Ezekiel 48 - Mbeti ti Nzapa - Tënë so amu fini

Sese ti amara ti mbage ti Banga

¹ “So ayeke iri ti amara nga na sese so a mu na ala. Sese so a mu na Dan alondo kâ na mbage ti Banga, na tere ti lege so ague na Hetlon, na mbage ti Hamat nga na Hasar-Enan, nduru na sese ti Damas nga na ti Hamat. Yanga ti sese ni alondo na mbage ti To si ahon ngbii asi na kota ngu-ingo ti Mediterane na mbage ti Do.

² Ti to nda ni na yanga ti sese ti Dan, ti londo na To ngbii asi na Do, ti Aser sese ni laa.

³ Ti to nda ni na yanga ti sese ti Aser, ti londo na To ngbii asi na Do, ti Neftali sese ni laa.

⁴ Ti to nda ni na yanga ti sese ti Neftali, ti londo na To ngbii asi na Do, ti Manase sese ni laa.

⁵ Ti to nda ni na yanga ti sese ti Manase, ti londo na To ngbii asi na Do, ti Efraim sese ni laa.

⁶ Ti to nda ni na yanga ti sese ti Efraim, ti londo na To ngbii asi na Do, ti Ruben sese ni laa.

⁷ Ti to nda ni na yanga ti sese ti Ruben, ti londo na To ngbii asi na Do, ti Juda sese ni laa.”

Sese ti KOTA GBIA

⁸ “Na tere ti sese ti Juda, ti londo na To ngbii asi na yanga ti kota ngu-ingo ti Mediterane, sese so a zia ni nde ayo alingbi tere na sese so a mu na mara oko oko. Ti londo na Banga asi na Mbongo, sese ni ayo kudee 25 000. Da so ayeke nde si ayeke nzoni kue ayeke duti na be ti sese ni.

⁹ Sese so a zia nde ndali ti *KOTA GBIA, fade ayeke yo kudee 25 000 na mbage, kudee 20 000 na mbeni mbage.

¹⁰ Ti awayango-sandaga, fade ala yeke mu na ala mbage ti sese so ayeke nde si ayeke nzoni kue. Sese ni ayo kudee 25 000 na mbage ti Banga, 10 000 na mbage ti kota ngu-ingo, 10 000 na mbage ti To, 25 000 na mbage ti Mbongo. Da ti KOTA GBIA ayeke duti na be ni.

¹¹ Ndo ni so ayeke ndali ti awayango-sandaga so a zia ala nde ndali ti Nzapa; ala so ayeke azo ti mara ti Sadok. Lani ala sara kua ti KOTA GBIA na ngoi so azo ti Israel agirisa lege; awayango-sandaga so angba na tere ti Nzapa, ala girisa lege pepe tongana ti azo ti mara ti Lévi.

¹² Ndani laa, fade a yeke mu na ala mbage ti sese so a bata ni ndali ti KOTA GBIA; sese ni ayeke na tere ti sese ti azo ti mara ti Lévi.

¹³ Fade sese ti azo ti mara ti Lévi alingbi tere na sese ti awayango-sandaga. Asese ni use kue ayo kudee 25 000 na mbage, kudee 10 000 na mbeni mbage.

¹⁴ Zo oko alingbi ti ka sese ni pepe, wala ti mu ti lo ti sanze na ti mba ti lo pepe; asese so ayeke asese so azo amu na KOTA GBIA, tongana ti so ala mu akozo le ti kobe ti ala na lo; zo oko alingbi ti mu ni na mbeni zo pepe, ngbanga ti so a zia sese ni nde ndali ti KOTA GBIA.”

Sese so a mu ndali ti gbata nga na makonzi

¹⁵ “Sese so angba, kudee 5 000 na mbage, kudee 25 000 na mbeni mbage ayeke ndali ti asenge senge kua. Fade ala yeke sara gbata daa, ada ti lango nga na ando ti tengo pere ti anyama; gbata ni ayeke duti na be ni.

¹⁶ Gbata ni ayeke yo kudee 4 500 na mbage ti Banga, 4 500 na mbage ti Mbongo, 4 500 na mbage ti To si 4 500 na mbage ti Do.

¹⁷ Fade ala yeke zia mbeni ndo angba senge na tere ti gbata ni: kudee 250 na mbage ti Banga, 250 na mbage ti Mbongo, 250 na mbage ti To si 250 na mbage ti Do.

¹⁸ Na tere ti sese so a mu ndali ti KOTA GBIA, tanga ti sese so ayeke ndali ti gbata ni a yeke ngba na mbage ti To, mbeni na mbage ti Do. Asese ni use kue ayo kudee 10 000. Akobe so ala yeke wara na sese ni so, ala yeke mu na azo so ayeke sara kua na ya ti gbata ni.

