Ezekiel 42 - Mbeti ti Nzapa - Tënë so amu fini

Ada so ayeke na tere ti kota da ni

¹ Koli ni asigigi na mbi na ya ti gbagba ti gigi na mbage ti Banga. Lo gue na mbi na ya ti ada ti mbage ti Banga so abaa le na gbagba ni si abaa nga le na da so ayeke na peko ti da ti Nzapa.

² Na mbage ti Banga, da ni ayo kudee ngbangbo oko na mbage, kudee baleoku na mbeni mbage.

³ Na mbage ni oko, da ni abaa le na ndo so ayeke na ya ti gbagba ni si angoro kota da ti Nzapa. Ti mbage ti da ni so, gi mbeni mbage ni so ayo kudee baleuse laa abaa le na ya ti gbagba ni. Na mbeni mbage ni, da ni abaa le na ndo so a leke ndö ti sese ti ya gbagba ti gigi ni na têne. Da ni ayeke na averanda, veranda oko na ndö ti mba ti lo, veranda oko na ndö ti mba ti lo, kue etaze ota.

⁴ Na dawa ti akubu ni, na mbage ti gbagba ti ya ni, mbeni lege ayeke daa so konongo ni ayeke kudee baleoko, ayo kudee ngbangbo oko na mbage. Yanga ni ti si na ya ti akubu ni ayeke na mbage ti Banga.

⁵ Akubu ti nduzu, ti ota etaze ni, ayeke kete ahon akubu ti use etaze ni si ala ti use etaze ni ayeke kete ahon ala ti gbeni, ngbanga ti so averanda ti nduzu, ti ota etaze ni akono ahon ala ti use etaze ni si ala ti use etaze ni akono ahon ala ti gbeni.

⁶ Ti averanda ni, veranda oko ayeke na ndö ti mba ti lo, veranda oko na ndö ti mba ti lo; kue etaze ota. Averanda ni aluti na ndö ti ayongoro ngbongboro gere ni tongana ti atanga ti da ti ya ti gbagba ni pepe. Akubu so ayeke na nduzu, ti ota etaze ni, ayeke kete ahon akubu ti use etaze ni si ala ti use etaze ni ayeke kete ahon ala ti gbeni.

⁷ Dere so ayeke na tere ti akubu ni si abaa le na gbagba ti gigi ni ayo kudee baleoku.

⁸ Biani, akubu ni ayo kudee baleoku. Me akubu so abaa le na kota da ti Nzapa ayo kudee ngbangbo oko.

⁹ Na gbe ti akubu ni, na mbage ti To, mbeni yanga ti da ayeke daa ndali ti azo so alondo na ya ti gbagba ti gigi ti ga.

¹⁰ Yanga ti da ni ayeke na ndo so dere ti gbagba ni ato nda ni daa. Na mbage ti Mbongo, akubu ayeke nga daa so abaa le na gbagba ni si ala baa le na da so ayeke na peko ti kota da ti Nzapa.

¹¹ Na dawa ti akubu ni, mbeni lege ayeke daa. Akubu ni ayo, akono alingbi na akubu so ayeke na mbage ti Banga. Lege ti lingo ni na ti sigingo ni alingbi na ti ala ti Banga; kode so a leke na akubu ni kue alingbi tere.

¹² Ayanga ti da ti mbeni da so ayeke na mbage ti Mbongo akpa tere na ayanga ti da ti mbage ti Banga. Ndo so lege ti sigingo ni alondo daa so, mbeni yanga ti da ayeke daa so abaa le na dere so ayeke bata kota da ti Nzapa. Lege ti lingo na ya ni ayeke na mbage ti To.

¹³ Koli ni atene na mbi: “Akubu ti mbage ti Banga na ala ti mbage ti Mbongo so abaa le na ya ti gbagba ni, a zia ni nde ndali ti Nzapa. Awayango-sandaga so alingbi ti luti na dawa ti KOTA GBIA, na ndo so laa ala lingbi ti te akobe so ayeke nde si ayeke nzoni kue ahon atanga ni; na ndo so laa ala yeke zia aye so ayeke nde si ayeke nzoni kue ahon atanga ni, so ti tene asandaga so ala mu ndali ti siokpari nga na asandaga ti lekengo tënë. Biani, ndo ni ayeke nde si ayeke nzoni kue.

¹⁴ Tongana awayango-sandaga ali na ya ti kota da ti Nzapa awe, ala lingbi ti sigigi ti hon biaku na ya ti gbagba ti gigi pepe. Me ala yeke zia abongo so ala sara na kua na KOTA GBIA na ya ti akubu ni; ala yu ambeni bongo nde awe si ala gue na ndo so azo kue ayeke bongbi ka tere daa.”

Yongo ti gbagba ti mbage ti gigi

¹⁵ So koli ni ahunzi ti haka ya ti kota da ni awe, lo mu mbi, lo sigigi na mbi na lege ti yanga ni ti mbage ti To. Tongaso, lo haka yongo ti gbagba ni so angoro kota da ni kue.

¹⁶ Lo mu keke ti hakango na ye si lo haka ndo so ayeke na mbage ti To; ayo alingbi na keke ngbangbo oku ti hakango na ye.

¹⁷ Na keke ti hakango na ye ni, lo haka ndo so ayeke na mbage ti Banga; ayo alingbi na keke ngbangbo oku ti hakango na ye.

¹⁸ Na keke ti hakango na ye ni, lo haka ndo so ayeke na mbage ti Mbongo; ayo alingbi na keke ngbangbo oku ti hakango na ye.

¹⁹ Lo hunzi hakango ye ni na mbage ti Do; lo haka ndo ni si alingbi na keke ngbangbo oku ti hakango na ye.

²⁰ Lo haka gbagba so angoro kota da ti Nzapa mbage na mbage osio kue. Gbagba ti gigi ni, mbage na mbage ayo alingbi tere, ayo alingbi na keke ngbangbo oku ti hakango na ye. Gbagba so laa akangbi popo ti ye so a zia nde ndali ti Nzapa na ye so ayeke senge.