Ezekiel 3 - Mbeti ti Nzapa - Tënë so amu fini

¹ Lo tene na mbi, lo tene: “Molenge ti zo, mo te ye so ayeke na dawa ti mo so; mo te *rulo so, na pekoni, mo gue, mo tene tënë na azo ti Israel.”

² Tongaso mbi zi yanga ti mbi, lo sara si mbi te rulo ni.

³ Lo kiri lo tene na mbi: “Molenge ti zo, rulo so mbi mu na mo so, ayeke nzoni mo te ni ya ti mo asi si aga kobe ti mo.” Tongaso mbi te rulo ni, anzere na yanga ti mbi tongana mafuta ti wotoro.

⁴ Lo kiri lo tene na mbi: “Molenge ti zo, mo londo, mo gue na mbage ti azo ti Israel, mo mu atënë ti mbi mo tene na ala.

⁵ Mara so yanga ti kodro ti ala akpengba mingi si zo alingbi ti ma ya ni pepe so, azo tongaso laa mbi tokua mo na ala pepe; me mbi tokua mo na azo ti Israel.

⁶ Tongana mbi tokua fade mo na gba ti amara so yanga ti kodro ti ala akpengba mingi si mo lingbi ti ma ya ni pepe so, gbaa ala yeke ma mo.

⁷ Me ti azo ti Israel, fade ala yeke ke ti ma mo, ngbanga ti so ala ye ti ma mbi pepe. Biani, azo ti Israel kue ayeke azo ti ngangu li mingi, be ti ala akpengba mingi.

⁸ Nilaa, fade mbi yeke sara si mo nga, mo ga zo ti ngangu li si li ti mo akpengba mingi tongana ti ala.

⁹ Mbi yeke sara si li ti mo akpengba tongana diaman, akpengba ahon têne. Mo sara mbeto ti ala pepe, tere ti mo ado na le ti ala nga pepe. Biani, ala yeke azo ti mara ti ngangu li.”

¹⁰ Lo kiri lo tene na mbi: “Molenge ti zo, atënë so kue mbi yeke tene na mo so, mo zi mê ti mo ti ma ni, mo bata atënë ni kue na be ti mo.

¹¹ Na pekoni, mo gue, mo baa a-ita ti mo, amolenge ti azo ti mara ti mo so a gbu ala, a ga na ala ge so. Mo tene tënë na ala, ataa ala ma mo, ataa ala ma mo pepe, mo tene na ala, mo tene: ‘Tënë so Kota Gbia NZAPA atene ayeke so.’ ”

¹² Tongaso yingo ti Nzapa ayo mbi na nduzu si mbi ma na mbage ti peko ti mbi toto ti mbeni ye tongana gba ti azo so ayeke dekongo, atene: “E sepela KOTA GBIA ndali ti gonda ti lo so lo fa na ndo so lo yeke daa!”

¹³ Mbi ma toto ti *akpangi ti aye so ayeke na fini; akpangi ni ayeke pika tere. Mbi ma nga toto ti aruu na tere ti ala. Aye ni so ayeke toto ngangu mingi.

¹⁴ Tongaso yingo so fade ayo mbi na nduzu so ahon na mbi. Maboko ti KOTA GBIA agbu mbi si ayeke ngangu ahon mbi. Tongaso mbi hon, be ti mbi na vundu, be ti mbi ayeke so songo.

¹⁵ Mbi si na Tel-Abib, ndo ti azuife so a gbu ala, a gue na ala na kodro wande si ala yeke lango na tere ti *bale ti Kebar. Mbi sara lango mbarambara na popo ti ala, li ti mbi kue akpe.

Ezekiel ayeke ga sanziri ndali ti azo ti Israel

¹⁶ Na peko ti lango mbarambara ni, tënë ti KOTA GBIA asi na mbi, atene:

¹⁷ “Molenge ti zo, mbi zia mo sanziri ndali ti azo ti Israel. Tongana mo ma mbeni tënë na yanga ti mbi, fade mo yeke gboto mê ti ala na iri ti mbi.

¹⁸ Tongana mbi tene na zo ti sioni, mbi tene: ‘Mo lingbi na kuâ’; tongana mo gboto mê ti lo pepe, tongana mo tene tënë ni na lo pepe titene lo zia lege ti sioni sarango ye ti lo titene lo soo fini ti lo, fade zo ti sioni so ayeke kui ndali ti sioni ti lo; me mo laa mbi yeke hunda mene ti lo na maboko ti mo.

¹⁹ Me tongana mo gboto mê ti lo si lo ke sioni ti lo pepe, lo ke nga lege ti sioni sarango ye ti lo pepe, fade lo yeke kui ndali ti sioni ti lo; me ti mo, mo yeke soo fini ti mo.

²⁰ Tongana mbeni zo ti mbirimbiri azia sarango ye ti mbirimbiri si lo kiri ti sara ye ti kirikiri, fade mbi yeke zia kuku na dawa ti lo titene lo ti daa si lo yeke kui. Tongana mo gboto mê ti lo pepe, fade lo yeke kui ndali ti siokpari ti lo. Aye ti mbirimbiri so lo sara kozoni, fade a yeke dabe na ni mbeni pepe. Me mo laa, mbi yeke hunda mene ti lo na maboko ti mo.

²¹ Me tongana mo gboto mê ti zo ti mbirimbiri titene lo sara siokpari pepe si biani lo sara siokpari pepe, fade lo yeke ngba na fini, ngbanga ti so a gboto mê ti lo. Ti mo, mo yeke soo fini ti mo.”

Nzapa ahunda na Ezekiel ti kai ndali ti kete ngoi

²² Na ndo ni so, maboko ti KOTA GBIA akiri agbu mbi. Lo tene na mbi, lo tene: “Londo, mo gue na popo-hoto; kâ, fade mbi yeke tene tënë na mo.”

²³ Tongaso, mbi londo mbi gue na popo-hoto. Gonda ti KOTA GBIA ayeke kâ; gonda ni ayeke tongana gonda so mbi baa na ndembe so mbi yeke na yanga ti *bale ti Kebar. Tongaso mbi ti, mbi kpo li ti mbi na sese.

²⁴ Yingo ti Nzapa ali mbi, lo mu mbi, lo zia mbi, mbi luti na nduzu. Lo tene na mbi, lo tene: “Gue na ya ti da ti mo, mo kanga yanga ti da ni na ndö ti mo.

²⁵ Ti mo, molenge ti zo, fade azo ayeke ga na kamba ndali ti mo, ala yeke gbe mo na ni si mo yeke kiri ti sigigi ti duti na popo ti ala pepe.

²⁶ Fade mbi yeke sara si menga ti mo akanga na ya ti yanga ti mo si mo ga buburu. Tongaso fade mo yeke suku na ala pepe; biani, ala yeke azo ti mara ti ngangu li.

²⁷ Mbeni lâ, tongana mbi yeke na mbeni tënë ti tene na ala na lege ti mo, fade mbi yeke zi yanga ti mo si mo tene na ala, mo tene: ‘Tënë so Kota Gbia NZAPA atene ayeke so.’ Zo so aye ti ma, ayeke nzoni lo ma; zo so ake ti ma, ayeke nzoni lo ke ti ma! Biani, ala yeke azo ti mara ti ngangu li.”