Ezekiel 43 - Mbeti ti Nzapa - Tënë so amu fini

KOTA GBIA akiri na ya ti kota da ti lo

¹ Koli ni amu mbi, ague na mbi na yanga ti gbagba ni, na yanga ni so abaa ndo na mbage ti To.

² Kâ, mbi baa gonda ti Nzapa ti Israel alondo na To si ayeke ga. Toto ti gonda ni ayeke tongana toto ti kota ngu-ingo; gonda ni ayeke su na ndö ti sese.

³ Ye so mbi baa na ya ti mbeni ye tongana bango-li so akpa ye so ando mbi baa tongana *KOTA GBIA aga ti buba Jérusalem; akpa ye so mbi baa na ngoi so mbi yeke na tere ti *bale ti Kebar. Tongaso, mbi kuku, mbi kpo li ti mbi na sese.

⁴ Gonda ti KOTA GBIA aga ali na ya ti kota da ni na lege ti yanga ni so ayeke na mbage ti To.

⁵ Tongaso, yingo ti Nzapa ayo mbi, ague na mbi na ya ti gbagba ti kota da ni ti ya ni. Mbi baa gonda ti KOTA GBIA asi singo na ya ti kota da ni.

⁶ Mbi ma mbeni go ayeke tene tënë na mbi na ya ti da ni kâ. Andaa na ngoi ni so, koli so ague na mbi kâ so angba na tere ti mbi.

⁷ Go ni atene na mbi: “*Molenge ti zo, ndo so ge so ayeke ndo ti mbata ti mbi ti gbia, ndo so mbi yeke zia gere ti mbi daa. Mbi yeke duti na ndo so lakue lakue na popo ti azo ti Israel. Iri ti mbi so ayeke nde si ayeke nzoni kue so, fade azo ti mara ti Israel na agbia ti ala ayeke kiri ti buba ni pepe na lege ti sarango ye ti ndumba ti ala wala na lege ti lungo akuâ ti agbia ti ala so akui so.

⁸ Agbia ni azia yanga ti da ti ala nga na kadere ti yanga ti da ti ala na tere ti yanga ti da ti mbi nga na kadere ti yanga ti da ti mbi. Gi dere oko si akangbi popo ti mbi na ala. Iri ti mbi so ayeke nde si ayeke nzoni kue so, ala buba ni na lege ti asarango ye so zo alingbi ti baa na le ti fani use pepe. Ndani laa ngonzo agbu mbi si mbi fâ ala kue kue kue.

⁹ Fadeso, ala zia sarango ye ti ndumba ti ala; ala zia akuâ ti agbia ti ala yongoro na tere ti mbi si mbi yeke duti na popo ti ala lakue lakue.

¹⁰ “Ti mo, molenge ti zo, mo fa na azo ti Israel kota da ni, tongaso si kamene agbu le ti ala ndali ti sioni ti ala si ala gbu li ti ala na ndö ti kode ti sarango da ni.

¹¹ Tongana kamene ti asioni so ala sara so agbu ala awe, fa na ala lege so a sara na kota da ni, kode so a leke na ni, alege ti lingo ni nga na alege ti sigingo ni, lege so a zia aye oko oko kue na ya ti da ni, ambela ti da ni nga na andia ni. Su aye so kue na mbeti, mo zia na gbe ti le ti ala, tongaso si ala lingbi ti bata lege ti aye ti da ni oko oko kue si ala sara ye alingbi na andia ti da ni.

¹² So ndia ti kota da ni laa: sese so kue ayeke na tere ti da ni, na ndö ti hoto, ayeke nde si ayeke nzoni kue ahon atanga ni. Baa, so ndia ti kota da ni laa.”

Gbalaka na asandaga

¹³ Baa konongo ti gbalaka ni laa; a haka ni na mbeni kudee so ayo ahon senge kudee ni, popo ni alingbi na le ti maboko oko. A zi du na tere ti gbalaka ni kue; du ni alinda kudee oko, akono kudee oko. Na mbage ti gigi, yanga ti du ni ayo ndambo ti kudee oko na nduzu. Yongo ti gbalaka ni na nduzu ayeke tongaso:

¹⁴ ti londo na gere ni kâ na sese, mbeni etaze ayeke daa, ayo kudee use na nduzu. Kozo etaze ni so ayeke kete ahon gere ni, mbage na mbage, kudee oko. Na ndö ti etaze ni so, mbeni etaze ayeke daa, ayo kudee osio na nduzu. Use etaze ni ayeke kete ahon kozo ni, mbage na mbage, kudee oko.

