Jérémie 16 - Mbeti ti Nzapa - Tënë so amu fini

Nzapa ahunda na Jérémie ti mu wali pepe

¹ Tënë ti *KOTA GBIA asi na mbi, atene:

² “Fade mo yeke mu wali pepe; mo yeke du amolenge-koli na amolenge-wali na ya ti kodro so pepe.

³ Biani, tënë so KOTA GBIA atene ndali ti amolenge-koli na amolenge-wali so fade a yeke du ala na ya ti kodro so, nga ndali ti ababâ na amama so adu amolenge ni na ya ti kodro ni ayeke so:

⁴ Fade ngangu kobela ayeke fâ ala; zo ayeke toto kuâ ti ala pepe, zo ayeke lu nga kuâ ti ala pepe. Me ala yeke ga tongana puru na ndö ti sese. Fade bira na nzara ayeke fâ ala si kuâ ti ala ayeke ga kobe ti andeke ti nduzu na ti anyama ti sese.”

⁵ Biani, tënë so KOTA GBIA atene ayeke so: “Da so azo abongbi daa ti toto kuâ, mo li na ya ni pepe. Mo gue ti toto kuâ pepe, mo kangbi vundu ti azo ni pepe, ngbanga ti so siriri so mbi mu na ala, mbi zi ni awe; nzoni be so mbi sara na ala nga na bango mawa ti ala, mbi zi ni awe; so tënë ti yanga ti KOTA GBIA laa.

⁶ Na ya ti kodro so, fade akota zo na akete zo ayeke kui; a yeke lu kuâ ti ala pepe, a yeke toto kuâ ti ala pepe si zo ti suru tere ti lo na ka, wala ti kio kua ti li ti lo ndali ti ala ayeke daa pepe.

⁷ Zo ayeke mu kobe pepe na azo so ayeke na mua ti de be ti ala; zo ayeke mu nga kopo pepe na azo ni ti de be ti ala, ataa babâ wala mama ti ala laa akui.

⁸ “Da so azo ayeke sara matanga ti tengo kobe daa, mo li nga na ya ni pepe; mo na azo ni, ala duti ti te, ti nyon pepe.

⁹ Biani, tënë so KOTA GBIA so ayeke na ndö ti dunia kue, Nzapa ti Israel atene ayeke so: ‘Na ndo so, mbi yeke kai bia ti azo so tere ti ala anzere, bia ti azo so ayeke na ngia nga na bia ti koli na wali so amu tere fini fini. Mbi yeke sara ni na gbe ti le ti ala, na ndembe so ala ngba na fini.’

¹⁰ “Tongana mo yeke fa tënë so na azo ni, gbaa mbeni zo ayeke hunda mo, atene: ‘KOTA GBIA aleke na be ti lo titene mara ti kota kpale tongaso ati na ndö ti e ngbanga ti nyen? Sioni ti nyen laa e sara? Siokpari ti nyen laa e sara ti ke KOTA GBIA Nzapa ti e?’

¹¹ Tongaso, fade mo yeke kiri tënë: ‘So tënë ti yanga ti KOTA GBIA laa: Kota kpale ni ayeke ti na ndö ti ala, ngbanga ti so akotara ti ala ado mbi, azia, ala mu peko ti anzapa nde ti voro ala, ala ti akpo li ti ala na sese na gbe ti ala. Me mbi, akotara ti ala ni ado mbi, azia, ala ke ti sara ye alingbi na ye so mbi fa na ala.

¹² Ti ala, ala sara sioni mingi ahon akotara ti ala; zo oko oko ayeke ngba ti sara sioni ye so be ti lo afa na lo, me lo ke ti ma mbi.

¹³ Ndani laa, mbi yeke tumba ala na kodro so ti bi ala na ya ti mbeni kodro nde so ala hinga ni pepe; ataa akotara ti ala ahinga kodro ni so pepe. Kâ, bi na lâ, fade ala yeke voro anzapa nde. Biani, mbi yeke sara nzoni be na ala oko pepe.’ ”

Mbeni lâ, azo ti Israel ayeke kiri na kodro ti ala

¹⁴ “So tënë ti yanga ti *KOTA GBIA laa: Biani, mbeni lango ayeke ga so fade azo ayeke kiri ti tene pepe: ‘Na iri ti KOTA GBIA so ayeke na fini, lo so lo sara si azo ti Israel asigigi na sese ti Ezipte!’,

¹⁵ me azo ni ayeke tene: ‘Na iri ti KOTA GBIA so ayeke na fini, lo so lo sara si azo ti Israel asigigi na kodro so ayeke na mbage ti Banga nga na akodro so lo tumba ala ando titene ala gue daa so!’ Fade mbi yeke sara si ala kiri na ndö ti sese so mbi mu ando na akotara ti ala.”

Fade a yeke gbu azo ti sioni kue

¹⁶ “So tënë ti yanga ti KOTA GBIA laa: Mbi yeke tokua gba ti azo ti gingo susu ti gbu azo ni tongana ti so zo ayeke gbu susu. Na pekoni, mbi yeke tokua gba ti azo ti gingo nyama ti gi azo ni na ndö ti akota hoto kue, na ndö ti akete hoto kue nga na ya ti adu ti têne tongana ti so zo ayeke gi nyama.

¹⁷ Le ti mbi abaa asarango ye ti ala kue, ahonde na le ti mbi oko pepe; sioni so ala yeke sara ayeke polele na le ti mbi.

¹⁸ Mbi yeke mu na ala kozoni futa fani use alingbi na sioni nga na siokpari ti ala, ngbanga ti so ala sara si kodro ti mbi aga sioni. Ye so aga ti mbi, ala sara si asi singo na afungo nzapa ti ala so ayeke na fini pepe so; ala sara si ye ti mbi ni asi singo na asioni nzapa ti ala so zo alingbi ti baa na le ti lo fani use pepe so.”

Fade amara kue ayeke hinga taa Nzapa

¹⁹ *KOTA GBIA, mo yeke ngangu ti mbi, mo yeke tongana ngangu gbagba na tere ti mbi, mo yeke ndo so mbi kpe daa ti bata tere ti mbi na ngoi ti ye ti ngangu. Fade amara nde ayeke londo na nda ti sese kue ti ga na mbage ti mo. Ala yeke tene: “Ye so akotara ti e awara ti ga ye ti ala, ye ni ayeke gi ye ti mvene; mbeni senge buba ye so alingbi ti sara kua oko pepe.

²⁰ Azo alingbi ti leke anzapa ndali ti ala wani? So ala yeke anzapa pepe so!”

²¹ Ndani laa KOTA GBIA atene: “Ti fadeso, mbi yeke fa na azo ni ngangu ti mbi na komandema ti mbi, tongaso si fade ala hinga atene, mbi laa mbi yeke KOTA GBIA.”