¹⁹ Azo kue ti amara ti Israel so ayeke sara kua na ya ti gbata ni ayeke fâ yaka na ndö ti sese ni.

²⁰ Sese so kue ala yeke mu ndali ti KOTA GBIA ayo kudee 25 000 na mbage, kudee 25 000 na mbeni mbage; sese ni so ayeke nde si ayeke nzoni kue. Fade ala yeke kangbi ya ni osio si ala mu oko titene ala sara gbata daa.

²¹ Tanga ti sese ni ayeke ti makonzi; ayeke mbage na mbage ti sese so a zia nde ndali ti KOTA GBIA nga na ti sese so a mu ti sara gbata daa. Sese ni ayo kudee 25 000, ato nda ni na yanga ti sese so a zia nde ndali ti KOTA GBIA, ague ngbii asi na yanga ni ti mbage ti To; akiri ayo kudee 25 000, ato nda ni na mbage ti Do, ague ngbii asi na kota ngu-ingo ti Mediterane. Sese ni ayeke ga ye ti makonzi. Sese so a zia nde ndali ti KOTA GBIA na sese so a mu ndali ti da so ayeke nde si ayeke nzoni kue, ayeke duti na be ti sese so a zia ni nde so.

²² Sese ti azo ti mara ti Lévi na sese so ala sara gbata daa ayeke duti na popo ti asese use ti amakonzi. Asese ti mara ti Juda ayeke na Banga ti asese ti makonzi ni; asese ti Benjamin ayeke na Mbongo ni.”

Sese ti amara ti mbage ti Mbongo

²³ “Sese so a mu na tanga ti azo ti mara ayeke so: ti londo na yanga ti sese ti To ngbii asi na kota ngu-ingo ti Mediterane na mbage ti Mbongo, ti Benjamin sese ni laa.

²⁴ Ti to nda ni na yanga ti sese ti Benjamin, ti londo na mbage ti To ngbii asi na Do, ti Siméon sese ni laa.

²⁵ Ti to nda ni na yanga ti sese ti Siméon, ti londo na mbage ti To ngbii asi na Do, ti Isakar sese ni laa.

²⁶ Ti to nda ni na yanga ti sese ti Isakar, ti londo na mbage ti To ngbii asi na Do, ti Zabulon sese ni laa.

²⁷ Ti to nda ni na yanga ti sese ti Zabulon, ti londo na mbage ti To ngbii asi na Do, ti Gad sese ni laa.

²⁸ Yanga ti sese ti Gad na mbage ti Mbongo ayeke na yanga ti kodro ni, alondo na Tamar na mbage ti To, ague ngbii asi na ngu ti Meriba na Kades. Na pekoni, akiri alinda na yanga ti ngu ti Ezipte ague ngbii asi na kota ngu-ingo ti Mediterane.

²⁹ So ayeke sese so ala yeke bi mbeni ye ti kangbi ni na popo ti amara ti Israel laa. Fade sese ni ayeke ga ye ti ala. So tënë ti yanga ti Kota Gbia NZAPA laa.”

Ayanga ti gbagba baleoko na use ti Jérusalem

³⁰ “So ayeke alege ti sigingo ni na ya ti gbata ni. Na mbage ti Banga, gbagba ni ayo kudee 4 500.

³¹ Fade a yeke di iri ti amara ti Israel na ndö ti ayanga ti gbagba oko oko. Na mbage ti Banga, ayanga ti gbagba ayeke ota: yanga ti gbagba oko na iri ti Ruben, oko na iri ti Juda, oko na iri ti Lévi.

³² Na mbage ti To, gbagba ni ayo kudee 4 500. Ayanga ni ayeke ota: yanga ti gbagba oko na iri ti Joseph, oko na iri ti Benjamin, oko na iri ti Dan.

³³ Na mbage ti Mbongo, gbagba ni ayo kudee 4 500. Ayanga ni ayeke ota: yanga ti gbagba oko na iri ti Siméon, oko na iri ti Isakar, oko na iri ti Zabulon.

³⁴ Na mbage ti Do, gbagba ni ayo kudee 4 500. Ayanga ni ayeke ota: yanga ti gbagba oko na iri ti Gad, oko na iri ti Aser, oko na iri ti Neftali.

³⁵ Ti ngoro gbagba ni kue, yongo ni ayeke kudee 18 000. “Ti londo na lango ni so, fade iri ti gbata ni ayeke ‘KOTA GBIA ayeke na ndo so.’”