Jean 3 - Mbeti ti Nzapa - Tënë so amu fini

Jésus na Nikodeme

¹ Mbeni koli ayeke lani na popo ti *afarizien, iri ti lo Nikodeme; lo yeke mbeni makonzi ti azuife.

² Lo ga lo baa Jésus na bi si lo tene na lo: “Wafango-ye, e hinga so Nzapa laa atokua mo ti fa ye na e, ngbanga ti so, tongana Nzapa ayeke na zo pepe, zo ni alingbi ti sara aye ti kpene so mo yeke sara so pepe.”

³ Jésus akiri tënë na lo: “Biani, mbi tene na mo taa-tënë: tongana a kiri a du zo pepe, lo lingbi ti baa *Kodro-gbia ti Nzapa pepe.”

⁴ Nikodeme ahunda Jésus, atene: “Zo so aga kangba awe, fade a kiri ti du lo tongana nyen? Lo yeke kiri ti li na ya ti mama ti lo si mama ti lo akiri adu lo?”

⁵ Jésus akiri tënë na lo: “Biani, mbi tene na mo taa-tënë: tongana a du zo na ngu na Yingo pepe, zo ni alingbi ti li na Kodro-gbia ti Nzapa pepe.

⁶ Zo ayeke du gi zo, Yingo ayeke du gi yingo.

⁷ So mbi tene na mo, mbi tene: ‘Alingbi a kiri a du ala si’ so, li ti mo akpe pepe.

⁸ Pupu ayeke ya na ndo so be ti lo aye; mo yeke ma ni, me mo hinga ndo so alondo daa, wala ndo so ayeke gue daa pepe. Ye ni ayeke tongaso na azo so Yingo adu ala.”

⁹ Nikodeme atene na Jésus: “Ye ni ayeke duti ande tongana nyen?”

¹⁰ Jésus akiri tënë na lo, atene: “Mo so azo ahinga mo tongana wafango-ye na Israel so, mo hinga aye so pepe?

¹¹ Biani, mbi tene na mo taa-tënë: ye so e hinga laa e yeke fa peko ni na azo; ye so e baa laa e yeke tene tënë ni na azo, me ala azo, tënë so e yeke tene, ala ye ti ma ni pepe.

¹² So mbi tene na ala tënë ti aye ti sese ge, ala yeda na ni pepe so, tongana mbi tene na ala tënë ti aye ti yayu, fade ala yeke yeda?

¹³ Zo oko ade ti ma na yayu pepe, gi *Molenge ti Zo; lo laa lo londo na yayu si lo zu na sese.

¹⁴ Alingbi a kanga Molenge ti Zo na nduzu na ndö ti keke, tongana ti so Moïse akanga ando ngbo na nduzu na benyama,

¹⁵ tongaso si azo so kue ama na be na Molenge ni ayeke na fini so angba lakue lakue.

¹⁶ Biani, Nzapa aye azo ti dunia so mingi si lo mu gi oko Molenge ti lo titene zo so ama na be na lo alingbi ti kui pepe, me lo yeke na fini so angba lakue lakue.

¹⁷ Nzapa atokua Molenge ti lo na dunia so ti fâ ngbanga na li ti azo ti dunia ni pepe, me ti soo ala.

¹⁸ Zo so ama na be na Molenge ni, ngbanga ayeke na li ti lo pepe; me zo so ama na be pepe, Nzapa afâ ngbanga na li ti lo awe, ndali ti so lo ma na be na oko Molenge ti Nzapa pepe.

¹⁹ Nda ti ngbanga ni ayeke so: lumiere aga na ndö ti dunia so, me azo aye tënë ti lumiere ni pepe; ala ye gi tënë ti vukongo ndo, ngbanga ti so ye so ala yeke sara ayeke sioni.

²⁰ Zo so kue ayeke sara ye ti sioni, lo ke tënë ti lumiere; lo ye ti ga na ya ti lumiere pepe, ngbanga ti so lo kpe titene asioni ye so lo yeke sara asigigi polele.

²¹ Me zo so ayeke sara ye na lege ti taa-tënë, lo ga na ya ti lumiere. Tongaso, azo abaa aye so lo yeke sara si ala baa so, lo yeke ma yanga ti Nzapa.”

Jésus na Jean

²² Na pekoni, Jésus na adisiple ti lo ague na sese ti Judée. Lo na ala aduti kâ si lo yeke batize azo.

²³ Jean nga ayeke batize azo na Enon, nduru na Salim, ngbanga ti so ngu ayeke kâ mingi. Azo aga na lo si lo yeke batize ala.

²⁴ Biani, na ndembe ni so, a de ti bi Jean na da ti kanga pepe.

²⁵ Andaa papa alondo na popo ti adisiple ti Jean na mbeni zuife na ndö ti tënë ti *sukulango sioni.

²⁶ Ala gue, awara Jean si ala tene na lo: “Wafango-ye, koli so lani mo na lo ayeke na mbage ti ngu ti Jourdain kâ so, lo so mo fa peko ti tënë ti lo so, baa, lo kiri lo yeke batize azo si azo kue ayeke gue gi na lo!”

²⁷ Jean akiri tënë na ala: “Tongana Nzapa amu ye na zo pepe, zo ni alingbi ti wara ni pepe.

²⁸ Ala yeke lani daa si mbi tene: ‘Mbi yeke *Mesii pepe, me a tokua mbi ti ga kozo ti lo.’

²⁹ Zo so ayeke na wali ayeke koli ti wali ni; me zo so lo na koli ti wali ni aye tere, lo yeke luti nduru na tere ti koli ni si lo yeke na ngia ti ma go ti koli ti wali ni. Nda ti ngia so mbi yeke na ni laa; laso ngia ni alingbi kue.

³⁰ Alingbi lo ga kota si mbi ga ti mbi kete.”

Zo so alondo na yayu si aga

³¹ “Zo so alondo na yayu si aga, lo hon azo kue; me zo so ayeke zo ti sese, lo yeke ti sese, lo yeke tene tënë tongana zo ti sese. Zo so alondo na yayu si aga, lo hon azo kue.

³² Lo yeke fa gi peko ti tënë ti aye so lo baa si lo ma; me zo oko ti yeda na tënë so lo yeke fa so ayeke daa pepe.

³³ Zo so ayeda na tënë ti lo, lo yeke fa mbirimbiri na le ti azo so, Nzapa ayeke tene taa-tënë.

³⁴ Zo so Nzapa atokua lo, lo yeke tene gi atënë ti Nzapa, ngbanga ti so Nzapa amu Yingo ti lo ahon ndoni na zo ni.

³⁵ Babâ aye Molenge ni si lo zia ye kue na maboko ti lo.

³⁶ Zo so ama na be na Molenge ni, lo yeke na fini so angba lakue lakue; zo so ake ti ma na be na Molenge ni, fade lo yeke na fini so pepe, me ngonzo ti Nzapa angba na ndö ti lo.”