Ezekiel 47 - Mbeti ti Nzapa - Tënë so amu fini

Ngu so ayeke sigigi na ya ti kota da ti Nzapa

¹ Koli ni amu mbi, akiri na mbi na yanga ti kota da ti Nzapa ni. Mbi baa ngu ayeke sigigi na gbe ti yanga ti kota da ni na mbage ti To, ngbanga ti so dawa ti kota da ni ayeke na mbage ti To. Ngu ni ayeke sua na mbage ti maboko ti koli ti da ni si ayeke hon na mbage ti Mbongo ti gbalaka.

² Lo mu mbi, lo sigigi na mbi na yanga ni ti mbage ti Banga. Na pekoni, lo mu mbi, e ngoro tere ti da ni ngbii e si na yanga ni ti mbage ti To. Kâ, mbi kiri mbi baa ngu ayeke sua na mbage ti maboko ti koli.

³ Koli ni ahon kete na mbage ti To. Lo gbu kamba na maboko ti lo. Lo haka kudee saki oko. Na ndo so kâ, lo sara si mbi fâ ngu ni. Ngu ni asi na kutu ti gere ti mbi.

⁴ Lo kiri lo haka kudee saki oko, lo sara si mbi fâ ngu ni. Ngu ni asi na likunu ti mbi. Lo kiri lo haka kudee saki oko, lo sara si mbi fâ ngu ni. Ngu ni asi na ngbonda ti mbi.

⁵ Na pekoni, lo kiri lo haka kudee saki oko; ngu ni asuku, mbi lingbi ti fâ ni pepe. Titene zo afâ ni, alingbi lo hinga ngu si, ngbanga ti so zo alingbi ti fâ ni na gere pepe.

⁶ Tongaso lo tene na mbi: “*Molenge ti zo, mo baa awe?” Lo mu mbi, lo gue na mbi yongoro kete; na pekoni, lo kiri na mbi na yanga ti ngu ni.

⁷ Tongana lo kiri na mbi awe, mbi baa gba ti akeke na yanga ti ngu ni mbage na mbage.

⁸ Lo tene na mbi: “Ngu so ayeke sua na mbage ti To ti sese ni, ayeke gue na lando ti Araba, na pekoni, ayeke tuku na ya ti kota ngu ti Gba-ti-ingo. Tongana atuku na ya ti kota ngu-ingo ni awe, ngu ni akiri aga nzoni.

⁹ Na ndo so kue ngu ni ayeke si daa, anyama so kue ayeke duti na fini awu. Fade asusu kue ayeke ga gbani gbani. Biani, ngu ni ayeke si kâ si ngu ti kota ngu-ingo ni ayeke ga nzoni; na ndo so kue ngu ni asi daa, aye so kue ayeke na fini awu.

¹⁰ Tongaso, azo ti gingo susu ayeke duti na yanga ti ngu ni. Alondo na En-Gedi ngbii asi na En-Eglaim, azo ti gingo susu ayeke gbara agbanda ti ala titene ahole. Kâ, mo yeke wara mara ti asusu nde nde gi tongana ti so mo yeke wara na kota ngu-ingo ti Mediterane.

¹¹ Me angu so ayeke ngba na tere ti kota ngu-ingo ayeke ga nzoni pepe. A yeke bata ala tongaso ti sara na ingo.

¹² Na yanga ti ngu ni mbage na mbage, mara ti akeke nde nde so a yeke te ale ni asigigi daa. Akugbe ni ayeke hole pepe; alengo ni ayeke hunzi na ndö ti amaboko ti keke ni pepe. Na ya ti nze oko oko, akeke ni ayeke le afini lengo, ngbanga ti so ala wara ngu so alondo na da so ayeke nde si ayeke nzoni kue. Ale ti keke ni ayeke ti tengo ni si akugbe ni ayeke ti kaingo na kobela.”

KOTA GBIA afa akatikati ti sese ti Israel

¹³ Tënë so Kota Gbia NZAPA atene ayeke so: “Mbi yeke fa na ala akatikati ti sese so ala amara baleoko na use ti Israel ayeke kangbi na popo ti ala. Na ya ti kangbingo ye ni, mara ti Joseph ayeke wara ti lo use.

¹⁴ Ala yeke kangbi sese ni na popo ti ala; zo oko oko ayeke wara alingbi na ti mba ti lo. Biani, mbi yoro ando maboko ti mbi na nduzu, mbi deba yanga ti mbi ti mu sese ni na akotara ti ala. Tongaso sese ni ayeke ga ye ti ala.

¹⁵ Katikati ti sese ni ayeke tongaso: Na mbage ti Banga: katikati ni ayeke londo kâ na kota ngu-ingo ti Mediterane, ayeke hon na lege ti Hetlon so ague na Sedad.

¹⁶ Na pekoni, ayeke hon na ya ti agbata ti Berota nga na ti Sibraim so ayeke na popo ti sese ti Damas nga na ti Hamat. Ti hunzi na ni, katikati ti sese ni ayeke hon na mbage ti Haser-Tikon so ayeke nduru na yanga ti sese ti Horan.

¹⁷ Tongaso, katikati ti sese ni ayeke londo na kota ngu-ingo ti Mediterane ngbii asi na Hasar-Enan. Na mbage ti Banga, katikati ni ayeke hon na tere ti sese ti Damas na ti Hamat. So katikati ni na mbage ti Banga laa.

¹⁸ Na mbage ti To, katikati ni ayeke londo na popo ti Damas na Horan, ayeke hon na tere ti ngu ti Jourdain, na popo ti Galaad na sese ti Israel; ayeke gue ngbii asi na Tamar, asi na kota ngu ti Gba-ti-ingo. So katikati ni na mbage ti To laa.

¹⁹ Na mbage ti Mbongo, katikati ni ayeke londo na Tamar, ague ngbii asi na ngu ti Meriba ti Kades, ayeke hon na tere ti ngu ti Ezipte ngbii asi na kota ngu-ingo ti Mediterane. So katikati ni na mbage ti Mbongo laa.

²⁰ Na mbage ti Do, yanga ti kota ngu-ingo ti Mediterane ayeke katikati ti ala laa, alondo na mbage ti Mbongo ague ngbii asi na Hamat na mbage ti Banga. So katikati ni na mbage ti Do laa.

²¹ “Fade ala amara baleoko na use ti Israel, ala yeke kangbi sese ni na popo ti ala.

²² Ala yeke bi mbeni ye ti hinga lege so ala yeke kangbi sese ni na popo ti ala. Ala yeke kangbi nga sese ni na awande so ayeke lango na popo ti ala, ala so adu amolenge na sese ni. Fade ala yeke baa awande ni tongana azo ti Israel, tongana amolenge ti kodro. Awande ni na ala, azo ti mara ti Israel, ayeke kangbi sese ni ti ga ye ti ala.

²³ Na ya ti mara so wande ni aduti daa, fade azo ti Israel ayeke mu na lo mbeni sese ti mara ni ti ga ye ti lo. So tënë ti yanga ti Kota Gbia NZAPA laa.”