Jérémie 28 - Mbeti ti Nzapa - Tënë so amu fini

Jérémie na wayanga-Nzapa Hanania

¹ Gi na ya ti oko ngu ni so, so ti tene na osio ngu ni so Sedesias ato nda ti le-gbia na sese ti Juda, na nze oku ni, wayanga-Nzapa Hanania, molenge ti Azur, zo ti gbata ti Gabaon, ayeke na ya ti kota da ti Nzapa. Hanania ato nda ti tene tënë na mbi Jérémie na le ti awayango-sandaga nga na le ti azo kue, lo tene:

² “Tënë so *KOTA GBIA so ayeke na ndö ti dunia kue, Nzapa ti Israel, atene ayeke so: ‘Komandema so gbia ti Babilone ayeke sara na ndö ti ala si ane tongana *zuge so, mbi yeke fâ ya ni.

³ Biani, kozoni si ngu use alingbi, fade mbi yeke sara si akungba so kue Nabukodonosor, gbia ti Babilone, amu na ya ti kota da ti Nzapa, ague na ni na Babilone so ayeke kiri ge.

⁴ Mbi yeke kiri nga na Yekonia ge, Yekonia, molenge ti Yoakim, gbia ti Juda, lo na azo so kue a gbu ala lani na sese ti Juda si a gue na ala na Babilone; so tënë ti yanga ti KOTA GBIA laa. Biani, komandema so gbia ti Babilone ayeke sara na ndö ti ala si ane tongana zuge so, mbi yeke fâ ya ni.’ ”

⁵ Wayanga-Nzapa Jérémie akiri tënë na wayanga-Nzapa Hanania na le ti awayango-sandaga nga na le ti azo so kue ayeke na ya ti kota da ti Nzapa,

⁶ lo tene: “Amen! Ayeke nzoni KOTA GBIA asara tongana ti so mo tene so! Ayeke nzoni KOTA GBIA asara ye alingbi gi na atënë so mo fa peko ni so: akungba ti ya ti kota da ti Nzapa na azo so kue a gbu ala si a gue na ala na Babilone, ayeke nzoni a kiri na ala na ndo so.

⁷ Ye oko, zi mê ti mo, mo ma tënë so mbi yeke tene na mo nga na azo ni kue:

⁸ Awayanga-Nzapa ayeke daa ngbene ye ngu na ngu kozoni na mbi nga kozoni na mo. Ala tene peko ti atënë ti yanga ti KOTA GBIA na ndö ti akodro mingi nga na ndö ti akota kodro-gbia. Ala tene tënë ti bira, ti sioni kpale na ti sioni kobela ti bubango kodro.

⁹ Me tongana mbeni wayanga-Nzapa atene gi tënë ti siriri, fade azo ayeke hinga tongana nyen atene, biani Nzapa laa atokua lo? Azo ayeke hinga ni gi tongana tënë so lo fa, ye ni asi alingbi na ni.”

¹⁰ Tongaso wayanga-Nzapa Hanania azi zuge so ayeke na ndö ti go ti Jérémie si lo fâ ya ni.

¹¹ Na pekoni Hanania atene na le ti azo kue, atene: “Tënë so KOTA GBIA atene ayeke so: ‘Kozoni si ngu use ahon, komandema so Nabukodonosor, gbia ti Babilone asara na ndö ti amara kue si ane ala tongana zuge so, fade mbi yeke fâ ya ni legeoko tongaso.’ ” Na pekoni Jérémie amu lege ahon.

¹² Na peko ti so Hanania afâ ya ti zuge so ayeke na ndö ti go ti Jérémie awe, tënë ti KOTA GBIA asi na Jérémie, atene:

¹³ “Gue mo tene na Hanania: Tënë so KOTA GBIA atene ayeke so: ‘Mo fâ ya ti zuge ti keke awe, me mo yeke sara mbeni nde so ayeke na wen.’ ”

¹⁴ Biani, tënë so KOTA GBIA so ayeke na ndö ti dunia kue, Nzapa ti Israel atene ayeke so: “Mbi yeke zia na ndö ti go ti amara so kue zuge ti wen; ala yeke duti na gbe ti komandema ti Nabukodonosor, gbia ti Babilone. Ataa anyama ti ngonda, mbi yeke zia ala na gbe ti lo.”

¹⁵ Wayanga-Nzapa Jérémie akiri atene na wayanga-Nzapa Hanania, atene: “Hanania, ma mbi si! KOTA GBIA atokua mo pepe; me mo laa mo pusu azo so ti zia be ti ala na ndö ti atënë ti mvene.

¹⁶ Nilaa, tënë so KOTA GBIA atene ayeke so: ‘Mbi yeke zi mo na ndö ti sese; mo yeke kui gi na ngu so, ngbanga ti so mo pusu azo ti ke KOTA GBIA.’ ”

¹⁷ Wayanga-Nzapa Hanania akui taa na ya ti nze mbarambara ti oko ngu ni so.