Ezekiel 21 - Mbeti ti Nzapa - Tënë so amu fini

Sioni sango ndali ti azo ti Israel

¹ Tënë ti *KOTA GBIA asi na mbi, atene:

² “*Molenge ti zo, mo baa ndo na mbage ti Mbongo, mo tene peko ti tënë ti yanga ti mbi na azo ni; mo tene tënë ti yanga ti mbi na ndö ti azo ti gbako ti Negev.

³ Fade mo yeke tene na azo ti gbako ni, mo tene: Ala ma tënë ti KOTA GBIA! Tënë so mbi, Kota Gbia NZAPA, mbi tene ayeke so: Mbi yeke bi wâ na ya ti gbako ni si ayeke gbi afini keke na aholengo keke kue. Menga-wâ so ayeke za lawu lawu so ayeke mingo pepe; ti londo na Mbongo ngbii asi na Banga, wâ ni ayeke zö le ti azo kue.

⁴ Fade azo kue ayeke baa atene, mbi KOTA GBIA laa mbi bi wâ ni; wâ ni yeke mingo pepe.”

⁵ Mbi tene: “Ae Kota Gbia NZAPA! Azo ni ayeke tene tënë na iri ti mbi, atene: ‘Koli so laa, zo ti tenengo atoli so.’ ”

⁶ Tënë ti KOTA GBIA asi na mbi, atene:

⁷ “Molenge ti zo, mo baa ndo na mbage ti Jérusalem, mo tene peko ti tënë ti yanga ti mbi na ndö ti ando so a zia nde ndali ti yango asandaga; mo tene tënë ti yanga ti mbi na ndö ti sese ti Israel.

⁸ Fade mo yeke tene na azo ti Israel, mo tene: Tënë so mbi KOTA GBIA, mbi tene ayeke so: ‘Mbi yeke ga na tere ti ala, mbi yeke gboto yongoro zeme ti mbi na ya ti bozo ni si mbi yeke fâ ala kue, azo ti mbirimbiri na azo ti sioni.

⁹ Biani, mbi ye ti fâ ala kue, azo ti mbirimbiri na azo ti sioni. Ndani laa mbi yeke gboto yongoro zeme ti mbi na ya ti bozo ni ti fâ na azo kue, ti londo na Mbongo ngbii asi na Banga.

¹⁰ Tongaso, fade azo kue ayeke hinga atene, mbi KOTA GBIA laa mbi gboto yongoro zeme ti mbi na ya ti bozo ni; mbi yeke kiri ni na ya ni mbeni pepe.’

¹¹ Ti mo, molenge ti zo, mo ba li ti mo na sese na kota mawa na be ti mo, mo dema! Fade mo yeke dema na le ti azo kue.

¹² Tongana ala hunda mo, atene: ‘Mo yeke dema ngbanga ti nyen?’ Fade mo kiri tënë na ala, mo tene: ‘Mbi ma mbeni sioni sango, ye ni ayeke si. Fade be ti azo kue ayeke fâ, maboko ti azo ayeke woko, ngangu ayeke tia azo, alikunu kue ayeke do kpakpakpa. Ngoi ni alingbi awe! Ye ni asi fadeso awe!’ So tënë ti yanga ti Kota Gbia NZAPA laa.”

Yongoro zeme ti KOTA GBIA

¹³ Tënë ti *KOTA GBIA asi na mbi, atene:

¹⁴ “*Molenge ti zo, mo tene peko ti tënë ti yanga ti mbi, mo tene: Tënë so KOTA GBIA atene ayeke so: Ae, yongoro zeme laa, yongoro zeme, a kpaka yanga ni awe, ayeke za zango!

¹⁵ A kpaka yanga ni ti fâ na azo kue, yanga ni aza ti bi wâ ti bekpa. Tongaso, fade tere ti e ayeke nzere? Keke ti komandema ti molenge ti mbi abaa akeke kue tongana mbumbuse ye.

¹⁶ Mbi mu ni titene a leke yanga ni si zo alingbi ti sara na kua. A kpaka yanga ni, asara si le ni aza zango titene a zia na maboko ti zo ti fango zo.

¹⁷ Molenge ti zo, mo toto, mo dekongo ngangu! A tokua yongoro zeme so na tere ti azo ti mbi, nga na tere ti amakonzi kue ti Israel. Biani, fade a yeke fâ ala legeoko na azo ti mbi ni. Mo zia maboko na ndö ti go ti mo ti fa vundu ti be ti mo.

¹⁸ Biani, so ye ti tarango be! Tongana keke ti komandema so ayeke baa ye tongana mbumbuse ye ayeke daa pepe, fade nyen laa ayeke si, nyen? So tënë ti yanga ti Kota Gbia NZAPA laa.

¹⁹ Ti mo, molenge ti zo, mo tene peko ti tënë ti yanga ti mbi. Pika maboko ti mo fani oko, fani use, fani ota, fade yongoro zeme ayeke kpo zo. Biani, so ayeke yongoro zeme ti fango zo, yongoro zeme ti fango na azo kue kue kue, yongoro zeme so ayeke ku ala kungo.

²⁰ Yongoro zeme ni ayeke woko be ti azo ni, ayeke sara si ala ti gbani gbani. Mbi zia yongoro zeme ti fango zo na yanga ti ada kue; a sara ni ti bi na wâ ti bekpa, yanga ni aza ti fâ na azo kue.

