Ezekiel 25 - Mbeti ti Nzapa - Tënë so amu fini

Tënë na tere ti azo ti Amon

¹ Tënë ti *KOTA GBIA asi na mbi, atene:

² “*Molenge ti zo, baa ndo na mbage ti azo ti Amon, mo tene tënë ti peko ti yanga ti mbi na tere ti ala.

³ Fade mo yeke tene na ala ti ma tënë so mbi Kota Gbia NZAPA, mbi yeke tene na ala: Na lango so ndo so a zia ni nde ndali ti mbi aga sioni, na lango so a buba sese ti Israel si a gbu azo ti Juda a gue na ala na kodro wande, ala azo ti Amon, ala tene, ‘Huuu huuu!’

⁴ Ndali ni, mbi yeke zia lege na azo ti mbage ti To ti ga ti mu sese ti ala, azo ti Amon, titene aga ti azo ni. Azo ni ayeke sara bâbâ ti ala na ndo ti ala, ala yeke sara ada ti lango ti ala na ndo ti ala. Azo ni laa ayeke te ale ti keke ti ala, azo ni laa ayeke nyon ngu ti me ti bagara ti ala.

⁵ Mbi yeke sara titene Raba, li-kodro ti Amon aga ndo so *azambala ayeke te pere daa si kodro ti azo ti Amon kue aga ndo so ataba ayeke lango daa. Tongaso, fade ala yeke hinga atene, mbi laa mbi yeke KOTA GBIA.

⁶ “Tënë so mbi Kota Gbia NZAPA, mbi tene ayeke so: Ala pika lani maboko, ala huru na ngia ndali ti ye ti vundu so asi na Israel; be ti ala anzere si ala baa azo ti Israel tongana mbumbuse ye na le ti ala.

⁷ Ndali ni, fade mbi yeke yoro maboko ti pika ala, mbi yeke zia ala na maboko ti amara nde ti nzi aye ti ala kue, mbi yeke zi ala na popo ti azo, mbi yeke buba kodro ti ala biani biani si kodro ni akiri ti ngba pepe. Tongaso, fade ala yeke hinga atene, mbi laa mbi yeke KOTA GBIA.”

Tënë na tere ti azo ti Moab

⁸ “Tënë so mbi Kota Gbia NZAPA, mbi tene ayeke so: Azo ti Moab na ti Seir atene: ‘Ye so asi na azo ti Juda ayeke tongana ti tanga ti amara kue.’

⁹ Ndali ni, fade mbi yeke sara titene awato aga atiri bira na agbata so kue akanga lege ti lingo na kodro ti Moab. Awato ni ayeke buba agbata ni na peko ti tere, na peko ti tere, ataa apendere gbata tongana: Bet-Yeshimot, Baal-Meon na Kiriataim.

¹⁰ Mbi yeke zia lege na azo ti mbage ti To ti ga ti mu sese ti ala, azo ti Moab, titene aga ti azo ni tongana ti so azo ni amu sese ti azo ti Amon si aga ti ala so. Tongaso, fade zo ayeke kiri ti dabe ti lo pepe na azo ti Moab na popo ti amara nde.

¹¹ Mbi yeke fâ ngbanga na li ti azo ti Moab; tongaso, fade ala yeke hinga atene, mbi laa mbi yeke KOTA GBIA.”

Tënë na tere ti azo ti Edom

¹² “Tënë so mbi Kota Gbia NZAPA, mbi tene ayeke so: Azo ti Edom asara lani ambeni ye ti kiri peko ti sioni na azo ti Juda. Ndani laa, tënë ayeke na li ti ala, ngbanga ti so ala kiri peko ti sioni na azo ti Juda.

¹³ Ndali ni, tënë so mbi Kota Gbia NZAPA, mbi tene ayeke so: Fade mbi yeke yoro maboko ti mbi ti pika azo ti Edom; mbi yeke hunzi azo na anyama ti kodro ni kue kue kue. Mbi yeke sara titene kodro ni aga ndo ti gba ti atêne, ato nda ni na gbata ti Teman ngbii asi na Dedan. Fade a yeke fâ azo ni na yongoro zeme.

¹⁴ Mbi yeke sara titene azo ti Israel, azo ti mbi akiri peko ti sioni na azo ti Edom. Ala yeke sara na azo ti Edom alingbi na ngonzo ti mbi nga na ngonzo ti mbi ti wâ. Tongaso, fade azo ti Edom ayeke hinga lege so mbi yeke kiri peko ti sioni na zo. So tënë ti yanga ti Kota Gbia NZAPA laa.”

Tënë na tere ti azo ti Filistii

¹⁵ “Tënë so mbi Kota Gbia NZAPA, mbi tene ayeke so: Azo ti Filistii asara ye ti kiri na peko ti sioni na azo ti Israel; na lege ti sioni baba ti be ti ala laa, ala kiri na peko ti sioni ti ke awato ti ala kpu na kpu; nilaa ala fâ awato ti ala ni kue kue kue.

¹⁶ Ndali ni, tënë so mbi Kota Gbia NZAPA, mbi tene ayeke so: Fade mbi yeke yoro maboko ti mbi ti pika azo ti Filistii, mbi yeke fâ ala kue kue kue, azo ti Kaftor, ala so ayeke lango na yanga ti kota ngu-ingo so.

¹⁷ Peko ti sioni so mbi yeke kiri ni na ala na pika so mbi yeke pika ala ayeke duti sioni mingi. Tongaso, fade ala yeke hinga atene, mbi laa mbi yeke KOTA GBIA na lege so mbi yeke kiri peko ti sioni na ala.”