Ezekiel 23 - Mbeti ti Nzapa - Tënë so amu fini

Samarii asara ye ti ndumba

¹ Tënë ti *KOTA GBIA asi na mbi, atene:

² “*Molenge ti zo, ando, a-ita-wali use ayeke daa, ala yeke amolenge ti mama oko.

³ So ala ngba maseka, ala sara aye ti ndumba na Ezipte. Kâ, akoli agbu me ti ala ti sara na ngia, akoli atatara kate ti ala ti maseka.

⁴ Iri ti yaya ni ayeke Ohola, iri ti ngambe ni Oholiba. Yaya ni so ayeke Samarii, ngambe ni ayeke Jérusalem. Ala use kue aga ti mbi si ala du amolenge-koli na amolenge-wali.

⁵ Me Ohola asara ye ti ndumba, ataa so lo yeke ti mbi. Azo ti Asirii so alango nduru na lo, lo sara nzara ti ala mingi si lo sara ndeko na ala.

⁶ Azo ti Asirii ni ayeke yu gi abengba bongo, ala yeke agovoronere, akota komanda; ala kue ayeke amaseka-koli, ala pendere mingi si ala hinga ti kpe na ambarata nzoni.

⁷ Ohola asara ye ti ndumba na akota zo ti kodro ti Asirii so kue. Tongana nzara ti mbeni oko asara lo, lo yeke sara si lo ga *sioni na vorongo afungo yanda ti ala.

⁸ Lo ngba ti sara aye ti ndumba ni ti gue na ni tongana ti so lo sara lani na Ezipte so. Kâ, so lo de maseka, akoli alango na lo, ala gbu me ti lo ti maseka ti sara na ngia si ala tuku aye ti ndumba ti ala na ndö ti lo.

⁹ Ndani laa, mbi zia lo na maboko ti andeko ti lo, azo ti Asirii so lo sara nzara ti ala mingi so.

¹⁰ Ala zia lo ndumbu, ala mu amolenge ti lo ti koli na ti wali; ti lo, ala fâ lo na yongoro zeme. Baa lege so ala fâ ngbanga na li ti lo laa. Nilaa Ohola aga tapande ndali ti awali.”

Jérusalem asara ye ti ndumba

¹¹ “Ita ti lo Oholiba abaa ye so kue. Me nzara ti tere ti lo ahon ndoni si lo sara sioni mingi; lo kiri lo sara ye ti ndumba ahon ti ita ti lo.

¹² Azo ti Asirii so alango nduru na lo, lo sara nzara ti ala mingi. Azo ni ayeke agovoronere, akota komanda, aturugu so ayu apendere bongo; ala hinga ti kpe na ambarata nzoni, ala kue ayeke amaseka-koli so apendere mingi.

¹³ Mbi baa so lo nga lo sara si lo ga *sioni: ala use kue, lege ti sarango ye ti ala alingbi tere.

¹⁴ Me Oholiba akiri asara ti lo ye ti ndumba ni ahon ti ita ti lo. Mbeni lâ, lo baa limo ti akoli so a sara na tere ti dere ti da; abengba bengba limo ti akoli; alimo ti azo ti Babilone laa.

¹⁵ Ala kanga kamba ti ndö ti bongo na ngbonda ti ala, ala yu kpoto na li ti ala. Ala kpa akpengba zo ti bira. Ala yeke tongana azo so ayeke lango na Babilone, kodro so a du ala daa.

¹⁶ Gi so lo baa ala, Oholiba asara nzara ti ala mingi si lo tokua azo na ala na kodro ti Babilone.

¹⁷ Tongaso azo ti Babilone aga na ndo ti lo, ala lango na lo, ala sara si lo ga *sioni na lege ti sarango ye ti ndumba na lo. Na peko ti so lo ga *sioni na lege ti ala awe, be ti lo akiri ake ala mingi.

¹⁸ Lo fa polele so lo yeke wali-ndumba, lo sara si tere ti lo angba ndumbu. Tongaso, be ti mbi ato nda ti ke lo, tongana ti so be ti mbi ake lani ita ti lo so.

¹⁹ Me lo kiri lo sara ye ti ndumba ahon ndoni, tongana ti so lani lo sara na Ezipte na ngoi so lo de maseka.