²¹ Yongoro zeme so yanga ni aza zango, kpo zo na mbage ti maboko ti koli! Kpo zo na mbage ti maboko ti wali! Mo kpo zo na ndo so kue le ti mo abaa ndo daa!

²² Mbi nga, mbi yeke pika maboko ti mbi; mbi yeke sara ye ni ngbii ngonzo ti mbi ti wâ ade si. Mbi KOTA GBIA laa mbi tene tënë so.”

Bira ati na ndö ti Jérusalem

²³ Tënë ti *KOTA GBIA asi na mbi, atene:

²⁴ “Ti mo, *molenge ti zo, mo suru alege use so gbia ti Babilone alingbi ti ga daa na yongoro zeme ti lo. Alingbi alege use so alondo na ya ti kodro oko. Na tongo nda ti lege oko oko, mo zia mbeni ye so afa atene, lege so ague na ya ti gbata tongaso.

²⁵ Oko ti alege ni, aturugu ti Babilone ayeke mu ni ti gue na Raba, gbata ti azo ti mara ti Amon. Use lege ni, ala yeke mu ni ti gue na Juda, na Jérusalem, gbata so a sara ngangu gbagba na tere ni.

²⁶ Gbia ti Babilone aluti na sangbi-lege ni, na ndo so alege use so atengbi daa ti bi zeke. Lo yingi ale ti kokora, lo hunda anzapa ti lo, lo baa be ti anyama.

²⁷ Zeke so afa Jérusalem ayeke na ya ti maboko ti lo ti koli. Lo yeke mu yanga titene azo ague, afâ azo gbani gbani, ala dekongo ti bira, ala zia amasini ti bira na tere ti ayanga ti gbagba ni, ala bongbi sese aga *koto na tere ti gbagba ni, ala koro du na gbe ti gbagba ni.

²⁸ Azo ti Jérusalem atene na be ti ala atene, tënë ti zeke so ayeke gi ye senge, ngbanga ti so a deba yanga na ala awe ti bata ala. Me gbia ti Babilone adabe ti ala na sioni ti ala; tongaso, a yeke gbu ala titene ala ga azo ti kanga.

²⁹ Ndani laa, tënë so mbi Kota Gbia NZAPA, mbi tene ayeke so: Ala sara si mbi dabe ti mbi na asioni ti ala; na lege ti asarango ye ti ala kue, ngangu li ti ala na siokpari ti ala asigigi polele. So ala sara si a kiri a dabe na asarango ye ti ala ni, fade a yeke gbu ala titene ala ga azo ti kanga.

³⁰ “Ti mo, makonzi ti Israel, zo ti sioni, zo so asara sioni mingi so; lango ti mo ayeke ga, ngoi so asioni sarango ye ti mo ayeke hunzi.

³¹ Tënë so mbi Kota Gbia NZAPA, mbi tene ayeke so: Fade a yeke zi bongo so a yeke kanga na li ti mo tongana kpoto, a yeke zi kpoto ti mo ti gbia. Ye kue ayeke ga nde! Asenge zo ayeke duti na kota ndo, akota zo ayeke ga asenge zo.

³² Ayeke ti! Ayeke ti! Mbi yeke sara ande si Jérusalem ati! Fade gbata ti Jérusalem ayeke buba kue kue kue. Me ayeke buba kue pepe, ngbii zo so mbi mu na lo ngangu ti fâ ngbanga so aga si.”

Bira ati na ndö ti azo ti mara ti Amon

³³ “Ti mo, *molenge ti zo, mo tene peko ti atënë ti yanga ti mbi, mo tene: Tënë so Kota Gbia NZAPA atene na ndö ti azo ti mara ti Amon nga na zongango ndo ti ala ayeke so: Yongoro zeme, a gboto yongoro zeme awe! A sara yanga ni si ayeke za zango ti fâ na azo kue, ti hunzi azo, ti bi na wâ ti bekpa.

³⁴ Na ndembe so ala ngba ti luti na ndö ti aye so ala baa na ya ti mbeni ye tongana bango-li si ayeke ye senge, na ndembe so azo ayeke baa nda ti aye ti mvene, gi na ndembe ni so yongoro zeme ni ayeke de go ti azo ti sioni na azo so asara sioni mingi. Ngoi so sioni ti ala ayeke hunzi laa.

³⁵ Fadeso, ala kiri na yongoro zeme ti ala na ya ti bozo ni. Na ndo so a sara ala daa, na kodro so a du ala daa, kâ laa, fade mbi yeke fâ ngbanga na li ti ala.

³⁶ Mbi yeke tuku ngonzo ti mbi ti wâ na ndö ti ala, mbi yeke huru pupu ti wâ ti ngonzo ti mbi na ndö ti ala; mbi yeke zia ala na maboko ti azo ti sarango ngangu na zo, azo so kua ti ala ayeke ti bubango ye.

³⁷ Ala yeke ga tongana ye ti sarango na wâ, mene ti ala ayeke mu ya ti kodro ni kue. Na pekoni, zo ayeke kiri ti dabe ti lo na ala pepe. Mbi *KOTA GBIA laa, mbi tene tënë so.”