Mo yeke sara nzoni be na azo ngbii asi na *ahale ti ala ti molongo saki oko. Me tongana ababâ na amama asara siokpari, mo yeke sara si amolenge ti ala laa awara futa ni. Mo yeke kota Nzapa, mo yeke ngangu mingi; iri ti mo ayeke KOTA GBIA so ayeke na ndö ti dunia kue.

¹⁹ Apialo ti mo ayeke kota; na lege ti ngangu ti mo, mo yeke sara si apialo ni abaa gigi. Ye so azo ayeke sara, mo yeke baa ni kpoo. Tongaso, mo yeke sara na zo oko oko alingbi na lege ti dutingo ti lo nga na lengo ti sarango ye ti lo.

²⁰ “Ando na Ezipte, mo sara aye ti dongo be na aye ti kpene ngbii asi laso. Mo sara si iri ti mo awu na popo ti azo ti Israel nga na popo ti tanga ti azo kue, tongana ti so a yeke baa ni laso so.

²¹ Na lege ti aye ti dongo be na aye ti kpene, mo sara si Israel, azo ti mo, asigigi na sese ti Ezipte; ala sigigi na lege ti ngangu ti maboko ti mo nga na lege ti maboko ti mo so mo yoro.

²² Mo deba yanga ti mo ando na akotara ti e ti mu na ala *kodro so ngu ti me ti bagara na mafuta ti wotoro asi singo daa; ye so mo sara ni laa.

²³ Ala ga si ala mu kodro ni titene aga ti ala. Ye oko, ala ma tënë ti mo pepe, ala bata lege ti andia ti mo pepe, ala ke ti sara ye so mo mu yanga na ala ti sarango ni. Nilaa mo tokua akpale so kue na ndö ti ala laso.

²⁴ “Fadeso azo ti Babilone abongbi sese si aga *koto, ala ga nduru na gbata ni titene ala mu ni awe; ala yeke tiri bira titene ala mu gbata ni. Na lege ti bira, kota nzara na sioni kobela ti bubango kodro, gbaa fade gbata ni ayeke ti na maboko ti ala. Tënë so lani mo tene, ni laa asi awe so; ti mo, mo yeke baa gi ni bango!

²⁵ Ka so gbata ni aga nduru ti ti na maboko ti azo ti Babilone awe so, ngbanga ti nyen si mo Kota Gbia NZAPA, mo mu yanga na mbi, mo tene: ‘Vo yaka ni, mo futa ngere ni na dawa ti azo so aduti na tere ni?’ ”

KOTA GBIA akiri tënë na Jérémie

²⁶ Tongaso, tënë ti *KOTA GBIA asi na Jérémie, atene:

²⁷ “Mbi KOTA GBIA, mbi yeke Nzapa ti ye so kue ayeke na fini. Mbeni ye so ayeke ngangu na mbi ayeke daa?

²⁸ Ndani laa, tënë so mbi KOTA GBIA, mbi tene ayeke so: mbi yeke zia gbata so na maboko ti azo ti Babilone nga na Nabukodonosor, gbia ti Babilone; fade lo yeke mu ni.

²⁹ Azo ti Babilone angba ti tiri bira ti mu gbata ni; fade ala yeke li na ya ni, ala yeke bi wâ daa; ala yeke gbi ada so azo ayeke zö dukani na li ni na *Baal titene ala gi na yanga ti mbi. Azo ni ayeke tuku samba ti mu na *sandaga na anzapa nde na ya ti ada ni.

³⁰ “Biani, so tënë ti yanga ti KOTA GBIA laa: Ti londo na ngoi so ala ga mara ngbii asi laso, azo ti Israel na azo ti Juda asara gi ye so ayeke sioni na le ti mbi. Ye so kue azo ti Israel asara azia gi ngonzo na be ti mbi.

³¹ Ti londo na ngoi so a leke gbata ti Jérusalem ngbii asi laso, gbata ni asara si ngonzo ti mbi na ngonzo ti mbi ti wâ alondo. Ndani laa, mbi ye ti zi gbata ni na le ti mbi.

