Ezekiel 7 - Mbeti ti Nzapa - Tënë so amu fini

KOTA GBIA atene tënë ti tanga ti akpale

¹ Tënë ti *KOTA GBIA asi na mbi, atene:

² “Ti mo, *molenge ti zo, tënë so Kota Gbia NZAPA atene na azo ti sese ti Israel ayeke so: Ye kue ahunzi awe! Ye kue ahunzi ngbii asi na ndangoro osio ti kodro ni.

³ Israel, fadeso, ti mo ahunzi awe! Mbi yeke tokua ngonzo ti mbi na ndö ti mo, mbi yeke fâ ngbanga na li ti mo alingbi na lege ti sarango ye ti mo. Asioni ye so mo sara si zo alingbi ti baa na le ti lo fani use pepe so, mbi yeke futa mo alingbi na ni.

⁴ Mbi yeke baa mawa ti zo oko pepe, mbi yeke zia zo oko pepe. Mbi yeke futa mo alingbi na lege ti sarango ye ti mo nga na asioni ye so mo sara si zo alingbi ti baa na le ti lo fani use pepe; aye so kue ayeke na popo ti ala. Tongaso, fade ala yeke hinga atene, mbi laa mbi yeke KOTA GBIA.

⁵ “Tënë so Kota Gbia NZAPA atene ayeke so: Kpale ayeke ga! Mbeni kpale ti lingbi na ni ayeke daa pepe!

⁶ Ye kue ahunzi awe! Ye kue ahunzi awe! Kpale ti ndani ayeke ti na ndö ti ala! Asi awe!

⁷ Ala azo ti kodro ni, ngoi ti ala alingbi awe! Lango ni aga nduru awe! Lango ti fango ngbanga aga nduru awe! Na ndö ti ahoto, gi wusuwusu, ngia ayeke daa mbeni pepe.

⁸ Fadeso, fafadeso, mbi yeke tuku ngonzo ti mbi ti wâ na ndö ti ala; mbi yeke tuku ngonzo ti mbi na ndö ti ala ngbii be ti mbi ade si. Mbi yeke fâ ngbanga na li ti ala alingbi na sarango ye ti ala. Asioni ye so ala sara si zo alingbi ti baa na le ti lo fani use pepe so, mbi yeke futa ala alingbi na ni.

⁹ Mbi yeke baa mawa ti zo oko pepe, mbi yeke zia zo oko pepe. Mbi yeke futa ala alingbi na sarango ye ti ala nga na asioni ye so ala sara si zo alingbi ti baa na le ti lo fani use pepe so; aye ni kue ayeke na popo ti ala. Tongaso, fade ala yeke hinga atene, mbi laa mbi KOTA GBIA laa, mbi yeke pika ala.

¹⁰ “Baa, lango ti fango ngbanga laa! Ngoi ti ala alingbi awe! Sarango ngangu na zo ayeke gue guengo na nduzu, sarango baba ayeke mai maingo.

¹¹ Sarango ngangu na zo aga tongana keke so ayo na nduzu ti pika na zo. Mbeni ye ti ala oko ayeke ngba pepe, ataa mosoro ti ala, ataa wuluwulu ti ala, wala baba ti ala!

¹² Ngoi ni alingbi awe! Lango ni aga nduru awe! Ayeke nzoni zo ti vongo ye akai ngia ti lo, zo ti kango ye aduti na vundu pepe, ngbanga ti so ngonzo ti mbi ti wâ ayeke londo na tere ti azo ti kodro ni kue.

¹³ Fade zo ti kango ye ayeke kiri ti wara akungba ti lo pepe, ataa lo de na fini. Biani, ye so a baa na ya ti mbeni ye tongana bango-li si atene tënë ti kpale so ayeke ga na ndö ti azo ti kodro, fade ye ni ayeke si. Zo oko oko ayeke duti na ya ti sioni ti lo, ndani laa zo ayeke kiri ti wara ngangu pepe.

¹⁴ Ataa a huru tatalita, ataa a leke ye kue ndali ti bira, zo oko ti gue na bira ni ayeke daa pepe, ngbanga ti so ngonzo ti mbi ti wâ alondo na tere ti azo ti kodro ni kue awe.”

Zo oko ti kpe fango ngbanga ayeke daa pepe

¹⁵ “Na ndö ti alege, gi bira na bira, na ya ti ada, gi kobela ti bubango kodro na kota nzara. Na ya ti ayaka, azo ayeke kui na ya ti bira, na ya ti agbata, kota nzara na sioni kobela ti bubango kodro ayeke fâ azo.

¹⁶ Azo so ayeke ngba na fini ayeke kpe ti gue na li ti ahoto. Tongana ti so *ambipa ti apopo-hoto so ayeke dema, zo oko oko ayeke dema ndali ti sioni ti lo.

¹⁷ Amaboko ti ala kue ayeke woko si likunu ti ala ayeke do kpakpakpa.

¹⁸ Ala yeke yu bongo ti mua, ala yeke do na mbeto. Kamene ayeke gbu le ti ala, ala yeke kio kua ti li ti ala.

¹⁹ Ala yeke tuku nginza ti ala na ndö ti alege, lôro ti ala ayeke ga tongana zende na le ti ala. Na lango ti ngonzo ti KOTA GBIA, nginza na lôro ti ala alingbi ti soo ala pepe. Ala yeke wara kobe ti kai na nzara ti ala pepe, ala yeke kui nzara, ngbanga ti so nginza na lôro laa abi ala na ya ti siokpari.

²⁰ Ala sara baba ndali ti aye ti pendere ti ala. Ala mu aye ni, ala sara na angbongboro nzapa, afungo yanda ti ala so zo alingbi ti baa na le ti lo fani use pepe so. Ndani laa mbi yeke sara si aye ni so aga tongana zende na le ti ala.

²¹ Fade mbi yeke zia awande titene ala nzi aye ni, agodobe agbu ni tongana ye so agbu na peko ti bira ti hon na ni. Ala yeke sara si aye ni aga sioni.

²² Mbi yeke bi le ti mbi yongoro tongana awande aga ti sara si mosoro ti mbi aga sioni: asioni zo ayeke li kâ si ala yeke sara titene mosoro ni aga sioni.

²³ Mo leke azingiri ti wen, ngbanga ti so fango zo asi singo na ya ti kodro ni, sarango ngangu na zo asi singo na ya ti gbata ni.

²⁴ Fade mbi yeke sara titene amara so ayeke sioni ahon ndoni aga amu ada ti ala. Mbi yeke kai baba ti angangu zo, awato ni ayeke sara si ando ti vorongo anzapa ti ala aga sioni.

²⁵ Kota mbeto ayeke ga. Ala yeke gi siriri, me ala yeke gi ni gbaa.

²⁶ Akpale ayeke si na peko ti tere, na peko ti tere, sioni sango ayeke ga na ndö ti tere, na ndö ti tere. Azo ayeke hunda na wayanga-nzapa ti tene na ala peko ti ye so lo baa na ya ti mbeni ye tongana bango-li; wayango-sandaga ayeke na ye oko pepe ti fa na azo, *akangba ayeke kiri ti mu wango pepe.

²⁷ Fade gbia ayeke sara mua, makonzi ayeke duti na kota mawa, maboko ti azo ti kodro ayeke do dongo. Mbi yeke sara ye na ala alingbi na lege ti sarango ye ti ala, mbi yeke fâ ngbanga na li ti ala alingbi na ngbanga so ala fâ na li ti amba ti ala. Tongaso, ala yeke hinga atene, mbi yeke KOTA GBIA.”