Ezekiel 8 - Mbeti ti Nzapa - Tënë so amu fini

Ayanda na ya ti kota da ti Nzapa

¹ Na lango oku ti nze omene ni, na ngu omene ni, na peko ti so a gbu azo ti Juda a gue na ala na kodro wande, mbi yeke duti na ya ti da ti mbi si *akangba ti Juda aduti na dawa ti mbi. Gi hio tongaso, maboko ti Kota Gbia NZAPA agbu mbi na ndo ni so.

² Na ya ti mbeni ye tongana bango-li, mbi baa mbeni zo so akpa wâ. Ti londo na ye so akpa ngbonda ti lo asi na gbeni, tere ti lo ayeke za tongana wâ; ti londo na ngbonda ti lo asi na nduzu, tere ti lo ayeke za ngrengre tongana lôro so a yoro ni na ya ti wâ.

³ Lo yoro mbeni ye so akpa maboko si lo gbu mbi na kua ti li ti mbi. Tongaso, na ya ti mbeni ye tongana bango-li so alondo na Nzapa, yingo amu mbi ahon na mbi na nduzu na popo ti yayu na sese; na pekoni lo gue na mbi na Jérusalem. Mo ye ti baa, mbi yeke na yanga ti gbagba ti gbata ni, na mbage ti ya ni; yanga ti gbagba ni abaa ndo na mbage ti Banga, na ndo so a zia yanda daa; so asara si mbanda ti Nzapa alondo biani.

⁴ Gonda ti Nzapa ti Israel asi na mbi na ndo ni so, gonda ni ayeke tongana ti so mbi baa kozoni na popo-hoto so.

⁵ Nzapa atene na mbi: “Molenge ti zo, mo baa ndo na mbage ti Banga.” Mbi baa ndo na mbage ti Banga ni. Na Banga ti yanga ti gbagba ni, mbeni gbalaka ayeke kâ. Nduru na lege ti lingo ni kâ, mbi baa yanda so ayeke sara si mbanda ti Nzapa alondo.

⁶ Lo kiri lo tene na mbi: “Molenge ti zo, mo baa ye so ala yeke sara so? Azo ti Israel amu tere ti ala na sarango asioni ye so zo alingbi ti baa na le ti lo fani use pepe. Ala yeke sara ni titene mbi hon yongoro na da ti mbi so ayeke nde si ayeke nzoni kue. Me mo yeke kiri ti baa asioni sarango ye so ayeke sioni mingi ahon ti so.”

⁷ Lo mu mbi, lo gue na mbi na yanga ti gbagba ti kota da ti Nzapa, na ya ti gbagba ni. Mbi baa so mbeni du ayeke na ya ti dere ti gbagba ni.

⁸ Nzapa atene na mbi: “Molenge ti zo, kono ya ti du ti dere ni.” Tongaso mbi kono ya ti du ni si mbeni lege azi na ya ni.

⁹ Lo kiri lo tene na mbi: “Li, mo baa asioni ye so zo alingbi ti baa na le ti lo fani use pepe, afungo ye so azo ayeke sara ge so!”

¹⁰ Mbi li si ye so mbi baa ayeke so: na tere ti dere ti gbagba ni kue, a de alimo ti anyama nde nde so kue ayeke hara harango nga na anyama so ayeke sioni so akpa titene zo abaa ni pepe. A de nga limo ti ayanda kue ti azo ti Israel na tere ti dere ni angoro ni kue kue kue.

¹¹ Akangba balembarambara ti azo ti Israel aluti na le ti alimo ni. Na popo ti ala Yazania, molenge ti Shafan ti koli ayeke daa. Zo oko oko agbu kete ta ti zongo na dukani na maboko ti lo si gba ti guru ti dukani ni ayeke ya ti gue na nduzu.

¹² Nzapa atene na mbi: “Molenge ti zo, ye so akangba ti Israel ayeke sara na gbe mingo so, mo baa ni na le ti mo awe-aa? Zo oko oko ayeke na ndo ti vorongo nzapa ti lo na ya ti kubu ti lo. Ala yeke tene: ‘KOTA GBIA alingbi ti baa e oko pepe; lo do kodro ni, lo zia awe!’ ”

¹³ Lo kiri lo tene na mbi: “Fade mo yeke kiri ti baa ambeni sioni ye so ala yeke sara si zo alingbi ti baa na le ti lo fani use pepe.”

¹⁴ Lo mu mbi, lo gue na mbi na yanga ti kota da ti Nzapa so abaa le na mbage ti Banga. Kâ, ambeni wali aduti na sese si ayeke toto kuâ ti Tamuz.

¹⁵ Lo hunda mbi, lo tene: “Molenge ti zo, mo baa na le ti mo awe-aa? Fade mo yeke kiri ti baa asioni sarango ye so ayeke sioni mingi ahon ti so.”

¹⁶ Lo mu mbi, lo gue na mbi na ya ti gbagba ti kota da ti lo. Na yanga ti ndo so ayeke nde si ayeke nzoni kue, ambeni koli so li ti ala nduru na baleuse na oku aluti na popo ti ya ti gbagba ni na gbalaka. Ala zia peko ti ala na ndo so ayeke nde si ayeke nzoni kue so si ala yeke baa ndo na mbage so lâ ayeke londo daa. Ala yeke kuku akpo li ti ala na sese ti voro lâ.

¹⁷ Nzapa ahunda mbi, atene: “Molenge ti zo, mo baa na le ti mo awe-aa? Asioni ye so zo alingbi ti baa na le ti lo fani use pepe si azo ti Juda ayeke sara ni ge so, alingbi na ala pepe. Na ndoni, ala yeke sara ngangu na azo ahon ndoni na ya ti kodro ni, ala yeke sara kue titene ngonzo ti mbi alondo. Baa, fadeso ala mu mbeni nduru maboko ti keke si ayeke ga na ni nduru na hon ti ala.

¹⁸ Mbi nga, fade mbi yeke sara ye na ala na lege ti ngonzo ti mbi ti wâ. Mbi yeke baa mawa ti ala pepe, mbi yeke zia zo oko pepe. Ataa ala dekongo na mbi na kota go, mbi yeke ma ala pepe.”