³² Biani, azo ti Israel na azo ti Juda asara sioni mingi, ala sara si ngonzo ti mbi alondo; ala na agbia ti ala, amakonzi ti ala, awayango-sandaga ti ala, awayanga-Nzapa ti ala nga na azo ti Juda na azo ti Jérusalem.

³³ Titene ala zia le ti ala na mbage ti mbi, ala zia gi peko ti ala na mbi. Ataa so mbi mu ngoi ti mbi kue ti fa ye na ala, ala ma pepe; ala ke ti ma wango ti mbi.

³⁴ Ala zia afungo yanda ti ala na ya ti kota da so a zia nde ndali ti mbi; ala sara si da ni aga *sioni.

³⁵ Na popo-hoto ti Hinom, ala leke ndo na li ti ahoto ndali ti Baal. Kâ, ala yeke gbi amolenge ti ala ti koli na ti wali na wâ ti mu na sandaga na nzapa Molek. Mbi mu yanga na ala laoko pepe ti sara ye tongaso! Mara ti ye tongaso aga na li ti mbi laoko pepe. Na sarango mara ti sioni ye tongaso, so zo alingbi ti baa na le ti lo fani use pepe so, ala pusu azo ti Juda ti sara sioni.

³⁶ “Ala tene tënë ti gbata so, ala tene: ‘Na lege ti bira, kota nzara na sioni kobela ti bubango kodro, gbata ni ati na maboko ti gbia ti Babilone awe.’ Fadeso, baa tënë so KOTA GBIA, Nzapa ti Israel atene ndali ti gbata ni laa:

³⁷ Lani mbi sara ngonzo na tere ti ala si ngonzo ti mbi ti wâ alondo na tere ti ala. Tongaso, na lege ti sioni ngonzo ti mbi, mbi kangbi ala na ya ti akodro mingi. Me mbi yeke bongbi ala, mbi yeke kiri na ala na ndo so si ala yeke duti na siriri.

³⁸ Ala yeke kiri ti duti azo ti mbi si mbi yeke duti Nzapa ti ala.

³⁹ Fade mbi yeke mu na ala be oko si lege ti sarango ye ti ala ayeke ga oko titene ala kpe mbeto ti mbi lakue. Tongaso si fade ala yeke baa nzoni, ala na amolenge ti peko ti ala.

⁴⁰ Mbi na ala e yeke sara *mbuki so angba lakue lakue: mbi yeke kiri ti zia peko ti mbi na ala pepe, me mbi yeke ngba ti sara nzoni na ala. Mbi yeke zia na be ti ala kpengo mbeto ti mbi, tongaso si ala kiri ti hon yongoro na tere ti mbi pepe.

⁴¹ Fade ngia ti be ti mbi ayeke ti sara titene ala baa nzoni. Na be ti mbi kue nga na tere ti mbi kue, mbi yeke sara titene gere ti ala ali sese mbirimbiri na ya ti kodro.

⁴² “Tënë so KOTA GBIA atene ayeke so: Legeoko tongana ti so mbi sara si kota kpale so aga na ndö ti azo ti Juda, mbi yeke sara nga si nzoni ye so kue mbi tene tënë ni aga na ndö ti ala.

⁴³ Ala tene tënë ti kodro so, atene: ‘A zia kodro so na maboko ti azo ti Babilone awe, kodro ni aga fadeso ngonda awe, azo na anyama ayeke na ya ni mbeni pepe’. Me na ya ti kodro so laa azo ayeke kiri ti vo ayaka.

⁴⁴ Biani, fade azo ayeke kiri ti vo ayaka na sese ti Benjamin, na ya ti akodro so angoro Jérusalem, na ya ti agbata ti Juda, na ya ti agbata ti Kodro-ti-nduzu, agbata ti *Kodro-ti-gbeni na ti Negev. Ala yeke su ambeti ti vongo yaka ni, ala yeke kpo anzoroko na ndö ti ambeti ni ti kanga na yanga ni, ala yeke iri azo ti duti na tere ni. Biani, fade mbi yeke kiri na agbata ni na kozo ndo ti ala; so tënë ti yanga ti KOTA GBIA laa.”