¹⁵ Na ndö ti a-etaze ni, gbalaka ayeke daa si yongo ni na nduzu ayeke kudee osio. Adidi ayeke na andangoro osio ti gbalaka ni.

¹⁶ Gbalaka ni ayo kudee baleoko na use na mbage, kudee baleoko na use na mbeni mbage; ayo alingbi tere mbage na mbage osio kue.

¹⁷ Use etaze ni ayo kudee baleoko na osio na mbage, kudee baleoko na osio na mbeni mbage; ayo alingbi tere mbage na mbage osio kue. Na mbage ti gigi ti gbalaka ni, mbeni kete dere ayo ndambo ti kudee oko, angoro tere ti etaze ni kue. Mbeni du so ayo kudee oko angoro etaze ni kue. Titene zo asi na use etaze ni, alingbi lo mondee eskalie so ayeke na mbage ti To.

¹⁸ Koli ni atene na mbi: “*Molenge ti zo, tënë so Kota Gbia NZAPA atene ayeke so: Lango so ala yeke sara ande gbalaka titene ala mu *sandaga so a yeke gbi ni kue na wâ na ndö ni si ala yeke fi mene ti anyama na tere ni, ndia ni ayeke tongaso:

¹⁹ Fade mo yeke mu koli-bagara na awayango-sandaga so ala yeke azo ti mara ti Lévi, *ahale ti Sadok si ala ga nduru na mbi ti sara kua na mbi; so tënë ti yanga ti mbi, Kota Gbia NZAPA laa. Mo yeke mu koli-bagara na sandaga ndali ti siokpari.

²⁰ Mo yeke mu mene ti koli-bagara ni, mo zia na tere ti adidi osio ti gbalaka ni, na tere ti andangoro osio ti use etaze ni nga na tere ti kete dere so angoro use etaze ni. Tongaso, mo yeke sukula *sioni ti gbalaka ni si mo yeke zia ni nde.

²¹ Na pekoni, koli-bagara so a mu na sandaga ndali ti siokpari so, fade mo yeke sara si a gue, agbi ni na mbeni ndo so a leke ndali ni, na gigi ti da so ayeke nde si ayeke nzoni kue.

²² Na use lango ni, mo yeke mu koli-ngasa so mbeni mbage ti tere ti lo abuba pepe ti mu na sandaga ti sukula *sioni ti gbalaka ni tongana ti so mo sara na koli-bagara so.

²³ Tongana mo mu sandaga ndali ti siokpari ni kue awe, fade mo yeke mu na popo ti anyama mbeni koli-bagara so mbeni mbage ti tere ti lo abuba pepe nga na mbeni koli-taba so mbeni mbage ti tere ti lo abuba pepe ti mu na sandaga.

²⁴ Mo yeke ga na ala na dawa ti mbi, KOTA GBIA; awayango-sandaga ayeke tuku ingo kete kete na ndö ni si ala gbi ni kue na wâ na mbi, KOTA GBIA.

²⁵ Na ya ti lango mbarambara, na lango oko oko, mo yeke mu koli-ngasa na sandaga ndali ti siokpari; mo yeke mu nga na popo ti anyama koli-bagara na koli-taba so mbeni mbage ti tere ti lo abuba pepe ti mu na sandaga.

²⁶ Na ya ti lango mbarambara, fade a sukula *sioni ti gbalaka ni si a zia ni nde ti sara na kua.

²⁷ Tongana alango mbarambara so ahunzi awe, na lango miombe ni nga na alango ti peko, fade awayango-sandaga ayeke mu na ndö ti gbalaka ni asandaga so a yeke gbi ni kue na wâ nga na asandaga ti beoko ndali ti azo ti kodro. Tongaso, mbi yeke sara nzoni be na ala. So tënë ti yanga Kota Gbia NZAPA laa.”