Jean 14 - Mbeti ti Nzapa - Tënë so amu fini

Jésus ayeke lege ti gue na Babâ

¹ Jésus atene na ala: “Ala gi be ti ala pepe; ala ma na be na Nzapa, ala ma na be na mbi nga.

² Ndo ti duti ayeke mingi na ya ti da ti Babâ ti mbi. Ndani laa, mbi tene na ala kozoni, mbi tene: ‘Mbi yeke gue ti leke ndo na ala.’ Tongana ye ni ayeke tongaso pepe, ka mbi tene na ala kozoni pepe.

³ Tongana mbi gue, mbi leke ndo na ala awe, fade mbi yeke kiri ti mu ala na tere ti mbi si ala nga, ala duti na ndo so mbi yeke duti daa.

⁴ Ndo so mbi yeke gue daa so, ala hinga lege ni awe.”

⁵ Thomas atene na lo: “*Kota Gbia, e hinga ndo so mo yeke gue daa pepe. Fade e yeke hinga lege ni tongana nyen?”

⁶ Jésus akiri tënë na lo: “Mbi yeke lege ni, taa-tënë na fini. Zo oko alingbi ti gue na Babâ na mbeni lege nde pepe, gi na lege ti mbi.

⁷ Tongana ala hinga mbi, fade ala yeke hinga nga Babâ ti mbi. Fadeso ala hinga lo awe si ala baa nga lo awe.”

⁸ Philippe atene na lo: “Kota Gbia, fa na e Babâ, awe.”

⁹ Jésus akiri tënë, atene: “Aninga mingi so mbi yeke na popo ti ala. Philippe, ade mo hinga mbi pepe? Zo so abaa mbi, andaa lo baa Babâ awe. Ngbanga ti nyen laa mo kiri mo hunda mbi, mo tene: ‘Fa na e Babâ’ so?

¹⁰ Mbi na Babâ, e yeke oko; mo ma na be na ni pepe? Atënë so mbi yeke tene na ala so alondo na mbi pepe, me Babâ so e na lo, e yeke oko laa ayeke sara aye ti lo wani.

¹¹ Ala ma na be so mbi na Babâ, e yeke oko. Tongana ala ma na be na mbi pepe, ala ma na be ndali ti aye so mbi sara.

¹² Biani, mbi tene na ala taa-tënë: zo so ama na be na mbi, lo nga, fade lo yeke sara aye so mbi sara; lo yeke sara akota ye ahon so, ngbanga ti so mbi yeke gue na Babâ.

¹³ Ye so kue ala yeke hunda na iri ti mbi, fade mbi yeke sara ni si azo agonda Babâ na lege ti Molenge ni.

¹⁴ Tongana ala hunda mbeni ye na iri ti mbi, fade mbi yeke sara ni.”

Zendo ti tokuango Yingo-Vuru

¹⁵ “Tongana ala ye mbi, fade ala yeke sara ye alingbi na andia ti mbi.

¹⁶ Fade mbi yeke hunda na Babâ ti tokua mbeni Wagbungo-koko na ala titene lo ngba na ala lakue lakue:

¹⁷ lo yeke Yingo ti taa-tënë. Azo ti dunia so alingbi ti yamba lo pepe, ngbanga ti so ala baa lo pepe si ala hinga nga lo pepe. Me ti ala, ala hinga lo awe, ngbanga ti so lo yeke na ya ti ala si lo yeke na tere ti ala.

¹⁸ Fade mbi yeke zia ala anyindu pepe; mbi yeke kiri na tere ti ala.

¹⁹ Ngoi angba gi kete si azo ti dunia so ayeke kiri ti baa mbi pepe. Me ti ala, fade ala yeke baa mbi, ngbanga ti so mbi yeke na fini si ala nga, ala yeke duti na fini.

²⁰ Na lango ni so, fade ala yeke hinga atene, mbi na Babâ, e yeke oko, mbi na ala nga, e yeke oko.

²¹ “Zo so ahinga andia ti mbi si lo sara ye alingbi na ni, lo laa lo ye mbi. Babâ ti mbi ayeke ye lo; mbi nga, mbi yeke ye lo si mbi yeke sara titene lo hinga mbi.”

²² Judas, so ayeke nde na Judas Iskariote, atene na lo: “*Kota Gbia, mo ye ti sara titene e laa e hinga mo si azo ti dunia ahinga mo pepe, ngbanga ti nyen?”

²³ Jésus akiri tënë na lo, atene: “Zo so aye mbi, fade lo yeke sara ye so mbi tene na lo. Babâ ti mbi ayeke ye lo si mbi na Babâ, e yeke ga ti duti na lo.

²⁴ Zo so aye mbi pepe, lo yeke sara ye alingbi na atënë ti mbi pepe. Tënë so mbi tene na ala so alondo na mbi wani pepe, me alondo na Babâ so atokua mbi.

²⁵ Mbi tene na ala tënë so na ndembe so mbi ngba na popo ti ala.

²⁶ Wagbungo-koko ayeke Yingo-Vuru so Babâ ayeke tokua lo na iri ti mbi. Lo laa lo yeke fa ande na ala nda ti aye kue, lo yeke dabe ti ala na tënë so kue mbi tene na ala.

²⁷ “Mbi zia na ala siriri; siriri ti mbi wani laa mbi yeke mu na ala. Mbi yeke mu ni na ala tongana ti so azo ti dunia ayeke mu ni pepe. Ala gi be ti ala pepe; mbeto asara ala pepe.

²⁸ Ala ma fade tënë so mbi tene: ‘Mbi yeke gue, me mbi yeke kiri na tere ti ala.’ Tongana ala ye fade mbi, ka ala duti na ngia ndali ti so mbi yeke gue na Babâ. Biani, Babâ ayeke kota ahon mbi.

²⁹ Mbi tene na ala aye so kozoni si aye ni asi, tongaso, tongana aye ni asi, ala ma na be.

³⁰ Ti fadeso, mbi yeke kiri ti tene tënë na ala mingi pepe, ndali ti so gbia ti dunia so ayeke ga. Lo yeke na ngangu na ndö ti mbi pepe,

³¹ me lo yeke ga titene azo ti dunia ahinga so mbi ye Babâ si ala hinga nga so mbi yeke sara ye kue na peko ti yanga ti Babâ. Ala londo na ndo so, e hon!”