²⁰ Kâ, akoli so ayeke gi awali kirikiri so, lo sara nzara ti ala mingi. Tere ti ala ti koli ayeke tongana ti lele, ala yeke tuku ngu ti tere ti ala tongana ti mbarata.”

Sioni so ayeke wara Jérusalem

²¹ “Oholiba, mo kiri na ndö ti sarango ye ti potopoto ti mo so lani mo de maseka si mo yeke sara so. Lani azo ti Ezipte ayeke gbu me ti mo ti sara na ngia, ala yeke tatara kate ti mo ti maseka.

²² Ndani laa, tënë so mbi Kota Gbia NZAPA, mbi tene na mo ayeke so: Andeko ti mo so lani be ti mo akiri ake ala so, mbi yeke pusu ala na tere ti mo. Mbi yeke bongbi ala mbage na mbage ti ga na tere ti mo.

²³ Akoli ti Babilone, ti Kalde kue, ti Pekod, ti Shoa na ti Koa, ti Asirii si ayeke ga. Ala kue ayeke amaseka-koli so apendere mingi; ala yeke agovoronere, akota komanda, akpengba zo ti bira, akota zo ti kodro, azo so kue ahinga ti kpe na ambarata nzoni.

²⁴ Ala yeke londo na mbage ti Banga ti ga na tere ti mo. Ala yeke ga na apusu ti mbarata, na apusu nde nde; gba ti bongbi ti aturugu laa. Ala yeke mu *avala na akpoto ti wen ti ga na ni na tere ti mo. Ala yeke ngoro mo mbage na mbage kue. Mbi yeke zia tënë ti mo na maboko ti ala si ala yeke fâ ngbanga ti mo alingbi na ndia ti ala.

²⁵ Mo Oholiba, fade mbi yeke sara mbanda na tere ti mo; azo ni ayeke sara ye na mo na lege ti sioni ngonzo; ala yeke fâ hon ti mo na mê ti mo. Tanga ti azo ti mo so angba na fini, ala yeke kui kuâ ti yongoro zeme. Azo ni ayeke mu amolenge ti mo ti koli na ti wali; aye ti mo so angba so, fade a yeke gbi ni kue na wâ.

²⁶ Ala yeke ro abongo ti mo, ala yeke mu aye ti pendere ti mo.

²⁷ Mbi yeke kai sarango ye ti potopoto ti mo nga na sarango ye ti ndumba ti mo so mo to nda ni na Ezipte. Mo yeke kiri ti yo le ti mo na nduzu ti baa andeko ti mo pepe; be ti mo ayeke kiri ti ti na ndö ti Ezipte pepe.

²⁸ “Ndani laa, tënë so mbi Kota Gbia NZAPA, mbi tene ayeke so: Fade mbi yeke zia mo na maboko ti azo so mo ke ala, mbi yeke zia mo na maboko ti azo so be ti mo ake ala.

²⁹ Ala yeke sara sioni mingi na mo, ala yeke nzi amosoro so mo sara kua si mo wara so. Ala yeke zi bongo na tere ti mo si ala yeke zia mo ndumbu. Tere ti mo so mo yeke sara na ye ti ndumba so, ayeke ngba na gigi. Sarango ye ti potopoto ti mo na sarango ye ti ndumba ti mo laa asara si

³⁰ aye so ayeke si na mo. Biani mo sara ye ti ndumba na amara nde, mo sara si mo ga *sioni na lege ti vorongo ayanda ti ala.

³¹ Mo mu gi lege ti sarango ye ti ita ti mo ti wali, Ohola. Ndani laa, gi oko kopo ti ngonzo ti mbi so lo nyon, ni laa mbi yeke mu na mo.

³² Tënë so mbi Kota Gbia NZAPA, mbi tene ayeke so: Kopo so lani ita ti mo anyon so, gi ni laa mo yeke nyon ni. Kopo ni akono si ya ni ali. Ndali ni, azo ayeke he mo si mo yeke ga ye ti ngia, ngbanga ti so kopo ni asi mingi.

³³ Mo yeke ga tongana zo so samba ahon ndö ti lo si mo yeke baa pasi mingi. Kopo ni ayeke kopo ti kota mbeto na ti bubango ndo; ita ti mo Samarii anyon ni awe.

³⁴ Mo yeke nyon ni, mo yeke nyon ni kue; mo yeke fâ ya ni na pembe ti mo, mo yeke mu afango ni ti suru na me ti mo. Biani, mbi KOTA GBIA, mbi tene tënë awe; so tënë ti yanga ti Kota Gbia NZAPA laa.

