Jérémie 14 - Mbeti ti Nzapa - Tënë so amu finiTënë ndali ti ngu so apika pepe 1 Tënë ti *KOTA GBIA asi na Jérémie ndali ti ngu so apika pepe. 2 “Kodro ti Juda ayeke na mua, agbata ti lo ayeke ti tingo. Azo ni ayeke sara mua, ala duti na sese. Demango tere ti Jérusalem ague ngbii asi na yayu. 3 Akota zo atokua azo ti kua ti ala ti to ngu, azo ti kua ni ague na du ti ngu, me ala wara ngu pepe. Ala mu lege akiri, ya ti ata ti ala senge; kamene agbu le ti ala, ala yeke na vundu si ala ba li ti ala na sese. 4 Sese kue asuru surungo, ngbanga ti so ngu apika pepe. Tongaso, kamene agbu le ti azo ti fango yaka si ala ba li ti ala na sese. 5 Ataa tagba so ayeke na ngonda, lo du si lo do molenge ni, lo zia, ngbanga ti so pere ayeke daa mbeni pepe. 6 Alele ti ngonda ayeke luti na ndö ti ahoto so ndö ni angba senge, ala yeke gboto pupu tongana *anzagua; le ti ala aye ti vuko na gingo pere, me pere ni ayeke daa mbeni pepe.” (Azo ti kodro) 7 “Tongana asioni ti e ayeke bi tënë na li ti e, ayeke nzoni KOTA GBIA, mo sara mbeni ye ndali ti iri ti mo. Biani, e zia mo fani mingi; e sara sioni so ake mo. 8 KOTA GBIA, mo laa Israel alingbi ti zia be ti lo na ndö ti mo, mo soo lo na ndembe ti ye ti ngangu. Ngbanga ti nyen si mo yeke sara ye tongana wande na ya ti kodro so? Ngbanga ti nyen si mo yeke sara ye tongana gene so alango gi bi oko si lo mu lege ti hon so? 9 Ngbanga ti nyen si mo yeke sara ye tongana koli pepe so? Ngbanga ti nyen si mo yeke sara ye tongana mbeni ngangu koli so alingbi fade ti soo azo, me lo soo ala pepe so? Andaa KOTA GBIA, mo yeke na popo ti e, a zia e nde ndali ti mo awe; mo zia e pepe!” * 10 Tënë so KOTA GBIA atene na azo so ayeke so: “Biani, ala ye gi ti tambula kirikiri, ngbonda ti ala agbu sese pepe.” Ye ni anzere na be ti KOTA GBIA pepe. Fadeso, lo dabe ti lo na asioni ti ala, lo yeke pika ala ndali ti aye ti kirikiri ti ala. 11 KOTA GBIA atene na mbi: “Mo sambela mbi ndali ti nzoni ti azo so pepe. 12 Ataa ala ke kobe, fade mbi yeke ma dema ti ala pepe. Ataa ala ya na mbi asandaga so a yeke gbi ni kue na wâ nga na asandaga ti ale ti kobe, ayeke nzere na be ti mbi pepe. Me mbi yeke hunzi ala na lege ti bira, na lege ti nzara nga na lege ti sioni kobela ti bubango kodro.” 13 Mbi kiri tënë: “Ae Kota Gbia NZAPA, awayanga-Nzapa atene na azo ni, atene: ‘Fade bira na nzara ayeke si na ala pepe. Me Nzapa ayeke mu na ala taa siriri na ndo so.’ ” 14 KOTA GBIA akiri tënë na mbi: “Tënë so awayanga-Nzapa ni ayeke tene na iri ti mbi so ayeke mvene. Mbi tokua ala pepe, mbi mu yanga na ala pepe, mbi tene nga tënë na ala pepe. Aye so ala yeke baa na ya ti mbeni ye tongana bango-li so ayeke mvene; so gi atënë ti mbadi senge, atënë ti gingo nda ti ye senge na atënë ti handa so alondo na be ti ala wani. 15 Ndani laa, tënë so KOTA GBIA atene na tere ti awayanga-Nzapa ni ayeke so: Ataa so mbi tokua ala pepe, ala yeke fa tënë na iri ti mbi atene, fade bira na nzara ayeke si na ya ti kodro so pepe. Andaa, na lege ti bira nga na lege ti nzara si a yeke hunzi ala kue! 16 Azo so awayanga-Nzapa ni atene tënë ni na ala so, fade bira na nzara ayeke fâ ala; a yeke bi kuâ ti ala kirikiri na ndö ti alege ti Jérusalem, zo oko ti lu kuâ ni ayeke daa pepe, ala na awali ti ala nga na amolenge ti ala ti koli na ti wali. Sioni so azo ni asara so, fade mbi yeke sara si akiri gi na li ti ala wani. 17 “Tënë so fade mo yeke tene na ala laa: Mbi ye titene ngu ti le ti mbi asua bi na lâ, akai pepe, ngbanga ti so mbeni kpale ati na ndö ti azo ti mbi so mbi ye ala tongana molenge ti mbi ti wali; ka ti ala ayeke mu oko pepe. 18 Tongana mbi gue na yaka, mbi yeke baa gi azo so akui na lege ti bira. Tongana mbi kiri na ya ti gbata, mbi yeke baa gi azo so akui na lege ti nzara. Awayanga-Nzapa na awayango-sandaga atambula na ya ti kodro ni kue, me ala gi li ti ala daa gbaa.” (Azo ti kodro) 19 “KOTA GBIA, mo ke Juda biani awe? Be ti mo ake *Sion awe? Ngbanga ti nyen si mo zia ka na tere ti e si ka ni amu pepe so? E baa ti e lani e tene, fade e yeke duti nzoni, me ye ti nzoni oko ayeke daa pepe. E yeke ku lani ngoi titene ka ti e amu, me kota mbeto laa aga. 20 KOTA GBIA, e hinga so e sara sioni; e hinga so akotara asara sioni. Biani, e sara siokpari so ake mo. 21 Ndali ti iri ti mo, mbata ti mo ti gbia so ayeke na gonda so, ayeke nzoni mo baa ni tongana buba ye pepe, mo ke ni pepe. Mo dabe ti mo na *mbuki so e na mo, e sara so, mo buba ya ni pepe! 22 Na popo ti asenge senge ye ti amara nde, mbeni yanda oko ayeke daa so alingbi ti sara si ngu apika? Yayu laa asara si ngu ayeke pika? KOTA GBIA Nzapa ti e, mo laa mo sara ye so pepe? E zia be ti e ti ku mo, ngbanga ti so mo laa mo sara aye so kue.” |
© La Société Biblique de Centrafrique 2010
Bible Society in the Central African Republic