³⁵ Ndani laa, tënë so mbi Kota Gbia NZAPA, mbi tene ayeke so: Jérusalem, be ti mo agirisa na mbi awe, mo zia peko ti mo na mbi awe. Fadeso, mo yeke wara futa ti peko ti sarango ye ti potopoto ti mo nga na ti ye ti ndumba ti mo.”

Nzapa afâ ngbanga na li ti Samarii nga na Jérusalem

³⁶ *KOTA GBIA atene na mbi: “*Molenge ti zo, mo ye biani ti fâ ngbanga na li ti Ohola na Oholiba? Alingbi mo fa na ala asioni ye so ala sara si zo alingbi ti baa na le ti lo fani use pepe so.

³⁷ Ala yeke awali so alango na akoli nde, maboko ti ala atuku mene. So ala voro ayanda so, so langongo na akoli nde laa. Amolenge-koli so ala du na mbi, ala fâ ala ti mu na *sandaga na ayanda ni titene amolenge ni aga kobe ti ayanda ni.

³⁸ Ye so ala kiri asara na mbi ayeke so: gi na oko lango ni, ala sara si ndo so a zia ni nde ndali ti mbi aga *sioni; *lango ti wungo tere so a zia nde ndali ti mbi, ala sara si aga sioni.

³⁹ Gi na lango so ala fâ amolenge ti ala ni ti mu na sandaga na ayanda, ala si na ndo so a zia ni nde ndali ti mbi, ala sara si ndo ni aga sioni; ye so ala sara taa na ya ti da ti mbi laa.

⁴⁰ Na ndö ni kue, ala tokua mbeni zo ti iri akoli so alango yongoro ti ga. Gi so akoli ni ama tokua ni, ala mu lege aga. Ndali ti akoli ni, ala sukula ngu, ala suru ye ti pendere na le ti ala, ala yu aye ti pendere.

⁴¹ Na pekoni, ala duti na ndö ti apendere gbogbo. Ala leke meza na dawa ti gbogbo ni, ala zia dukani na mafuta ti mbi na ndö ti meza ni.

⁴² Gba ti azo aga na ndo ti ala si ala yeke sara wuluwulu. Ambeni zo ni alondo na akodro nde nde ti benyama si aga. Ala zia aye ti pendere na maboko ti awali use so ayeke a-ita so, ala zia nga pendere kpoto ti gbia na li ti awali ni.

⁴³ Tongaso mbi tene na be ti mbi, mbi tene: ‘Ataa wali so alango na akoli nde ngbii lo woko kue awe so, lo laa lo ngba ti sara ye ti ndumba so!

⁴⁴ Akoli alango na lo tongana ti so a yeke lango na wali-ndumba. Gi tongaso laa akoli alango na Ohola nga na Oholiba, awali ti sarango ye ti potopoto so!’

⁴⁵ Me fade akoli ti mbirimbiri laa ayeke fâ ngbanga na li ti awali so, tongana ti so a yeke fâ ngbanga na li ti awali so alango na akoli nde nga na awali so atuku mene. Biani, ala lango na akoli nde si maboko ti ala atuku mene.

⁴⁶ “Tënë so mbi Kota Gbia NZAPA, mbi tene ayeke so: Ala bongbi gba ti azo ti ga na tere ti awali ni; fade mbi yeke sara titene awali ni ado na kota mbeto si a nzi aye ti ala kue.

⁴⁷ Bongbi ti azo ni ayeke bo ala na têne si ayeke fâ ala na yongoro zeme; a yeke fâ amolenge ti ala ti koli na ti wali; a yeke gbi ada ti ala.

⁴⁸ Fade mbi yeke kai sarango ye ti potopoto na ya ti kodro ni. Ye ni ayeke ga tapande ndali ti awali kue si ala yeke kiri ti sara ye ti potopoto pepe tongana ti awali use so ayeke a-ita so.

⁴⁹ Ohola na Oholiba, fade futa ti sarango ye ti potopoto ti ala ayeke kiri na li ti ala wani. Ala yeke wara futa ti peko ti siokpari ti ala, ngbanga ti so ala voro ayanda. Tongaso, fade ala yeke hinga atene, mbi laa mbi yeke Kota Gbia NZAPA.”